مەملەكەت باسشىسى قاسىم-جومارت توقاەۆ «كۋگار» اسكەري تىكۇشاعىنىڭ اپاتقا ۇشىراپ، بىرنەشە ادامنىڭ قازا بولۋىنا بايلانىستى تۇركيا پرەزيدەنتى رەجەپ تايپ ەردوعانعا قازاقستان حالقىنىڭ جانە جەكە ءوزىنىڭ اتىنان كوڭىل ايتۋ جەدەلحاتىن جولدادى.

«تۇركيانىڭ شىعىسىنداعى بينگيول ايماعىندا اپاتقا ۇشىراعان «كۋگار» اسكەري تىكۇشاعىندا قۇربان بولعان جانە زارداپ شەككەندەر تۋرالى اقپاراتتى تەرەڭ كۇيزەلىسپەن قابىل الدىم. وسىنداي اۋىر ساتتە قايعى-قاسىرەتتەرىڭىزگە ورتاقتاسىپ، بارشا قازاقستاندىقتاردىڭ جانە جەكە ءوز اتىمنان سىزگە، سونداي-اق، باۋىرلاس تۇرىك حالقىنا قايعىرا كوڭىل ايتامىن. اللا تاعالادان قازا بولعانداردىڭ جاندارى ءجانناتتا بولۋىن، جارالانعانداردىڭ تەز ارادا ساۋىعىپ كەتۋىن تىلەيمىن»، – دەپ جازىلعان جەدەلحاتتا.

ايتا كەتەيىك، تۇركيا شىعىسىندا اسكەري تىكۇشاق اپاتى بولىپ، 11 سارباز، ونىڭ ىشىندە ءبىر گەنەرال قازا تاپتى. تاعى ەكى ادام جاراقات العان. تىكۇشاق اپاتىنىڭ ءمان-جايىن تەرگەۋ باستالدى. اسكەري اقپارات كوزدەرىنە سايكەس، اپاتقا تەحنيكالىق اقاۋلار جانە اۋا رايىنىڭ قولايسىزدىعى سەبەپ بولۋى مۇمكىن.

Abai.kz