24 اقپاندا «اباي kz» سايتىندا داڭقتى اتلەت، الەمنىڭ بىرنەشە دۇركىن چەمپيونى يليا ءيليننىڭ شىمكەنتتىك شەنەۋنىكتى جاقتاپ جازعان جازباسى جاريالانعان ەدى. سونىڭ جالعاسى رەتىندە جۋرناليستىك زەرتتەۋدى ۇسىنىپ وتىرمىز.

ەستەرىڭىزگە سالا كەتەيىك، بىلتىر جەلتوقسان ايىندا شىمكەنت قالاسى دەنە شىنىقتىرۋ جانە سپورت باسقارماسىنىڭ باسشىسى ولەگ پوچيۆالوۆتىڭ قوس ازاماتتىعى بارى جايىندا دەرەكتەر جاريالاندى. جاريالانعان مالىمەتتەرگە سايكەس، شىمكەنت قالاسىنىڭ اكىمدىگىندە باسشىلىق قىزمەتتە جۇرگەن مەملەكەتتىك قىزمەتشى – رەسەي ازاماتى ەكەن.

سول كەزدە باسقارمانىڭ ءباسپاسوز قىزمەتى پوچيۆالوۆقا قاتىستى تاراعان اقپاراتتى جوققا شىعارىپ، ونىڭ تەك قازاقستان ازاماتى ەكەنىن حابارلادى.

ارادا ءبىر جارىم اي ۋاقىت وتكەن سوڭ، شىمكەنت قالاسى پوليتسيا دەپارتامەنتىندەگىلەر قالالىق دەنە شىنىقتىرۋ جانە سپورت باسقارماسىنىڭ باسشىسى ولەگ پوچيۆالوۆتىڭ قوس ازاماتتىعى بارىن راستاپ، ونى قازاقستان ازاماتتىعىنان ايىرۋ جايتىن تىركەيدى.

وسى جاعدايدان كەيىن شىمكەنتتىك شەنەۋنىك بۇعان دەيىن وزىنە «قوس ەلدىڭ ازاماتتىعىن العان» دەپ ايىپ تاققان شىمكەنت قالاسىنىڭ كوشى-قون پوليتسياسىنىڭ اقپاراتىن جالعان دەپ جاريالاپ، سوتقا تالاپ ارىز تۇسىرەدى. ءتىپتى، باق وكىلدەرىنە ارناپ بريفينگ وتكىزىپ، «ەشقاشان رەسەي ازاماتتىعىن الماعانىن» مالىمدەيدى. سونداي-اق، سوت جۇمىسى اياقتالعانشا وعان قازاقستان ازاماتتىعى ۋاقىتشا قايتارىلعان ەدى. الايدا، ءال-فارابي اۋداندىق سوتىنىڭ سۋدياسى ونىڭ ارىزىن قاناعاتتاندىرعان جوق.

3 ناۋرىزدا قالا اكىمى وكىمىمەن باسقارما باسشىسى ولەگ پوچيۆالوۆتىڭ 25 اقپاندا قىزمەتىنەن بوساتىلعانى حابارلانادى. الايدا بۇل كەزدە پوچيۆالوۆ ەڭبەككە ۋاقىتشا جارامسىزدىق پاراعىمەن  جۇرگەن.

سونىمەن، شىمكەنت شەنەۋنىگى ولەگ پوچيۆالوۆتىڭ قوس ازاماتتىعى  جونىندەگى داۋ ءالى دە سايابىرسىعان جوق. ساۋەگەيلىك ايتۋدان  اۋلاقپىز، بىراق بۇل ماسەلەدە ءبىر بۇلىڭعىر دۇنيە جاتقان سەكىلدى. سونىمەن، باسىنان باستايىن.

الەۋمەتتىك جەلىلەردە  پوچيۆالوۆتىڭ رەسەي ازاماتتىعى بار ەكەن دەگەن حابار بۇرق ەتە قالدى دەدىك. شاماسى، بىرەۋ-مىرەۋ سول حاباردىڭ شىققانىن كۇتىپ جۇرسە كەرەك.  سول سول-اق ەكەن، شىمكەنت قالاسىنىڭ كوشى-قون پوليتسياسى ءبىزدىڭ كەيىپكەرىمىزدىڭ جاعاسىنا جارماسا باستايدى.  بەلگىسىز بىرەۋدەن بەلگىلى بىرەۋگە قويىرتپاق قۇجاتتاردىڭ كوشىرمەسى تىزبەكتەلىپ جەتىپ كەلەدى. ءبىر اۋىز سوزبەن ايتقاندا ولەگ پوچيۆالوۆتىڭ  قوس ازاماتتىعى بار دەلىنگەن وندا. ءدۇدامال قاعازداردى تياناقتى تەكسەرۋدىڭ ورنىنا، كوشى-قونداعى «جىگىتتەر» الاۋلاتىپ-جالاۋلاتىپ، ءبىزدىڭ كەيىپكەرىمىزدى قۇرباندىققا شالىپ جىبەرەدى.

