رەسپۋبليكالىق، وبلىستىق باسپاسوزدەن زارقىن تايشىباي (سۋرەتتە) دەپ قول قويعان ويى قۇنارلى، ءتىلى ءنارلى ماقالالاردى وقىپ جۇرەمىز. راديودان، تەلەديداردان سويلەسە، ابىزداي اقىلمان، ءار ءسوزى مەن پىكىرى ورنىقتى. سوڭعى 3-4 جىلدىڭ مۇعدارىندا عالامتورداعى «اباي» پورتالىنا ماڭىزدى-ماڭىزدى ونشاقتى ماقالاسى شىعىپ، تارادى. اباي شىعارماشىلىعىنا ارنالعان «ابايدىڭ ارشىنىنا تولعان ات قانداي؟»، «اباي ماقتاعان قۇس قانداي؟»، «ابايدىڭ ناعاشىلارى مەن قايىن جۇرتى» دەگەن ماقالالاردى وقىعان كوزى اشىق زيالى قاۋىمنىڭ بەي-جاي قالماعانىنا سەنىمدىمىن. پوەزيانىڭ اسىل جاۋھارىن الىستان تانىپ، سول قازىنانى بەلدەن قازۋدىڭ جاقسى ۇلگىسى وسىنداي-اق بولار. اباي اقىندى، دانىشپاندى ءبىر كىسىدەي بىلەتىن سياقتى بولامىز، بىراق پروفەسسور تايشىبايدىڭ مىنا زەرتتەۋلەرى مۇلدە تىڭ باستاما، بۇرىن ايتىلماعان ءسوز ەكەنىنە تالاي تانىسىم تاڭ قالىپ، تاڭداي قاققاندا، ءوزىم دە شاتتانىپ، سالتانات كۇيىنە ەنەمىن، شوقتىعىم بيىكتەپ ءوسىپ قالامىن. كەيىنگى كەزدە قازاقتىڭ باسىن قوسىپ ەل قىلعان، ارۋاعىڭنان اينالايىن ابىلاي تۋرالى قالىڭدىعى كەرە قارىس، كەسەك-كەسەك كىتاپتارىمەن ءدۇيىم جۇرتتى دۇرلىكتىرگەنىن كورگەندە، «يا، اللا، دەنىنە ساۋلىق بەرىپ، ءتىل كوزدەن ساقتاي گور، ۇستازىمدى» دەپ، جاراتۋشىدان تىلەك تىلەگەنىمدى دە جاسىرمايمىن. ءيا، زاقاڭ ءوزى ايتقانداي «ابىلايدى اڭىزدان اراشالاپ العان» زەرتتەۋشى. ەگەر ءسىز، قۇرمەتتى وقىرمان، زارقىن تايشىبايدىڭ ابىلاي حان جونىندە جارىق كورگەن ەڭبەكتەرىن وقىساڭىز وسىنداي پىكىرگە كەلەرىڭىز حاق.

