قر ۇلتتىق قاۋىپسىزدىك كوميتەتىنىڭ توراعاسى كارىم ءماسىموۆتىڭ  «كەلەشەكتىڭ ءامىرشىسى جاساندى ينتەللەكت» اتتى كىتابى شىقتى.

كىتاپ جاساندى ينتەللەكت پەن جالپى تەحنولوگيالاردىڭ نەگىزگى دامۋ كەزەڭدەرىن اشاتىن 7 تاراۋدان تۇرادى. ءار تاراۋدا تاريحي فاكتىلەر، عالىمداردىڭ بولجامدارى جانە بولاشاقتىڭ مۇمكىندىكتەرى كورسەتىلىپتى.

ءماسىموۆتىڭ ايتۋىنشا، اتالعان كىتاپتى جازۋعا قازاقستاننىڭ ەكس-پرەزيدەنتى نۇرسۇلتان نازارباەۆ شابىتتاندىرعان.

- «قازاقستاننىڭ تۇڭعىش پرەزيدەنتى نۇرسۇلتان نازارباەۆ مەنى وسى كىتاپتى جازۋعا شابىتتاندىرىپ، ماڭىزدى ءرول اتقاردى:

2018 جىلدىڭ قازان ايىنداعى قازاقستان حالقىنا جولداۋىندا ول ءوز ءسوزىنىڭ باسىم بولىگىن قازاقستاندا جاساندى ينتەللەكتىنى ەنگىزۋ قاجەتتىلىگىنە ارنادى»,- دەپ جازادى اۆتور.

سونىمەن قاتار ول، نازارباەۆتىڭ 2018 جىلعى جەلتوقساندا 13 000-عا جۋىق تۇرعىنى بار شاعىن اكىمشىلىك ورتالىقتا ىسكە اسىرىلعان قازاقستانداعى العاشقى «اقىلدى قالا» پيلوتتىق جوباسى — «Smart Aqkol»-گە بارىپ قايتقانى ەرەكشە وي سالعانىن ايتادى.

ودان بولەك، اقكول قالاسىنىڭ جوعارى جىلدامدىقتاعى ينتەرنەتپەن «قامتىلعانى»، سونداي-اق عيماراتتار، قۇرىلىستار، جەر تۋرالى اقپاراتپەن قاتار، ينجەنەرلىك جانە ينفراقۇرىلىمدىق جەلىلەر تۋرالى اقپاراتى بار كوپقاباتتى تسيفرلىق كارتا قۇرىلعانى تۋرالى مالىمەتكە توقتالعان.

- «مەن وسى ەكسپەريمەنتتى ەلىمىزدىڭ بارلىق 17 ءىرى جانە 200-دەن اسا شاعىن قالالارىنا تاراتۋ قاجەت ەكەنىنە سەنىمدىمىن. بۇل بارلىق قازاقستاندىقتاردىڭ ءال-اۋقاتى ءۇشىن اسا پايدالى جانە جاساندى ينتەللەكت جۇيەلەرىن پايدالانۋدىڭ ۇلگىلى مىسالى بولار ەدى! بىراق جي اقىلدى قالالار قۇرىپ قانا قويماي، ودان دا زور مۇمكىندىكتەر ۇسىنادى», -دەيدى ءماسىموۆ.

ال، كىتاپ مۇقاباسىنداعى تۇپنۇسقا فوتوسۋرەتتە كارىم ءماسىموۆتىڭ اتا-بابالارى تۋعان اقسۋ جەرى كورسەتىلگەن.

ايتا كەتەيىك، كارىم ءماسىموۆتىڭ حالىقارالىق قۇقىق مامانى، ەكونوميكا عىلىمدارىنىڭ دوكتورى، ەكى مارتە پرەمەر-مينيستر, پرەزيدەنت اكىمشىلىگىنىڭ باسشىسى، ۇلتتىق قاۋىپسىزدىك كوميتەتىنىڭ توراعاسى، قازاقستاننىڭ جەكپە-جەك قاۋىمداستىعىنىڭ پرەزيدەنتى، ترياتلەت دەگەن لاۋازىمدارى بار.

Abai.kz