توپتىڭ مالىمەتىنشە، مارشتى Feminita توبىمەن بىرگە "قازفەم", "فەمسرەدا", SVET قورى مەن FemAgora ۇيىمداستىرادى. مالىمدەمەدە شەرۋ “شەۆچەنكو كوشەسىن بويىندا، گاندي ەسكەرتكىشىنەن شوقان ءۋاليحانوۆ ەسكەرتكىشىنە دەيىن وتەتىنى” جازىلعان.

“وكىنىشكە قاراي، بەيبىت ميتينگ زاڭى شەرۋ وتكىزەتىن ورىندى تاڭداۋعا مۇمكىندىك بەرمەيدى” دەيدى ۇيىمداستىرۋشىلار. فەمينيستىك توپتار ميتينگىگە قاجەتتى قارجىنى جيناۋ ءۇشىن كراۋدفاندينگ باستاماق.

2020 جىلى 8 ناۋرىزدا الماتىدا وتكەن ايەلدەر مارشىنا ەكى جۇزدەن ادام قاتىسقان. شارا كەزىندە قاتىسۋشىلار ء“اربىر ايەل ماڭىزدى” دەگەن جازۋى بار گۇل شوعىن ورتەگەن. پوليتسيا مۇنى “بۇزاقىلىق” دەپ تاۋىپ، مارشتىڭ ەكى قاتىسۋشىسىنا ايىپپۇل سالعان.

سول كەزدە حالىقارالىق Human Rights Watch ۇيىمى قازاقستان بيلىگىنەن ەكى بەلسەندىگە شىققان ايىپپۇل شەشىمىن جويۋدى تالاپ ەتكەن. HRW بەلسەندىلەر “پىكىرىن ەركىن ايتۋ قۇقىعىنىڭ اياسىندا قوعامعا ەش قاۋىپ توندىرمەيتىن ارەكەتى ءۇشىن” جازالاندى دەگەن.

بيىل وتەتىن مارش قازاقستاندا قابىلدانعان “بەيبىت ميتينگ تۋرالى” جاڭا زاڭ اياسىندا وتپەك. نۇر-سۇلتان قوعامداعى سىننان سوڭ ميتينگ زاڭىن وزگەرتىپ، حالىقتىڭ پىكىر ايتۋىنا جول اشامىز دەپ ۋادە ەتكەن. بىراق ساراپشىلار جاڭادان قابىلدانعان بەيبىت ميتينگ زاڭىندا كەدەرگىلەر سول كۇيى قالدى دەپ سانايدى. ءالى كۇنگە بەيبىت ميتينگىگە رۇقسات الۋ قيىن.

بيلىك رۇقسات ەتىلمەگەن ميتينگىگە شىققانداردى كۇشتەپ ۇستاپ، اكىمشىلىك جاۋاپقا تارتادى.

ەۋروپارلامەنت 11 اقپاندا قازاقستانعا قاتىستى قابىلداعان قارارىندا بيلىكتەن بەيبىت ميتينگىگە كەدەرگى كەلتىرمەي، زاڭدى قايتا وزگەرتۋگە شاقىردى.

Abai.kz