بۇعان دەيىن شىمكەنت قالالىق دەنە شىنىقتىرۋ جانە سپورت باسقارماسىن باسقارعان ولەگ پوچيۆالوۆ دەگەن ادامنان قوس ازاماتتىق انىقتالعان بولاتىن. ەكس-شەنەۋنىك قازاقستاننان بولەك رەسەي فەدەراتسياسىنىڭ دا ازاماتى بولعان. 

مۇنداي اقپارات الەۋمەتتىك جەلىدە وتكەن جىلدىڭ جەلتوقسان ايىندا پايدا بولعان. ال بيىل اقپان ايىنىڭ باسىندا و.پوچيۆالوۆتىڭ رەسەي فەدەراتسياسى ازاماتتى ەكەنى رەستالعانى حابارلاندى. شىمكەنت قالاسى پوليتسيا دەپارتامەنتى ونى قازاقستان رەسپۋبليكاسى ازاماتتىعىنان ايىرۋ ماسەلەسىن قاراستىرىپ جاتقان.

كەيىن شىمكەنتتىك شەنەۋنىك وزىندە قوس ەلدىڭ ازاماتتىعى بار دەپ اقپارات تاراتقان پوليتسيانىڭ حابارلاماسى جالعان ەكەنىن مالىمدەپ، پوليتسيانىڭ ارەكەتىن زاڭسىز دەپ تانۋ ءۇشىن سوتقا تالاپ ارىز تۇسىرگەن.

بىراق سوت باسقارما باسشىسىنىڭ رەسەي ازاماتى ەكەنى تولىق دالەلىن تاپقانىن جاريالاپ، ونىڭ تالاپ ارىزىن قاناعاتتاندىرۋسىز قالدىردى.

«پوچيۆالوۆقا قاتىستى ازاماتتىق ءىستى قاراۋ بارىسىندا ونىڭ رەسەي فەدەراتسياسىنىڭ ازاماتتىعىن العانى تولىق ءوز دالەلىن تاپتى. بۇل ۇقك-ءنىڭ شىمكەنت قالاسى بويىنشا دەپارتامەنتىنىڭ جانە دە رەسەي فەدەراتسياسىنىڭ ىشكى ىستەر مينيسترلىگىنىڭ جاۋاپتارىمەن دالەلدەندى. سول سەبەپتى قالالىق پوليتسيا دەپارتامەنتىنىڭ ارەكەتى زاڭدى دەپ سوتپەن شەشىم قابىلداندى. سوت شەشىمى ءبىر ايدان سوڭ عانا كۇشىنە ەنەدى»،- دەدى سۋديا نۇرعالي يسمايلوۆ.

سۋديا ءتىپتى شەنەۋنىك پوچيۆالوۆتىڭ رەسەي فەدەراتسياسىنىڭ ازاماتتىعىن 2005 جىلى العانىن دا ايتتى.

ءسويتىپ، شىمكەنتتىك شەنەۋنىكتىڭ رەسەي ازاماتى ەكەنى دالەلدەنگەن بولاتىن. بىراق سوت شىعارعان شەشىمگە سەنبەي، ءالى دە قوس ازاماتتىق پايدالانعان شەندىنى اقتاپ جاتقاندار بار. ولاردىڭ اراسىندا ءبىر كەزدەگى داڭقتى اۋىر اتلەت يليا يلين دە بار.

يليا ءيليننىڭ ويىنشا، پوچيۆالوۆ قازاقستان ءۇشىن تاپتىرمايتىن مامان. سول ءۇشىن ونى ەلىمىزدە الىپ قالۋىمىز كەرەك ەكەن.

«مەن ولەگ پوچيۆالوۆتى قۇرمەتتەيمىن. مەنىڭ پىكىرىم – ەگەر بۇل ادام قوس ازاماتتىققا جابىسىپ قالعان بولسا، وندا ول قازىرگە دەيىن قازاقستاندا قالىپ جۇمىس ىستەمەي، باياعىدا-اق، سول ەلگە كەتىپ قالار ەدى.

سپورتتاعى جاقسى كادرلاردى (مامانداردى) ءوز ەلىمىزدە الىپ قالۋىمىز كەرەك. مەنىڭشە، ونداي ماماندار بىزدە ونسىز دا كوپ ەمەس. ەگەر، رەسەي ازاماتتىعى بولماي شىقسا، ونلا ولەگ پوچيۆالوۆقا سول وڭىردەگى سپورتتى دامىتۋ ءۇشىن جۇمىس جاساۋىنا قايتا مۇمكىندىك بەرىلۋى كەرەك», - دەپ جازىپتى يلين Instagram پاراقشاسىندا.

ول سونىمەن قاتار، «ولەگ پوچيۆالوۆ بەرىلمەيدى»، - دەپ، زاڭ بۇزعان شەندىگە اشىق قولداۋ ءبىلدىرىپ وتىر.

Abai.kz