رەسپۋبليكالىق، وبلىستىق باسپاسوزدەن زارقىن تايشىباي (سۋرەتتە) دەپ قول قويعان ويى قۇنارلى، ءتىلى ءنارلى ماقالالاردى وقىپ جۇرەمىز. راديودان، تەلەديداردان سويلەسە، ابىزداي اقىلمان، ءار ءسوزى مەن پىكىرى ورنىقتى. سوڭعى 3-4 جىلدىڭ مۇعدارىندا عالامتورداعى «اباي» پورتالىنا ماڭىزدى-ماڭىزدى ونشاقتى ماقالاسى شىعىپ، تارادى. اباي شىعارماشىلىعىنا ارنالعان «ابايدىڭ ارشىنىنا تولعان ات قانداي؟»، «اباي ماقتاعان قۇس قانداي؟»، «ابايدىڭ ناعاشىلارى مەن قايىن جۇرتى» دەگەن ماقالالاردى وقىعان كوزى اشىق زيالى قاۋىمنىڭ بەي-جاي قالماعانىنا سەنىمدىمىن. پوەزيانىڭ اسىل جاۋھارىن الىستان تانىپ، سول قازىنانى بەلدەن قازۋدىڭ جاقسى ۇلگىسى وسىنداي-اق بولار. اباي اقىندى، دانىشپاندى ءبىر كىسىدەي بىلەتىن سياقتى بولامىز، بىراق پروفەسسور تايشىبايدىڭ مىنا زەرتتەۋلەرى مۇلدە تىڭ باستاما، بۇرىن ايتىلماعان ءسوز ەكەنىنە تالاي تانىسىم تاڭ قالىپ، تاڭداي قاققاندا، ءوزىم دە شاتتانىپ، سالتانات كۇيىنە ەنەمىن، شوقتىعىم بيىكتەپ ءوسىپ قالامىن. كەيىنگى كەزدە قازاقتىڭ باسىن قوسىپ ەل قىلعان، ارۋاعىڭنان اينالايىن ابىلاي تۋرالى قالىڭدىعى كەرە قارىس، كەسەك-كەسەك كىتاپتارىمەن ءدۇيىم جۇرتتى دۇرلىكتىرگەنىن كورگەندە، «يا، اللا، دەنىنە ساۋلىق بەرىپ، ءتىل كوزدەن ساقتاي گور، ۇستازىمدى» دەپ، جاراتۋشىدان تىلەك تىلەگەنىمدى دە جاسىرمايمىن. ءيا، زاقاڭ ءوزى ايتقانداي «ابىلايدى اڭىزدان اراشالاپ العان» زەرتتەۋشى. ەگەر ءسىز، قۇرمەتتى وقىرمان، زارقىن تايشىبايدىڭ ابىلاي حان جونىندە جارىق كورگەن ەڭبەكتەرىن وقىساڭىز وسىنداي پىكىرگە كەلەرىڭىز حاق. قازاق حالقى ءۇشىن ۇلى سىن بولعان ون سەگىزىنشى عاسىردى تولايىم تانىپ ءبىلۋ ءۇشىن ابىلاي حان ءومىر سۇرگەن ءداۋىردى قامتيتىن رەسەي مۇراعاتتارىندا قاتتالعان دەرەكتەردى قوتارا قاراپ، قوپارىپ اقتارىپ شىققان زەرتتەۋشى زارقىن تايشىبايدىكى شىنىندا دا ۇلكەن رۋحاني ەرلىك دەر ەدىم. وسى ورايدا تاريح عىلىمىنىڭ دوكتورى، كورنەكتى عالىم جامبىل ارتىقباەۆ اعامنىڭ ماعان ايتقان ءبىر اڭگىمەسى ەسكە تۇسەدى: «رەسەيدىڭ مۇراعاتتارىن شامام كەلگەنشە اقتارىپ، قاراپ ءجۇرمىن. قازاق تاريحىنا بايلانىستى شاڭ باسقان قانشاما قۇجاتتارعا ءۇڭىلۋدىڭ ءساتى ءتۇستى. سوندا سول قۇجاتتاردىڭ دەنىنە العاش رەت زاقاڭنىڭ عانا قولى تيگەنىنىڭ كۋاسى بولدىم. ويتكەنى ولاردىڭ بارلىعىندا «تانىستىم، زارقىن تايشىباي» دەگەن جالعىز قول تۇرادى. زاقاڭ زەرتتەپ كەتكەن سول قۇجاتتاردا ءتىپتى، قازىرگى ءمۇيىزى قاراعايداي تاريحشى دوكتارلاردىڭ قولى جوق» دەگەنى بار ەدى.

وسىنداي جاراتىلىسىنان تازا نيەتتى، وي ءورىسى اۋقىمدى عۇلاما عالىمدى، دالاداي دارحان ۇلكەن جۇرەكتى ۇلاعاتتى ۇستازدى قاراعاندىلىق ءبىر توپ جاستار رۋحاني اكەمىز رەتىندە قادىر تۇتىپ، قاسىنا ەرىپ، ۇلگى الىپ وستىك.

زارقىن تايشىبايدىڭ قالام سىلتەسىنەن، شەشەندىگىنەن، ايتقىشتىق ءسوز تاپقىرلىعىنان ورنەك الدىق.

وسى ارادا مەن پروفەسسوردىڭ اباي تۋرالى سالماقتى دا ساليقالى «اباي جانە ءباسپاسوز» جانە «ابايتانۋ ارناسىندا» دەپ اتالاتىن ەكى مونوگرافياسى تۋرالى قىسقاشا ايتا كەتكىم كەلەدى. بۇل ەڭبەكتەردىڭ قالاي جازىلعانىنا ءوزىم كۋادۇرمىن.

...ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىندە بىرگە قىزمەتتەسپىز. زاقاڭ جۋرناليستيكا كافەدراسىنىڭ مەڭگەرۋشىسى، مەن جاستار ءىسى جونىندەگى كوميتەتتىڭ جەتەكشىسىمىن. اقىل-كەڭەستىڭ كەنى، جاستارعا قامقور، ءسوزى دە، ءىسى دە ۇلگى. ءبىلىمى تەرەڭ، كورگەن-تۇيگەنى كوپ ەكەنىنە قانىقپىن. ءبىر كۇنى ماعان الماتىعا بارىپ كەلگەنىن ايتتى. «ءۇش جۇمىس اپاردىم. بىرەۋى ورتالىق قازاقستانداعى انشىلىك ءداستۇردىڭ رۋحاني ونەگەسى، بۇل - فيلوسوفيا بولادى، ەكىنشىسى - كورنەكتى الاش قايراتكەرى، قازاقتىڭ تۇڭعىش زاڭ ماگيسترى جاقىپ اقباەۆ تۋرالى زەرتتەۋ، بۇل - تاريح، بالكىم زاڭ عىلىمى بولار، ال ولاردان باسقاسى ابايدىڭ كوزى تىرىسىندە تاسقا باسىلعان شىعارمالارى، ۇلى اقىننىڭ رۋحاني قاينارلارى. ۇشەۋى دە كانديداتتىققا تاتۋشى ەدى، پروفەسسور رىمعالي نۇرعاليەۆ اباي تۋرالى ەڭبەكتى تاڭدادى، ءوزى جەتەكشى بولاتىن بولدى، ەكى ايعا جەتپەي قورعاۋعا ءتيىسپىن»، دەدى. باسقا ەشكىم بىلمەيدى ەكەن. سول بەتتە قارمۋ باسپاسىنان «اباي جانە ءباسپاسوز» دەگەن مونوگرافياسىن شىعارتىپ الدى. ياعني، قورعاماي تۇرىپ، ديسسەرتاتسيالىق كەڭەس مۇشەلەرىنە عىلىمي ەڭبەگىن تاراتىپ قويماق.

تەگىندە، الدىن-الا بۇكىل ديسسەرتاتسياسىن جاريا ەتۋ دەگەنىڭىز تاجىريبەدە جوق. ءتىپتى، بىرەۋلەر مۇنى قاۋىپ كورەدى. سول جاعىن ەسكەرتىپ كورىپ ەدىم، «ەشتەڭە ەتپەس، بۇيىرعانى بولادى، وسىندايدى مەن باستاپ كورەيىن، تاۋەكەل، ەڭبەگىم ادال، تازا عىلىم»، دەدى. ءوزىم كۋا، زاقاڭنىڭ ديسسەرتاتسيا دايىنداعانىن ەشكىم بىلمەيدى.

Cول كۇن دە جەتتى. ءال-فارابي اتىنداعى قازاق ۇلتتىق ۋنيۆەرسيتەتىندەگى قازاق ادەبيەتىنەن دوكتورلىق ديسسەرتاتسيا قورعايتىن كەڭەستىڭ مىنبەرىندە -- ءوزىمىزدىڭ زارقىن تايشىباي اعامىز. زاقاڭ، قولىندا ءبىر جاپىراق قاعاز جوق، ەركىن كوسىلىپ سويلەپ تۇر. اندا-ساندا قولىن سەرمەپ قويا ما قالاي؟ توردە قازاقتىڭ ماڭدايىنا بىتكەن وڭشەڭ مارقاسقالارى. اكادەميكتەر زاكي احمەتوۆ، زەينوللا قابدولوۆ، تۇرسىنبەك كاكىشەۆ باستاعان جيىرماعا جۋىق پروفەسسور. بايىپپەن كوز تاستاپ، سىناي قاراپ  رىمعالي نۇرعاليەۆ وتىر. ديسسەرتاتسيا قورعاۋ دەگەندى بىلايعى جۇرت «قيامەت-قايىم»، اڭىزداعى «سيارات كوپىرىنەن» وتكەندەي، قاتال سىن دەيتىن ەدى عوي. ال، ءبىزدىڭ زاقاڭ، بەتى اشىق، زالعا تۋرا قاراپ، ابايدىڭ ولەڭدەرى مەن قارا سوزىنەن  ۇزىندىلەردى جاتقا ايتىپ، جەلە جورتىپ بارىپ، تىنىس تاپقانداي بولدى. قالتاسىنان ورامالىن الىپ، تەرشىگەن ماڭدايىن ءسۇرتتى. «سۇراققا جاۋاپ بەرۋگە دايىنمىن» دەگەندەي، تاناۋى دەلديىپ، تىپىرشىپ تۇر. مەن قوبالجىپ وتىرمىن...

