رەسەيلىك قۇقىق قورعاۋشى ۇيىمدار - پەن-موسكۆا مەن «سۆوبودنوە سلوۆو» اسسوتسياتسياسى قازاق قالامگەرلەرىنىڭ تۇرمەدەگى ديسسيدەنت اقىن ارون اتابەككە اراشا سۇراعان ۇندەۋىن قولداپ، ونى قاماۋدان بوساتۋدى سۇراپ، قازاقستان پرەزيدەنتى قاسىم-جومارت توقاەۆقا قايرىلۋ جاسادى.

اتالعان مالىمدەمە پەن-موسكۆا مەن «سۆوبودنوە سلوۆو» اسسوتسياتسياسىنىڭ Facebook-تەگى رەسمي پاراقشاسىندا جاريالاندى. سونداي-اق، مالىمدەمە ءماتىنى Abai.kz پورتالىنىڭ رەداكتسياسىنا دا جولداندى.

وندا:

«پەن-موسكۆا مەن «سۆوبودنوە سلوۆو» اسسوتسياتسياسى قازاقستان جازۋشىلارىنىڭ كوپ جىلدان بەرى تۇرمەدە وتىرعان اقىن، ديسسيدەنت ارون اتابەكتى بوساتۋ تۋرالى ۇندەۋىنە قوسىلادى. بەلگىلى اقىن، ەسسەيتس، ويشىل، ءوز شىعارماشىلىعىندا قازاق حالقىنىڭ ۇلتتىق ءداستۇرىن كورسەتكەن، 68 جاستاعى ارون اتابەك 14 جىلدان بەرى قاماۋدا وتىر. ونىڭ تۇرمەدەگى جاعدايى اۋىر جانە كۆاليفيكاتسيالىق مەديتسينالىق كومەككە قولجەتىمسىز، جەكە كامەراعا دا توعىتىلعان.

2019 جىلى ەۋروپارلامەنت ارون اتابەكتى دەرەۋ بوساتۋ تۋرالى ارنايى رەزوليۋتسيا قابىلداعان. ءوز حالقىنىڭ ناعىز ۇلى، 1986 جىلعى جەلتوقسان كوتەرىلىسىنىڭ قاتىسۋشىسى جانە 1989 جىلدىڭ ساۋىرىندەگى كسرو حالىق دەپۋتاتتارىنىڭ 1 سيەزىنە قازاقستاننىڭ ەگەمەندىگى تۋرالى جانە ساياسي قۋدالاۋ كورگەندەردى دەرەۋ بوساتۋ تۋرالى حاتتى ۇيىمداستىرۋشى اقىن ارون اتابەك بوساتىلسىن!»، - دەپ جازىلعان . ۇندەۋ ماتىنىندە Abai.kz اقپاراتتىق پورتالىندا 2021 جىلدىڭ 24 اقپانىندا جاريالانعان ماتەريالدان ءۇزىندى كەلتىرىلگەن.

ايتا كەتەيىك، 24 اقپان كۇنى Abai.kz اقپاراتتىق پورتالىندا ۇلىقبەك ەسداۋلەت، ولجاس سۇلەيمەنوۆ، مۇرات اۋەزوۆ باستاعان ءبىر توپ زيالى قاۋىم وكىلدەرىنىڭ تۇرمەدەگى اقىن ارون اتابەككە اراشا سۇراپ، پرەزيدەنت قاسىم-جومارت توقاەۆقا جازعان اشىق حاتى جاريالاندى.

وندا:

«ارون اتابەك 2006 جىلعى ايگىلى «شاڭىراق» وقيعاسىن ۇيىمداستىردى، كىسى ولىمىنە سەبەپكەر بولدى» دەگەن جالعان جالامەن 18 جىلعا يتجەككەنگە ايدالىپ، سوتتالدى. قازاق ەلى تاريحىندا وزىندىك قولتاڭباسى بار، ياعني، «قازاق مەملەكەتى» ت.ب. بىرنەشە ۇيىمنىڭ جەتەكشىسى، اقىن، تۇركولوگ، جەلتوقسان كوتەرىلىسىنىڭ بەل ورتاسىندا ءجۇرىپ، بۇگىنگى تاۋەلسىزدىگىمىز ءۇشىن كۇرەسكەن باتىرىمىز ارون قابىشۇلى اتابەك اۋىر قىلمىس جاساعان قىلمىسكەرلەرگە ارنالعان تۇرمەدە وتىرعانىنا الداعى جىلى 15 جىل تولادى.

جان ازابى ءوز الدىنا، تۇرمەدەگى قيناۋ مەن ازاپتاۋدىڭ الۋان ءتۇرىن باسىنان كەشىرگەن ارون اتابەكتىڭ دەنساۋلىعى بىرنەشە جىلدان بەرى كۇرت ناشارلاپ كەتتى. جاسى 70-كە تاياعان قارتتىڭ ەكى قول مۇلدەم كوتەرىلمەيدى، جۇرەكتىڭ يشەميالىق اۋرۋى قان قىسىمى، بۇيرەك-وكپە، بۋىن اۋرۋلارىنا ت.ب. ومىرىنە قاۋىپ توندىرەتىن، تۇرمە جاعدايىندا ەمدەلۋگە كەلمەيتىن كەسەلدەرگە دۋشار بولدى.

«كوزىمنىڭ تىرىسىندە قادىرلە مەنى!.. ولگەسىن باسىما كوك تاس قويىپ، قۇرمەتتەپ كەرەك ەمەس!»، - دەگەن ەكەن ءبىر قارت نازالانىپ... سول ايتپاقشى، حالىق باتىرىن كوزى تىرىسىندە بوستاندىققا شىعارىپ، دەنساۋلىنىن تۇزەتۋگە جاعداي جاساساڭىز نۇر ۇستىنە نۇر بولار ەدى. «ەلىم-قازاعىم!»، - دەپ جانىن شۇبەرەككە تۇيگەن باتىرىمىزدان تاس زىنداندا ايىرىلىپ قالساق، ارىمىزعا سىن بولارى حاق! ۇرپاق الدىندا ۇياتتى بولمايىق، پرەزيدەنت مىرزا!»، - دەپ جازىلعان.

بۇل حاتقا ۇلىقبەك ەسداۋلەت، ولجاس سۇيلەيمەنوۆ، مۇرات اۋەزوۆ، باقىت بەدەلحان، امانتاي اسىلبەك، گۇلجان ەرعاليەۆا، ت.ايتباي ت.ب. بىرنەشە ادام قول قويعان.

Abai.kz