قازىر ءبارى تۇيىققا تۇمسىعىمەن تىرەلدى. اتا-انانى ايتام. مەكتەپ، ول بولسا دا بولدىرىپ ارەڭ تۇر. ۋنيۆەر جايلى جاق اشپايمىز. گاپ وقۋ جۇيەسىندە بوپ تۇر. ءۇي مەن وقۋ ورىندارى بۇكىل كۇشتى بىلىمگە سالىپ-اق جاتىر. بىراق مودەرن زاماننىڭ عىلىمىن پىستە سياقتى شاعاتىن ۇرپاق جاتتانۋ (alienation, وتچۋجدەنيە) دەگەن دەرتكە دەمدە شالدىعادى. جاسى 14-15-كە جەتەر جەتپەستەن ءبىلىمدى بالامىز كىسىكيىك بوپ شىعا كەلەدى. داستۇردەن ماقۇرىم قالعان ولار كادىمگى كەنتاۆر بولات تا قالادى. اكە-شەشەسى ولاردى توي-تومالاققا ەرتىپ اپارا المايدى. ەشكىمگە جۇعىمى جوق، وزگە تۇگىلى ءوز وزىنە بوتەن بوپ كەتكەن كىسىكيىك بالا ابىرويىڭدى ايرانداي توگەدى. جانازادا ەل ساپقا تۇرىپ جاتسا، ول ءبىر شەتتە ساعىز شايناپ، رەپ تىڭداپ تۇرادى. نەگىزى ادامدى مۇنداي بيشارا جاعدايعا قۇلاتپاي ۇستاپ تۇراتىن اسا قىمباتتى ءبىر سوسلوۆيە بار بولاتىن. ولار - جىرشىلار!

جىرشىلار شەتكە ىعىسقان سايىن بالا-شاعا دا توزا بەرەدى. سەبەبى ادامنىڭ ەيگەنۆەلت دەپ اتالاتىن ىشكى الەمىن جىردىڭ مازمۇنى قالىپتاستىرادى. ال، جاستار جىر تىڭداعىسى كەلمەيدى. نەگە؟ سەبەبى جىردى جىر قىپ ۇستاپ تۇرعان مازمۇن - قۇران قيسسالارى! اتا-انالار قيسسادان بەيحابار. بولسا دا، ونىڭ ماڭىزى زور دەپ ويلامايدى. تەزىرەك ۇلىنىڭ ميىنا شەت ءتىلى مەن ماتەماتيكا قۇيعىسى كەپ اسىعىپ تۇرادى. بىراق بۇل ءبىلىم ەيگەنۆەلتكە بارمايدى. بالانىڭ وزەگى قۋىس بوپ قالادى. سوسىن وسە كەلە ىشتەي سولۋ باستالادى.

بالا جاستان قيسسا ەستىپ وسكەن بالا، جىردى ەش قينالماي تىڭداي بەرەدى. سەبەبى جىردىڭ بۇكىل مازمۇنى كوكىرەگىندە سايراپ تۇر. جىرشى كوسىلگەن سايىن ادامنىڭ تۇلا بويى سولقىلداپ، قانى قىزا باستايدى. مۇنداي سەزىمدى باستان كەشەتىن بالا جاتتانبايدى، كەرىسىنشە ەلدىڭ ۇيىتقىسىنا اينالادى. اۋلەتتىڭ قۇتى بوپ شىعا كەلەدى. سوندىقتان جىرشى كورسەڭىز تورگە شىعارۋعا دايىن ءجۇرىڭىز. ولار ەلدىڭ قۇنارى!

سانجار كەرىمبايدىڭ الەۋمەتتىك جەلىدەگى جازباسى

Abai.kz