-  «اباي ورىس وتارشىلىعىنا قارسى ءبىر اۋىز ءسوز ايتپاعان، بۇعان قالاي قارايسىز؟» العاشقى سۇراق وسى ەكەنىن ۇمىتپاپپىن. شىنىندا، ورىندى سۇراق سياقتى.

-  نەگە ايتپاسىن. ءبىرىنشى ايتقان اباي شىعار. بىراق، ابايەكەڭ ءبىز سياقتى ءجالاڭتوس ەمەس قوي. «سەن توقتات، بىزگە تاۋەلسىزدىك بەر!» دەيتىن. نەمەسە، «ال، تاۋەلسىزدىك ءۇشىن كۇرەسەيىك!» دەپ قىننان قىلىش سۋىرىپ، اتوي سالاتىن. اباي تەرەڭ. 19-عاسىردا تاۋدان قۇلاعان قالىڭ سەلدەي قاپتاپ كەلە جاتقان ورىس وتارشىلدىعى تاسقىنىنا كۇرەك ۇستاپ قارسى شىقپايدى عوي. سوندىقتان، قازاق قانداستارىن اۋەلى، عىلىم-بىلىمگە، رۋحاني بايلىق پەن بەكەمدىككە شاقىردى. اۋەلى، «ادام بولايىق!» دەدى، كوزىمىزدى اشىپ جان-جاققا كوكىرەكتەگى سانالى ويمەن قاراي بىلەيىك، دەدى. اقىن سوزدەرىنەن مىسالدار كەلتىرىپ، توگىپ-توگىپ جىبەردى. دالەلدەرى مىقتى. «25-قارا سوزىندەگى «ورىستىڭ ءتىلىن ءبىل، ءتىلىن بىلسەڭ... داعۋاسىنا كىرەسىڭ، ءسويتىپ ونىڭ ورىنسىز زاڭ-زاكونىن تانيسىڭ، قورلىق-زورلىعىنا، كونبەيسىڭ...» دەگەن جوق پا، مىنە وتارشىلدىققا ناعىز قارسىلىق دەگەن وسى بولسا كەرەك، دەپ بارىپ توقتاعاندا، اكادەميك زاكي احمەتوۆ:

-  پالى، ءسوز-اق!- دەپ قالدى.- كوبىمىز ابايدىڭ وسى جاعىن ەسكەرمەي ءجۇرمىز-اۋ! وسىنى ايتۋ كەرەك قوي، - دەپ، اقجارقىن ادەتىنشە، بالاشا قۋانىپ، قارقىلداپ، كۇلىپ جىبەردى. قاتتى رازى بولدى.

قويشى، ايتەۋىر، زال ەكى جارىم ساعاتتاي گۋىلدەدى. زاقاڭ مۇدىرمەيدى. قولتىعى جاڭا قىزا باستاعان تۇلپارداي كورىندى ماعان. جالعىز ماعان عانا ەمەس، باسقالار دا شىن پەيىلمەن ماساتتاندى. جانارلارىنان زاقاڭا دەگەن مەيىر شۋاعىن بايقادىم.

ءبىر كەزدە، جيىندى باسقارىپ وتىرعان زەينوللا قابدولوۆ ورنىنان كوتەرىلىپ:

- پروفەسسور مىرزالار! وسىمەن باس-اياعىن جيناقتاساق قايتەدى؟ ەندىگى بىلمەيتىندەرىڭدى مىنا تايشىبايدان وزدەرىڭ سۇراپ الارسىڭدار دەپ، جەڭىل ازىلمەن ۇسىنىس تاستادى. پروفەسسور تەمىربەك قوجاكەەۆ، زاقاڭنىڭ جاسى ەلۋدەن اسىپ بارا جاتقانىن بىلەدى ەكەن، تاماعى قىرىلداڭقىراپ:

- بۇل تايشىباەۆ باياعىدا-اق دوكتور بولاتىن ەدى، وسىندا اسپيرانتۋرا ءبىتىردى، بەكحوجين دەگەن جەتەكشى  اكەسى ءولىپ قالىپ، سەميا جاعدايىمەن اۋىلدا قالىپ قويدى. ۇمىتپاسام، تاقىرىبى رەۆوليۋتسياعا دەيىنگى قازاق ءباسپاسوزىنىڭ تاريحى بولاتىن. ءاليحان، احمەتتەرگە، الاشوردا كوسەمدەرىنە سوقپاي وتە المايدى، ول كەزدە مۇنداي تاقىرىپقا جول جوق، قيىن ەدى عوي،- دەدى دە:

