قر ەڭبەك جانە حالىقتى الەۋمەتتىك قورعاۋ مينيسترلىگى ەاەو-عا مۇشە مەملەكەتتەر اراسىنداعى ەڭبەك كوشى-قونىن رەتتەۋ تۋرالى مالىمدەدى.

2021 جىلدىڭ 1 قاڭتارىنان باستاپ 2019 جىلعى 20 جەلتوقسانداعى ەۋرازيالىق ەكونوميكالىق وداققا (بۇدان ءارى – ەاەو) مۇشە مەملەكەتتەردىڭ ەڭبەكشىلەرىن زەينەتاقىمەن قامسىزداندىرۋ تۋرالى كەلىسىم كۇشىنە ەنگەن بولاتىن. ونىڭ شەڭبەرىندە مۇشە مەملەكەتتەردىڭ ازاماتتارى ەاەو-عا باسقا مۇشە مەملەكەتتەردە ەڭبەك قىزمەتىن جۇزەگە اسىرۋ بارىسىندا العان زەينەتاقى قۇقىقتارىن قالىپتاستىرۋ، ساقتاۋ جانە ىسكە اسىرۋ قۇقىعىن الدى.

بۇل كەلىسىم 2014 جىلعى 29 مامىرداعى ەاەو تۋرالى شارتتى تولىقتىرادى. ونىڭ شەڭبەرىندە ۇلتتىق ەڭبەك نارىقتارىن قورعاۋ جونىندەگى شەكتەۋلەردى ەسكەرمەي مۇشە مەملەكەتتەر ەڭبەكشىلەرىنىڭ ەركىن ورىن اۋىستىرۋىن قامتاماسىز ەتەتىن جانە جۇمىسقا ورنالاستىرۋشى مەملەكەتتە ەڭبەك قىزمەتىن جۇزەگە اسىرۋعا رۇقسات الۋدى تالاپ ەتپەيتىن بازالىق قاعيداتتار بەكىتىلگەن. جاسالعان جاعدايلار ەاەو-عا مۇشە مەملەكەتتەر اۋماعىنداعى ازاماتتاردىڭ ەڭبەك قىزمەتىن زاڭداستىرۋعا قوسىمشا ىنتالاندىرۋ بولىپ تابىلادى جانە ەاەو اۋماعىندا ەڭبەك رەسۋرستارىنىڭ بىرىڭعاي نارىعىن قالىپتاستىرۋعا كومەكتەسەدى.

قازىرگى ۋاقىتتا مۇشە مەملەكەتتەردىڭ ازاماتتارىنا جۇمىسقا رۇقسات الۋ ءۇشىن جۇمىسقا ورنالاستىرۋشى مەملەكەتتىڭ ءتىلىن، زاڭناماسىن جانە تاريحىن ءبىلۋ ەمتيحاندارىن تاپسىرۋدىڭ، سونداي-اق كوپتەگەن كاسىپتەر ءۇشىن ءبىلىم تۋرالى قۇجاتتاردى تانۋ بويىنشا قوسىمشا راسىمدەردى وتكىزۋدىڭ قاجەتى جوق.

بۇدان باسقا، قىزمەتكەرلەر ءۇشىن تەك ەڭبەك شارتى بويىنشا عانا ەمەس، ازاماتتىق-قۇقىقتىق شارت بويىنشا دا جۇمىس ىستەۋ مۇمكىندىگى قاراستىرىلعان، بۇل ولاردىڭ جۇمىسقا ورنالاسۋ اياسىن ايتارلىقتاي كەڭەيتەدى.

بۇل رەتتە جۇمىسقا ورنالاستىرۋشى مەملەكەتتىڭ اۋماعىندا ۋاقىتشا بولۋ مەرزىمى جۇمىس بەرۋشىمەن جاسالعان ەڭبەك نەمەسە ازاماتتىق-قۇقىقتىق شارتتىڭ قولدانىلۋ مەرزىمىمەن ايقىندالادى. جۇمىسقا ورنالاستىرۋشى مەملەكەتتىڭ اۋماعىنا كەلگەن كۇننەن باستاپ 90 تاۋلىك وتكەننەن كەيىن شارت مەرزىمىنەن بۇرىن بۇزىلعان جاعدايدا مۇشە مەملەكەتتىڭ ازاماتى 15 كۇن ىشىندە ەلدەن تىس جەرگە شىقپاي جاڭا شارتقا تۇرۋعا قۇقىلى.

مۇشە مەملەكەتتەر ەڭبەكشىلەرىنىڭ جالدانىپ ىستەگەن العاشقى كۇندەرىنەن باستاپ تابىستارىنا جۇمىسقا ورنالاستىرۋشى مەملەكەتتىڭ سالىق رەزيدەنتتەرى ءۇشىن كوزدەلگەن ستاۆكا بويىنشا سالىق سالىنادى. ەڭبەكشىلەردىڭ بالالارىنىڭ مەكتەپ جانە مەكتەپكە دەيىنگى ءبىلىم بەرۋ مەكەمەلەرىندە وقۋعا قۇقىعى بار. مۇشە مەملەكەتتەردىڭ ەڭبەكشىلەرىنە جانە ولاردىڭ وتباسى مۇشەلەرىنە تەگىن جەدەل جانە شۇعىل مەديتسينالىق كومەك الۋ قۇقىعى بەرىلدى.

ەاەو-عا مۇشە مەملەكەتتەر بولىپ تابىلمايتىن ءۇشىنشى ەلدەرگە قاتىستى قازاقستاندا كۆوتالاۋدىڭ ارنايى جۇيەسى جۇمىس ىستەيدى: قر ۇكىمەتى جىل سايىن وتاندىق ەڭبەك نارىعىنا تارتۋعا بولاتىن شەتەلدىك جۇمىس كۇشى بىرلىكتەرىنىڭ شەكتى سانىن بەلگىلەيدى. كۆوتا نەگىزىندە جەرگىلىكتى اتقارۋشى ورگاندار جۇمىس بەرۋشىلەرگە شەتەلدىكتەردى جۇمىسقا تارتۋعا رۇقسات بەرەدى. ەاەو-عا مۇشە مەملەكەتتەردىڭ ازاماتتارىنا قاتىستى مۇنداي تالاپتار كوزدەلمەيدى.

Abai.kz