ءىس ناسىرعا شاۋىپ، سوتقا دەيىن بارادى! البەتتە، قالالىق سپورت باسقارماسىنىڭ باسشىسى ار-نامىسىن قورعاپ، سوتقا شاعىمدانادى. بىراق، شىمكەنت قالاسىنىڭ ءال-فارابي اۋداندىق سوتى قابىلدانعان شەشىمى تۋرالى اقپاراتتى ءوز سايتىنا جەدەل شىعارىپ جىبەرەدى. قىسقاسى ازاماتتىڭ ارىزىن قابىلداۋدان باس تارتادى. ەندىگى ءبىر قىزىقتى قاراڭىز. بيىلعى جىلدىڭ 21 قاڭتارىندا قالالىق پوليتسيا دەپارتامەنتى كوشى-قون قىزمەتى باسقارماسىنىڭ باستىعى س.تۋگەلباەۆتىڭ قولى قويىلعان قاعازدى پوچيۆالوۆتىڭ قولىنا ۇستاتىپ جيبەرەدى. وندا ول رەسەي فەدەراتسياسى ازاماتتىعىن الۋى سەبەپتى 20 قاڭتاردان باستاپ قازاقستان رەسپۋبليكاسىنىڭ ازاماتتىعىن جوعالتقاندىعى تۋرالى جازبا تىركەلگەن. ياعني، پوچيۆالوۆ بۇدان بىلاي ءبىزدىڭ ەلىمىزدىڭ ازاماتى ەمەس دەگەن ءسوز. ەڭ سوراقىسى بۇدان ەشكىم ەشقانداي تۇسىنىك الۋعا دا تالپىنباعان. ارينە بۇل وقيعا شىمبايىنا باتقان پوچيۆالوۆ قازاقستان ازاماتى بولعانىن جانە بولىپ قالا بەرەتىنىن دە ايتىپ، ءباسپاسوز كونفەرەنتسياسىن شاقىرادى. ءسويتىپ ءوز ۇستانىمىن سوتتا دالەلدەگىسى كەلەدى. سول كۇنى ول شىمكەنت پوليتسياسى دەپارتامەنتىنىڭ ءىس-ارەكەتتەرى زاڭسىز دەپ، ءال-فارابي اۋداندىق سوتىنا شاعىمدانادى.

ادۆوكات ەۆگەني ياۆورسكيدىڭ پىكىرىنە جۇگىنەيىك:

– پوچيۆالوۆتىڭ قازاقستان ازاماتتىعىنان ايىرۋ تۋرالى شەشىمدى قابىلداۋعا نە تۇرتكى بولعانى تۇسىنىكسىز. ونىڭ قولىنا ۇستاتا قويعان حاباردىڭ نە باسى، نە اياعى جوق كادىمگى حات دەرسىز. ءتىپتى «ەسكەرتۋ» دەگەن ءسوز دە جوق. كوشى-قون پوليتسياسىنىڭ قىزمەتكەرلەرى سوتتا ولەگ پوچيۆالوۆتىڭ قوس ازاماتتىعى بار دەگەن ۇلتتىق قاۋىپسىزدىك كوميتەتىنىڭ الدە قانداي حاتىنا يەك ارتقان ەكەن. وندا قاۋىپسىزدىك قىزمەتكەرلەرى وسى ماسەلەنى تەكسەرۋ جونىندە ۇسىنىس بەرسە كەرەك. قايتالاپ ايتايىق، ازاماتتىعىنان ايىرۋ تۋرالى شەشىم شىعارۋدى ەمەس، تەكسەرۋدى وتىنگەن. پوچيۆالوۆتىڭ قورعاۋشىلارى ۇلتتىق قاۋىپسىزدىك كوميتەتىنە وسى ماسەلە تۋرالى سۇراۋ سالادى. ۇستىمىزدەگى جىلدىڭ 11 اقپانىندا مىنانداي جاۋاپ كەلەدى. قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى و.ۆ.پوچيۆالوۆتىڭ جانە ونىڭ وتباسى مۇشەلەرىنە ازاماتتىعىنا قاتىستى ماسەلە بويىنشا رەسەي فەدەراتسياسىنا ەشقانداي سۇراۋ سالعان ەمەس.