- ءوي، سەن ءوزىڭ الپىسقا اياق باسىپسىڭ عوي! مىنا تاقىرىبىڭ قۇندى ەكەن، سودان بەرى قايدا جۇرگەنسىڭ؟- دەپ قويىپ قالعانى. سوندا زاقاڭ:

- ابايعا سوقتىعۋ ءۇشىن ءپىسۋىم كەرەك بولدى، سوعان بوگەلدىم دەپ، قىسىلماي، سابىرمەن ءتىل قاتتى. مۇنىسى، راس. شىنىندا، ابىلاي، اباي، شاكارىم، ءماشھۇر ءجۇسىپ سياقتى الىپتار تۋرالى ءسوزدى الپىستان بەرگىلەر ايتىپ جاتقانىنا، ولاردىڭ جازعان-سىزعاندارىنىڭ كوپشىلىگىنە ءوزىم دە سەنبەيمىن. كىتاپ كوشىرىپ، ىلگەرى-كەيىنگىلەردىڭ پىكىرلەرىن ساپىرىپ، جاڭعىرتا قايتالاۋ - عىلىم ەمەس قوي.

ال، مەنىڭ كەيىپكەرىم زارقىن تايشىبايدىڭ ناعىز وقىمىستى ەكەنىن سوندا تانىدىم. عىلىمي جەتەكشىسى ارداقتى اعامىز، مارقۇم رىمعالي نۇرعاليەۆ ءسوز بەرىلسە دە قوزعالعان جوق. «وزدەرىڭىز تىڭداپ، ءبىلىپ وتىرسىزدىر عوي» دەگەن باياۋ عانا. سول رىمعالي اعامىز، كەيىن زاقاڭنىڭ عالىمدىعى تۋرالى ايتقان ءبىر سوزىندە: «باياعىدا «اباي تۋرالى جازعانىم بار ەدى» دەپ ءبىر قارا جىگىت كەلىپ تۇر. بەتىنە قاراپپىن. «مىناۋ شالا ەستى، شالىق ۇرعان بىرەۋ شىعار، ءارىسى مۇحتار اۋەزوۆ پەن بەرىسى مەكەمتاس مىرزاحمەتوۆتان نە قالىپ ەدى، نەمەسە تىڭدى جارىپ تۋعان دانىشپان بولار» دەپ، كۇدىكتەنگەنمىن. عالىم زەرتتەۋشى ەكەن، بۇل زارقىن، سوعان كوزىم انىق جەتتى» دەگەن سوزدەرىن مەنەن باسقا دا تالاي ادام ەستىدىك.

جوعارىدا ءوزىم كۋا بولعان، جالعىز مەن ەمەس، ابزال اعالار شوعىرى كۋا بولعان،  دانداي ىسقاقوۆ حاتشىلىق ەتكەن، سول ديسسەرتاتسيالىق كەڭەستەن العان اسەرىمدى جىلدار وتكەن سوڭ  حاتقا ءتۇسىرۋىمنىڭ ءجونى ەندى كەلىپ وتىر. سەبەبى تاياۋدا پروفەسسور زارقىن تايشىباي جەتپىس جاسقا تولادى.

ءبارىن بىلەمىن. اعامىزدىڭ ءومىر جولى، عىلىمعا كەلۋى تاقتايداي بولعان جوق. قاسىم اقىن ايتقانداي: «ارپالىس الا قۇيىن زامانالار، الدىمنان تۇرىپ الدى، مەن نە ەتەرمىن» دەپ بارماعىن شايناپ وتكەن ارىستاردىڭ قاتارىندا، كەڭسە قىزمەتى، بالا-شاعا قامىمەن ءجۇرىپ قالعان.

