الماتىدا ەپيدەميولوگيالىق جاعدايدىڭ ناشارلاۋىنا بايلانىستى كارانتين شارالارى كۇشەيتىلەدى. بۇل تۋرالى Tengrinews.kz مالىمدەدى.

سانيتارلىق - ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆانىڭ ايتۋىنشا، الماتىنىڭ سانيتار دارىگەرى جانداربەك بەكشيننىڭ جاڭا قاۋلىسى دايىندالىپ جاتىر ەكەن.

- كەز كەلگەن مەرەكەلىك ءىس-شارا دوستار مەن تانىستاردىڭ جاپپاي ارالاسۋىن بىلدىرەدى. وسىعان بايلانىستى سوڭعى مەرەكەلەر دە ەپيدجاعدايدىڭ ناشارلاۋىنا جانە ۆيرۋستى جۇقتىرۋ قاۋپىنىڭ ارتۋىنا ىقپال ەتتى.

الداعى مەرەكەلەردە، ناۋرىزدا، ادامدار جاپپاي سەرۋەنگە شىعادى. بىراق، وزدەرىڭىزگە بەلگىلى، بۇگىننەن باستاپ الماتى ەپيدجاعدايدى باعالاۋ ماتريتساسىنىڭ "قىزىل" ايماعىنا ءوتتى. سوندىقتان بۇرىنعىشا بۇل ءىس-شارالارعا تىيىم سالىنادى، - دەدى ول.

اسەل قالىقوۆا قالادا شەكتەۋ شارالارى كۇشەيتىلىپ، قوسىمشا كارانتين شارالارى ەنگىزىلەتىنىن ايتتى.

- جاقىن ارادا باس سانيتار دارىگەردىڭ شەكتەۋ شارالارىن كۇشەيتۋگە جانە كوروناۆيرۋستىڭ تارالۋىنا قارسى تۇرۋعا باعىتتالعان جاڭا قاۋلىسىنا قول قويىلادى. قۇجات دايىندالىپ، قوعام جانە بيزنەس وكىلدەرىمەن تالقىلانىپ جاتىر. كۇن سوڭىنا قاراي قاۋلىعا قول قويىلادى, - دەدى قالىقوۆا.

Abai.kz