ياۆورسكي تاعى بىرقاتار تۇسىنىكسىز جانە بۇلىڭعىر قۇجاتتار توڭىرەگىندە وي قوزعايدى:

– مەن پوچيۆالوۆتىڭ ازاماتتىعىن ايىرۋ تۋرالى شەشىم قابىلداۋعا نەگىز بولعان رەسمي قۇجات تۋرالى سۇراق تۋىنداعان كەزدە، بىزگە رەسەي ىشكى ىستەر مينيسترلىگى كراسنوگورسك وكرۋگى بويىنشا باسقارما باستىعى پوليتسيا پولكوۆنيگى ن.جۋكوۆتىڭ قولى قويىلعان جاۋاپ كەلەدى. وندا ازاماتتىق تۋرالى ماسەلە كوتەرىلمەگەن. ول 22 قاڭتاردا جازىلعان. كوشى-قون پوليتسياسىنىڭ وكىلدەرى  جالعان قۇجاتتى سوتتا العا تارتىپ، ازاماتتىقتان ايىرۋ جونىندەگى 2021 جىلعى 20 قاڭتارداعى (ياعني ەكى كۇن بۇرىن!) №5 شەشىمىن شىعارادى.   وندا كوشى-قون پوليتسياسى ءبىرىنشى باسشىسىنىڭ بۇرىشتاماسى دا بار. ال ول بەلگىسىز ءبىر سەبەپتەرمەن بىزگە بەرىلگەن كوشىرمەدە جوق. قىسقاسى، پوچيۆالوۆتىڭ ازاماتتىعىنا قاتىستى سالىنعان سۇراۋعا نەگە ەكەنىن بەلگىسىز ونىڭ ايەلى مەن ۇلى تۋرالى دەرەكتەر كەلتىرىلەدى.

ارينە، وسىناۋ قۇجاتتار بىلىعىنا جول بەرگەن قالالىق كوشى-قون پوليتسياسىنىڭ قىزمەتكەرلەرىنە قاتىستى قر قىلمىستىق كودەكسىنىڭ 371 بابى (سالعىرتتىق) جانە 416 بابى (دالەلدەمەلەردى بۇرمالاۋ) بويىنشا ەكى قىلمىستىق ءىس قوزعالادى. شىمكەنت پروكۋراتۋراسى ءىستى قاراۋ بارىسىندا وعاشتىقتاردىڭ ورىن العانىن، مۇندا الدە قانداي قۋلىقتىڭ جاتقانىن، ماتەريالداردىڭ بۇرمالانعانىن انىقتايدى. ءسويتىپ، جالعان اقپار تاراتقانى ءۇشىن قىلمىستىق جاۋاپكەرشىلىكتى كوزدەيتىن ەكى باپ بويىنشا ءىس جۇرگىزىلۋدە. ادۆوكات سۋديادان رەسەيدىڭ كوشى-قون قىزمەتىنە ءوز كليەنتىنىڭ ازاماتتىعىن جوعالتۋعا نەگىز بولعان قۇجاتتارىنىڭ تۇپنۇسقالارىن ۇسىنۋدى سۇراپ، سۇراۋ سالادى. سوتقا ءتيىستى ءوتىنىش جىبەرىلەدى. بىراق سۋديا ادۆوكاتتىڭ ءوتىنىشىن قابىلداماي، ءتىپتى تۇسىنىك بەرۋدەن دە باس تارتادى. سوندا ادام تاعدىرى قويىرتپاق قۇجاتتاردىڭ كوشىرمەلەرى نەگىزىندە شەشىلۋگە ءتيىستى مە؟ ويتكەنى الگى ىستە ءمور سوعىلعان نەمەسە قولى قويىلعان بىردە ءبىر تۇپنۇسقا انىقتاما جوق. ءىستىڭ انىق-قانىعىن ودان ءارى ناقتىلاۋ ءۇشىن رەسەيدىڭ كوشى-قون قىزمەتىنە پوچيۆالوۆقا قاتىستى ءتيىستى سۇراۋ جىبەرىلەدى. ناقتى جاۋاپ رەسەي فەدەراتسياسى ىشكى ىستەر مينيسترلىگى كوشى-قون ماسەلەلەرى جونىندەگى باس باسقارمانىڭ بيىلعى 26 اقپانداعى №3/217703201256 جاۋاپ حاتى ادۆوكاتتىڭ قولىنا ءتيىپ تە ۇلگەرگەن.

ال وندا نە دەلىنگەن دەيسىز عوي؟

بۇل سۇراقتىڭ  جاۋابىن ولەگ پوچيۆالوۆ سوتقا اپپەلياتسيالىق شاعىم تۇسىرگەن سوڭ بەرەيىك.  بۇل وقيعاعا بالكىم سوندا عانا نۇكتە قويىلسا كەرەك.

عالىمجان مەلدەشوۆ

Abai.kz