زارقىن تايشىباي ۇلت تاريحىن قاتتى قاستەرلەپ، تاريحتى تەرەڭ قازىپ كەلە جاتقان قاجىرلى زەرتتەۋشى. ونىڭ ماعجان ءومىرى تۋرالى جازعان عىلىمي ەڭبەگى قازاق توپىراعىندا تۋعان وزىق ونەگە دەسەم، بىلەتىندەر داۋ ايتا قويماس. بۇل ماعجان سىندى كۇرەسكەر، قايراتكەر ءارى سىرشىل دا سىنشىل اقىننىڭ ءومىرىن قازا زەرتتەپ، ارحيۆ دەرەكتەرىمەن شەگەندەگەن تۋىندى. قازاق زيالىلارىنىڭ باسىنان كەشكەن تاۋقىمەتتى قارا سوزبەن قايىستىرا جىرلاعان ءومىر داستانىنداي وقىلادى. تەك، ءبىر وكىنىشتىسى، قيىردا جاتقان عالىمنىڭ «ماعجاننىڭ قىزىلجارى» دەگەن اتپەن، ەكى مىڭ دانا عانا بولىپ 2007 شىققان عاجايىپ كىتابى وسى ۋاقىتقا دەيىن لايىقتى باعاسىن العان جوق. وسىنداعى «ماعجان ءومىرى مەن شىعارماشىلىعىنىڭ ەلەۋلى كەزەڭدەرى» دەگەن انىقتامالىقتىڭ ءوزى جەكە مونوگرافيانىڭ جۇگىن كوتەرىپ تۇر.

ماقالانىڭ باستاۋىندا مەن پروفەسسور تايشىبايدى «رۋحاني اكەمىز» دەپ قالدىم. ول، سونىمەن قاتار، ونەر زەرتتەۋشىسى. اۋىز تولتىرىپ ايتارلىقتاي ەڭبەكتەر بەردى. ورتالىق قازاقستاننىڭ ءان-كۇيلەرىن، ورىنداۋشىلىق ءداستۇردى تالداعان «التىن بەسىك ءان-وردا» كىتابى ەرتەرەكتە، پروفەسسور شامعون قاجىعاليەۆتىڭ العىسوزىمەن شىققان. زاقاڭ بىردە: «ءماديدىڭ اندەرىندە تاتتىمبەت كۇيلەرىنىڭ سارىنى بار» دەگەندە، شامعون اعامىز: «مەن وسىنى اڭعارماپپىن»، - دەپ تاڭدانا قۇپتاعانىن ەستىگەنبىز. كەيىن زەر سالا، تىڭداپ كورسەك، شىنىندا، سولاي ەكەن.

قاتار جۇرگەن ءانشى-كۇيشى زامانداستارىم ايتادى: «زاقاڭنىڭ حالىق مۋزىكاسى، ورىنداۋشىلىق ونەر تۋرالى جازعاندارىن وقىعاندا، كوز الدىڭا قوبىزى مەن دومبىراسىن وڭگەرىپ وتىرعان ونەرلى قازاق كەلەدى، قۇلاعىڭا شەرلى كۇي مەن اسەم ءان كەلەدى. ساز دىبىستارى مەن اۋەندەرىن دە قارا سوزبەن كەستەلەۋگە بولادى ەكەن»،  دەيدى. مۇنداي قۇدىرەت، سەزىمتال جۇرەكتى، تالعامپاز ەستەتتىڭ عانا قولىنان كەلەرى حاق.

ۇستازىمىز زارقىن تايشىباي تۋرالى ايتپاعىمىز تالاي ماقالاعا جۇك بولار. ونىڭ ابىلاي حان تۋرالى جازعان ەڭبەكتەرىنە، سوڭعى شىققان «قازاقتىڭ حانى - ابىلاي» دەگەن قوس تومدىعىنا توقتالعان جوقپىن. تەك، ابىلاي حان تۋرالى بۇرىن-سوڭدى بولىپ كورمەگەن بۇل ىرگەلى ەڭبەكتىڭ اۆتوردىڭ جانكەشتى ەرلىگى ەكەنىن ايتقىم كەلەدى. باسقا دا تولىپ جاتقان ەڭبەكتەرىن، باسىن قوسىپ قايتا شىعارسا، كەمى 10-12 توم بولاتىنىن بىلەمىز. ولاردىڭ دا كەزەگى كەلەر.

بۇل كۇندە قىزىلجار شاھارىنداعى سولتۇستىك قازاقستان ۋنيۆەرسيتەتىندە جۋرناليستەر دايارلاپ، پروفەسسورلىق قىزمەت اتقارىپ جۇرگەن زارقىن تايشىباي، «قازاقستان ءبىلىم بەرۋ ءىسىنىڭ قۇرمەتتى قىزمەتكەرى»، «قازاقستاننىڭ قۇرمەتتى ءجۋرناليسى»، ومىراۋىندا احمەت بايتۇرسىنوۆ اتىنداعى مەدال. اتاق-ابىرويدان كەندە ەمەس. سونىڭ ىشىندە ەڭ قىمباتى - ول كوپشىلىك مويىنداعان ۇستاز. لايىم، امان ءجۇرىڭىز، ارداقتى ۇستاز.

«اباي-اقپارات»