مەكتەپ ديرەكتورىنىڭ ۇستازدارعا جازعان حاتى
سوعىستان كەيىنگى جىلداردىڭ بىرىندە ءبىر مەكتەپ ديرەكتورى تومەندەگى حاتتى جازىپ، جۇمىسقا قابىلدانعان ءار مۇعالىمگە ءوز قولىمەن تاپسىرىپ وتىرعان ەكەن. بۇل حات جازىلعان ۋاقىت پەن بۇگىنگى كۇننىڭ اراسى الشاق بولسا دا حاتتا كوتەرىلگەن ماسەلە ەشقاشان ەسكىرمەيتىنى انىق.
قۇرمەتتى ۇستاز!
مەن قورقىنىشتى كونتسلاگەردە تۇتقىن بولىپ، ەشكىم كورمەۋى ءتيىس نارسەنى كوردىم جانە وعان شىدادىم.
ول جەردە مەن ءبىلىمدى عالىمدار مەن ينجەنەرلەردىڭ ادامداردى ءولتىرۋ ءۇشىن گاز پليتاسىن جوسپارلاپ، سالىپ جاتقانىن كوردىم.
ول جەردە دارىگەرلەردىڭ بالالاردى اۋرۋ-ساۋ دەپ سۇرىپتاپ، سول گاز پەشكە سالىپ جاتقانىن كوردىم.
ول جەردە مەدبيكەلەردىڭ جاڭا تۋعان سابيلەردىڭ قالاي ولتىرىلەتىنىن باقىلاپ وتىرعانىن كوردىم.
ول جەردە جەردە ۋنيۆەرسيتەت ءبىتىرىپ جۇمىس ىستەپ جۇرگەن ءبىلىمدى قانىشەرلەردىڭ ايەلدەر مەن بالالاردى اتىپ، ورتەپ جاتقانىن كوردىم.
سوندىقتان مەن سول كەزدەن باستاپ ادامدارعا ءبىلىم دەڭگەيىنە قاراپ سەنۋدەن، بىلىمىنە قاراپ باعالاۋدان باس تارتتىم.
مەن سىزدەن جالىنىپ وتىنەمىن. سىزدەن وقۋشىلارىڭىزدىڭ ادام بولىپ قالىپتاسۋىنا كومەكتەسۋىڭىزدى قايتا-قايتا جالىنىپ وتىنەمىن.
ءسىزدىڭ كۇش-جىگەرىڭىز ەشقاشان قۇبىجىقتاردىڭ، ءبىلىمدى اڭداردىڭ، پارانويدتىق مامانداردىڭ، انت بەرىپ، دىننەن بەزگەندەردىڭ، پارانويدتىق دارىگەرلەردىڭ، مەدبيكەلەردىڭ جانە ءبىلىمدى اۋىتقۋشىلاردىڭ پايدا بولۋىنا جول بەرمەۋگە ءتيىس.
ءسىزدىڭ ۇيرەتەتىن وقۋ، جازۋ جانە ماتەماتيكا ساباقتارى تەك ماعىنالى، ءماندى جانە پايدالى بولىپ، وقۋشىلارىڭىزدى ادامگەرشىلىككە تاربيەلەۋگە عانا كومەكتەسسە ەكەن دەپ شىن جۇرەكتەن تىلەيمىن.
جاسىراتىنى جوق، قازىرگى زامان، سونداي-اق ءبىزدىڭ قوعامىمىز جوعارى تەحنولوگيالاردىڭ دامۋى ارقىلى ماتەريالدىق زاتتاردى باعالاپ، ادامگەرشىلىككە نەمقۇرايلى قاراپ، بالا تاربيەسىنە ونشا ءمان بەرمەۋدە.
ەڭ بولماعاندا، بالالار مەكتەپكە بارار جولىندا دىرىلدەپ، توڭىپ تۇرعان كىشكەنتاي كۇشىكتى كورىپ، سيپاپ بولسا دا اياۋشىلىق ءبىلدىرۋدى بىلمەيتىن بوس قۋىسقا تولى، اسا سۋىق قوعامدا ءومىر ءسۇرىپ جاتقانىمىز وتە وكىنىشتى...
ەندەشە ءبىز-ەرەسەكتەر، ەڭ جامان زۇلىمدىقتى حايۋانعا تەڭەيتىن بولساق تا، حايۋاندار دا ءبىر-ءبىرىن جاقسى كورە الاتىنىن بىلە تۇرىپ، ادامعا جەتىسپەي جاتقان سول ماحاببات دەپ اتالاتىن ۇلى ۇعىمدى بالالارىمىزدىڭ بويىنا سىڭىرۋگە تىرىساتىن كەزىمىز ءدال وسى ۋاقىت ەكەنىن تۇسىنە بىلەيىكشى....
امانتاي تويشىبايۇلى
Abai.kz
