30 جىل بويى ءتىل مەن جەردى تالقىلاۋ - قاسىرەت
قازاقستاندا ءتىل ماسەلەسىن تالقىلاۋ - ءبىزدىڭ قاسىرەتىمىز، ۇلتتىڭ قاسىرەتى. شىندىعىندا، ۇلت بوپ قالىپتاسقان ەلدە مۇنداي ماسەلە تالقىلانباۋ كەرەك. بيلىگى ءورىستىلدى، بيلىگى حالىققا جاقىن ەمەس ەلدە ءتىل ماسەلەسى - كوكپار تارتىس سەكىلدى.
"جەر ساتىلادى، جەر ساتىلمايدى" دەگەن تاقىرىپتا ءسوز بولماۋعا ءتيىس. "جەر ساتىلمايتىن بولدى" دەپ قۋانۋ دا - ءبىزدىڭ قاسىرەتىمىز. سەبەبى، مۇنداي ماسەلە ەشقاشان تالقىلانباۋ كەرەك. مەنىڭ تۇسىنىگىمدە، ۇلت بوپ، مەملەكەت بوپ قالىپتاسقان ەلدە جەر ساتىلماۋ كەرەك، جەر ساتىلۋ تۋرالى ەشقاشان ءسوز بولماۋى كەرەك.
لاتىن ءالىپبيىنىڭ بىتپەيتىن "جىرى" دا شارشاتتى...
قوعامدا ەشقاشان تالقىلانباۋعا ءتيىس نارسەگە قانشا قارجى ءبولىپ، بوس مىلجىڭمەن قانشا جينالىس وتكىزدىڭدەر؟
قۇداي-اۋ، "قازاق ءتىلى" دەپ ءجۇرىپ، "قازاق ءتىلىن دامىتىپ جاتىرمىز" دەپ بيۋدجەتتىڭ قانشا اقشاسىن جەدىڭدەر؟
"جەر ساتىلادى، ساتىلمايدى" دەپ وسى كۇنگە دەيىن قانشا جيىن وتكىزدىڭدەر؟ وعان قانشا اقشا كەتتى؟
"قاتيرا تويعا جاڭا كويلەك الاتىن بولدى، جوق، قاتيرا تويعا بۇرىنعى كويلەگىن كيەتىن بولدى" دەگەن ايەلدەردەن سەندەردىڭ ايىرماشىلىقتارىڭ قالدى ما؟
قۇداي-اۋ، ەكونوميكانى، حالىقتىڭ الەۋمەتتىك تۇرمىسىن كوتەرسەڭدەرشى.
حالىقتى شارشاتىپ، قاجىتىپ جىبەردىڭدەر...
الدە ءبىز ءالى ۇلت بوپ، مەملەكەت بوپ قالىپتاسپادىق پا؟
ۇلت بوپ قالىپتاسساق مىنانداي باسسىزدىققا، وتىز جىل ەرتەگىسى بىتپەگەن، ديكتانتتان كوپ قاتە جىبەرەتىن وقۋشى كەيپىندەگى بيلىككە جول بەرمەۋشى ەدىك قوي.
اياگۇل مانتايدىڭ جازباسى
Abai.kz
