ەي، عالامشار،
عارىشقا وزعان ساناسى،
بىزگە دە ءبىر كوز توقتاتىپ قاراشى.
انىمەنەن ادامزاتتى الديلەپ،
الدارىڭا كەلدى قازاق بالاسى!

قۇلاعىڭ ءتۇر، قۇلىنىما، ءاز عالام،
ديماش مەنىڭ، ءوز پەرزەنتىم،
ءوز بالام.
ونىڭ ءانى – اققۋ ءۇنى كولدەگى،
بوز ىنگەننىڭ زارى سوندا بوزداعان!

ۇلى دالا – كوك تۇركىنىڭ تۇراعى،
كوك ءبورىنىڭ ۇلىعانى – ۇلى ءانى!
الديلەگەن ءۇنى سوندا انامنىڭ،
اتقا قونعان باتىرلاردىڭ ۇرانى!

سوقپاعىنا شيىرلاماي سونى ءىزدىڭ،
بابام سالعان باعزى اۋەنمەن ەگىزبىن.
دومبىرانىڭ شاناعىندا كۇمبىرلەپ،
كۇڭىرەنتىپ قورقىت تارتقان قوبىزبىن!

ەبى سوققان ەندى ىرگەمدى قىمتار كىم؟
ەرىم دەپ ەم ەنشىلەگەن سۇڭقارعا ءۇن.
ەن دالادا ەركىن جۇرگەن ەلىكتىڭ،
تۇياعىنىڭ ءۇنى دەپ ەم تۇلپاردىڭ!

تاعدىر سولاي،
بىزگە ەجەلدەن تانىس مۇڭ.
تەبىنگىگە تەر قاتىرىپ، قان ءىشتىم.
ازاتتىقتىڭ جىرى ما ەدىڭ زارىققان،
كۇركىرى ما ەڭ نايزاعايداي نامىستىڭ!

تورتكۇل دۇنيە،
تەڭەسە الار قاي بالاڭ؟
الەم بۇگىن كەڭ قۇشاعىن جايدى وعان.
ءبىزدىڭ ديماش – بوزتورعايى دالامنىڭ،
بۇلبۇل قۇسى ەل باعىندا سايراعان!

مىنە، وسىلاي اۋەلەيدى كۇي باسى،
ەي، عالامشار،
بار ءناسىلدى جيناشى...
تامىرىندا قانى ويناعان قازاقتىڭ،
شىقتى الدىڭا ءدۇر-الەمنىڭ ديماشى!!!

قۋات قايرانباەۆ

Abai.kz