قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى باس ليتسەنزياسىنان ايىرىلدى. بۇل تۋرالى ءبىلىم جانە عىلىم مينيسترلىگى مالىمدەدى.

قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى جوو-نىڭ ءبىلىم بەرۋ قىزمەتىنە تەكسەرۋ جۇرگىزىپ، ناتيجەسىندە ورەسكەل بۇزۋشىلىقتاردى انىقتاعان. اتاپ ايتقاندا، ۋنيۆەرسيتەتتەگى باكالاۆريات، ماگيستراتۋرا، دوكتورانتۋرا، رەزيدەنتۋرا باعدارلاماسى بويىنشا وقۋ ءۇردىسى قاجەتتى پروفەسسورلىق-وقىتۋشىلىق قۇراممەن جانە ءتيىستى ماتەريالدىق-تەحنيكالىق بازامەن قامتاماسىز ەتىلمەگەن. سونىمەن قاتار وقۋ ورنىنداعى وزگە دە ماڭىزدى كورسەتكىشتەر بەلگىلەنگەن ەڭ تومەنگى نورمالارعا سايكەس كەلمەيدى.

2020 جىلعى شىلدە ايىنداعى تەكسەرىس ناتيجەلەرى بويىنشا اتالعان ۋنيۆەرسيتەت ليتسەنزياسىنىڭ كۇشى توقتاتىلىپ، انىقتالعان بۇزۋشىلىقتاردى جويۋعا ۋاقىت بەرىلدى. الايدا، قايتا تەكسەرىس جۇرگىزۋ كەزىندە قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى كوميتەتتىڭ نۇسقامالارىن ورىنداماعانى جانە زاڭنامانى ورەسكەل بۇزا وتىرىپ، جۇمىسىن جالعاستىرعانى بەلگىلى بولدى.

«بولاشاق دارىگەرلەرگە ساپالى ءبىلىم بەرۋ – ادامداردىڭ ءومىرى مەن دەنساۋلىعىنىڭ كەپىلى. وسى ورايدا ءبىز سوتقا جۇگىنۋگە ءماجبۇر بولدىق. قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىن جابۋ ماسەلەسىن سوت تا، ءبىلىم جانە عىلىم مينيسترلىگىنىڭ كوميتەتى تە قارادى. الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ قاۋلىسىنا سايكەس قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى اكىمشىلىك جاۋاپكەرشىلىككە تارتىلدى. ودان بولەك، جوو-عا ايىپپۇل سالىنىپ، باس ليتسەنزيادان ايىرۋ تۋرالى شەشىم شىعارىلدى», – دەدى قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.

قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتى الماتىداعى دارىگەرلەردىڭ بىلىكتىلىگىن جەتىلدىرۋ ۇيىمىنىڭ بازاسىندا 2015 جىلى قۇرىلعانىن ايتا كەتكەن ءجون. بۇگىنگى تاڭدا اتالعان وقۋ ورنىندا 3 مىڭنان استام ستۋدەنت وقيدى.

«ەلىمىز بويىنشا 14 جوعارى وقۋ ورنى بولاشاق دارىگەرلەردى دايىندايدى، ونىڭ بەسەۋى الماتى قالاسىندا ورنالاسقان. قازمۇببۋ-دا وقىعان ستۋدەنتتەردىڭ گرانتتارى ساقتالادى جانە ولار باسقا جوعارى وقۋ ورىندارىنا اۋىستىرىلادى. وقۋ قۇنى وزگەرمەيدى. سونداي-اق وقىتۋشىلاردى جۇمىسقا ورنالاستىرۋ ماسەلەسى جەكە قاراستىرىلىپ جاتىر»، – دەپ اتاپ ءوتتى گۇلزات كوبەنوۆا.

باس ليتسەنزيادان ايىرۋ تۋرالى سوت شەشىمى 10 جۇمىس كۇنىنەن كەيىن زاڭدى كۇشىنە ەنەدى جانە جوعارى وقۋ ورنى ءبىلىم بەرۋ قىزمەتىن توقتاتۋعا مىندەتتى بولادى.

ايتا كەتەيىك، بۇل ءبىلىم جانە عىلىم مينيسترلىگىنىڭ ساپاسىز ءبىلىم بەرەتىن جوعارى وقۋ ورىندارىنىڭ سانىن قىسقارتۋ بويىنشا جۇمىسىنىڭ اياسىندا اتقارىلعان.

Abai.kz