وزبەكستان پرەزيدەنتى شاۆكات ميرزياەۆ 22 اقپاندا بۇۇ-نىڭ ادام قۇقىقتارى جونىندەگى كەڭەسىنىڭ 46-سەسسياسىنا قاتىسادى. وسىلاي دەپ پرەزيدەنتتىڭ ءباسپاسوز قىزمەتى حابارلادى.

كەڭەس وتىرىسى جەنەۆادا ۆيدەوكونفەرەنتسيا فورماتىندا وتەدى. شاۆكات ميرزياەۆ "ەلدەگى دەموكراتيالىق جانە ادام قۇقىقتارى باعىتىندا جاسالىنىپ جاتقان جۇمىستارعا توقتالادى" دەلىنگەن حابارلامادا.

شاراعا بۇۇ باس حاتشىسى انتونيۋ گۋتەرريش، ادام قۇقىقتارى بويىنشا جوعارعى كوميسسار ميشەل باچەلەت، 150 ەلدىڭ جوعارى دەڭگەيدەگى وكىلدەرى قاتىسادى دەپ كۇتىلەدى.

وزبەكستان بيلىگى جىل سايىن ەلدە ادام قۇقىقتارى ماسەلەسى جاقسارىپ كەلە جاتىر دەگەنىمەن حالىقارالىق ۇيىمدار باسقاشا كوزقاراس بىلدىرەدى.

ماسەلەن Human Rights Watch حالىقارالىق قۇقىق قورعاۋ ۇيىمىنىڭ سوڭعى مالىمدەمەسىندە شاۆكات ميرزياەۆ باسقارعان جىلدارى ادام قۇقىقتارى ءبىرشاما جاقسارعانىمەن، اۆتوريتارلىق جۇيە سول كۇيى قالىپ وتىر دەپ اتاپ وتكەن.

وڭ وزگەرىستەرگە قاتىستى بيلىك بەس ساياسي تۇتقىندى بوساتقان. بىراق بيلىك جەرگىلىكتى "چيروك" جانە "ادام قۇقىقتارى ءۇيى" قۇقىق قورعاۋ ۇيىمدارىن تىركەۋدەن باس تارتىپ جاتىر.

وزبەكستاندا بيۋدجەت قىزمەتكەرلەرىن بۇرىنعىشا ماقتا تەرۋگە ماجبۇرلەپ شىعارادى، تاۋەلسىز اقپارات قۇرالدارىنىڭ وكىلدەرى ءالى كۇنگە دەيىن قۋعىندالادى دەلىنگەن حالىقارالىق ۇيىم مالىمدەمەسىندە.

Abai.kz