2020 جىلدىڭ ءتورتىنشى توقسانىنىڭ قورىتىندىلارى بويىنشا قازاقستاندىقتاردىڭ ورتاشا ايلىق جالاقىسىنىڭ مولشەرى جىلدىق 14,3 ءوسىمدى كورسەتىپ، 233,1 مىڭ تەڭگەگە جەتتى. 

ينفلياتسيانى ەسەپكە العاندا، ناقتى ءوسىم 6,5 پايىزدى قۇراعان. سالىستىرمالى تۇردە، 2019 جىلدىڭ سايكەس، كەزەڭىندە قازاقستاندىقتاردىڭ ورتاشا ايلىق جالاقىسى 203,9 مىڭ تەڭگەنى قۇراعان.

وڭىرلەر اراسىندا ورتاشا ايلىق جالاقىنىڭ ەڭ ۇلكەن مولشەرى ءداستۇرلى تۇردە اتىراۋ وبلىسىندا: 377,4 مىڭ تەڭگە، بۇل ەل بويىنشا كورسەتكىشتەن جالپى العاندا 61,9 پايىزعا كوپ.

ورتاشا ايلىق جالاقىسى جوعارى ايماقتار «ۇشتىگىنە» سونداي-اق ەلوردا (349,6 مىڭ تگ) جانە ماڭعىستاۋ وبلىسى (337,7 مىڭ تگ) كىرگەن. ال تومەنگى جالاقى تۇركىستان (166,7 مىڭ تگ), جامبىل (168,8 مىڭ تگ) جانە سولتۇستىك قازاقستان وبلىستارىنىڭ (168,9 مىڭ تگ) تۇرعىندارى الادى. ءتۇرلى سالالاردا قىزمەت ەتەتىن جۇمىسكەرلەردىڭ ەڭبەكاقىسىندا ايىرماشىلىقتار بايقالعان.

ماسەلەن، تاۋ-كەن قازۋ ونەركاسىبىندە ورتاشا ايلىق جالاقىنىڭ ماكسيمالدى مولشەرى بەلگىلەندى (472,3 تىس. تگ), ال قارجى جانە ساقتاندىرۋ قىزمەتىندە بۇل كورسەتكىش 422,6 مىڭ تەڭگەنى قۇراعان. وسى ارادا، ەڭ تومەن ورتاشا ايلىق كورسەتكىش سۋمەن جابدىقتاۋ سالاسىندا (145,7 مىڭ تگ) جانە اۋىل شارۋاشىلىعىندا (147,7 مىڭ تگ) تىركەلگەن.

ءوز كەزەگىندە، ءبىلىم بەرۋ سالاسىندا ورتاشا ايلىق جالاقى 176,5 مىڭ تگ قۇراعان (ەل بويىنشا ورتاشا كورسەتكىشتەن 24,3% تومەن), دەنساۋلىق ساقتاۋ سالاسىنداعى ورتاشا جالاقى — 197,4 مىڭ تگ (ەل بويىنشا ورتاشا كورسەتكىشتەن 15,3% تومەن). بۇل سالالارداعى ورتاشا ايلىق جالاقى ەل بويىنشا ەڭ تومەنگىلەر قاتارىندا. وسىلايشا، قازاقستاندا مۇنايشىلار مەن قارجىگەرلەر مۇعالىمدەر مەن دارىگەرلەرگە قاراعاندا ەكى ەسە كوپ تابىس تابادى.

دەرەككوز: قازاقپارات

Abai.kz