قىرعىزستان پرەزيدەنتى سادىر جاپاروۆ ءوزىنىڭ پورترەتىن مەملەكەتتىك عيماراتتارعا، جۇمىس كابينەتتەرىنە ىلمەۋگە شاقىردى. بۇل تۋرالى 8 اقپاندا پرەزيدەنتتىڭ ءباسپاسوز حاتشىسى گالينا بايتەرەك جەتكىزدى.

«پرەزيدەنت سادىر جاپاروۆ قازىر ەلدىڭ جاعدايىن جاقسارتۋ ءۇشىن ەشتەڭە ىستەمەدىم دەپ ەسەپتەيدى. سوندىقتان پرەزيدەنت بارلىق مەملەكەتتىك ورگاندارعا پورترەتىن ىلمەۋدى سۇراپ جاتىر. پورترەت ىلگىسى كەلگەندەر جۋسۋپ ابدراحمانوۆ، يسحاك راززاكوۆ سياقتى ەلدى نىعايتۋعا قىزمەت ەتكەن مەملەكەتتىك قايراتكەرلەردىڭ سۋرەتىن ىلۋگە بولادى»، - دەدى بايتەرەك.

قاڭتار ايىنىڭ سوڭىندا پرەزيدەنتتىڭ وشتاعى رەزيدەنتسياسىنىڭ ديرەكتورى سانجاربەك تولونباەۆ سادىر جاپاروۆتىڭ كىلەمگە توقىلعان سۋرەتىن كابينەتىنە ءىلىپ العانى الەۋمەتتىك جەلىلەردە قىزۋ تالقىلانعان. سانجاربەك تولونباەۆ كىلەم جاپاروۆ اباقتىدا وتىرعاندا توقىلعانىن ايتقان.

قىرعىزستاندا بىلتىر 4 قازاندا وتكەن پارلامەنت سايلاۋىنىڭ ناتيجەسىنە نارازىلىق جاپپاي تارتىپسىزدىككە ۇلاسقاندا، 10 جىل جازا مەرزىمىن وتەپ جاتقان سادىر جاپاروۆتى جاقتاستارى تۇرمەدەن شىعارعان.

10 قاڭتاردا وتكەن پرەزيدەنت سايلاۋىندا س.جاپاروۆ 80% جاقىن داۋىس الىپ، جەڭىسكە جەتكەن.

Abai.kz