الماتىدا بەلگىلى جازۋشى، ادەبيەتتانۋشى، قازاق ادەبيەتىنىڭ كورنەكتى وكىلى گەرولد بەلگەرگە ەسكەرتكىش قويىلدى،- دەپ جازادى قازاقپارات.

ەسكەرتكىشتى سالتاناتتى تۇردە اشۋ شاراسىنا قازاقستاننىڭ مەملەكەتتىك حاتشىسى قىرىمبەك كوشەرباەۆ، مادەنيەت جانە سپورت ءمينيسترى اقتوتى رايىمقۇلوۆا، الماتى اكىمى باقىتجان ساعىنتاەۆ، ەلىمىزگە تانىمال اقىن، جازۋشىلار مەن زيالى قاۋىم وكىلدەرى قاتىستى.

قىرىمبەك كوشەرباەۆ قازاقستان پرەزيدەنتىنىڭ قۇتتىقتاۋ حاتىن وقىپ بەردى.

- «حالقىمىز «گەراعا» دەپ قۇرمەت تۇتقان گەرولد كارلوۆيچ سانالى عۇمىرىندا ۇلتىمىزدىڭ ادەبيەتى مەن مادەنيەتىن وركەندەتۋگە، قازاق ءتىلىنىڭ قارىشتاپ دامۋىنا ايرىقشا ۇلەس قوستى. بالا شاقتان دالا دەموكراتياسىن بويىنا ءسىڭىرىپ وسكەن قارىمدى قالامگەر ۇلت رۋحانياتىنداعى وتكىر دە وزەكتى ماسەلەلەردى دە ءاردايىم بۇكپەسىز ايتىپ، قوعامدا تالقىلاپ، ولاردى شەشۋ جولدارىن ۇسىنىپ وتىردى. ەڭ باستىسى، جازۋشى گەرولد بەلگەر ءوزىنىڭ ءومىرى مەن ونەرى ارقىلى بىرلىگى جاراسقان ءبىرتۇتاس قازاقستان حالقىن قالىپتاستىرۋ ىسىنە قالتقىسىز قىزمەت ەتتى»، - دەپ جازىلعان پرەزيدەنت قاسىم-جومارت توقاەۆ جولداعان حاتتا.

ەسكەرتكىش جامبىل مەن ش. ءۋاليحانوۆ كوشەلەرى قيىلىسىنىڭ سولتۇستىك بولىگىندەگى ساياباققا قويىلدى. جازۋشى وسى ماڭداعى ۇيدە تۇرعان جانە ۇنەمى وسى ساياباقتا جۇرگەندى ۇناتقان.

ايتا كەتەيىك، بەلگەر گەرولد رەسەيدىڭ ساراتوۆ وبلىسىندا 1934 جىلى 28 قازاندا دۇنيەگە كەلگەن.

1941 جىلى ءستاليننىڭ جارلىعىمەن كسسر-داعى بارلىق نەمىستەرمەن بىرگە قازاقستانعا، قازاق اۋىلىنا (سقو-نىڭ ىسقاق ىبىراەۆ اۋىلى) جەر اۋدارىلدى. بۇل جەردە جاس گەرولد قازاق ءتىلىن ۇيرەنەدى. قازىرگى سولتۇستىك قازاقستان وبلىسى شالاقىن اۋىلىندا قازاق ورتا مەكتەبىندە وقىدى. مەكتەپتى التىن مەدالعا اياقتاعان.اباي اتىنداعى قازاق پەداگوگيكا ينستيتۋتىن جانە اسپيرانتۋراسىن ءتامامدادى.

شىعارمالارىن نەمىس، ورىس، قازاق تىلدەرىندە جازعان. 1958-1960 جىلدارى - جامبىل وبلىسى بايقادام كەڭشارىنىڭ ورتا مەكتەپ مۇعالىمى. 1963-1964 جىلدارى - «جۇلدىز» جۋرنالىنىڭ ادەبي قىزمەتكەرى.

1964 جىلدان شىعارماشىلىق جۇمىستا بولعان. 1992 جىلدارى نەمىس تىلىندە شىعاتىن «فەنيكس» الماناحى باس رەداكتورىنىڭ ورىنباسارى قىزمەتتەرىن اتقارعان.

«اۋىل شەتىندەگى ءۇي»، «دالاداعى شاعالالار»، «التى اسۋ»، «تاس وتكەل»، «باۋىرلاستىقتىڭ جاندى بەينەسى»، «سوزۆۋچيە»، «ۋاقىتپەن بەتپە-بەت»، «موتيۆى ترەح سترۋن»، «گەتە ي اباي»، «رودستۆو»، «زەمنىە يزبراننيكي» زەرتتەۋ ەڭبەكتەرىنىڭ، جەكەلەگەن اڭگىمە، ماقالالارى ەنگەن 25-كە جۋىق جيناقتاردىڭ اۆتورى. ب.مايلين، ح.ەسەنجانوۆ، ءا.نۇرپەيىسوۆ، ءا.كەكىلباەۆ، د.دوسجانوۆ، تاعى باسقا قازاق جازۋشىلارىنىڭ بىرقاتار شىعارمالارىن قازاقشادان ورىس تىلىنە، ا.رايمگەن، ە.كونچاك، ن.ۆاككەر، تاعى باسقا نەمىس اقىن، جازۋشىلارىنىڭ جەكەلەگەن تۋىندىلارىن نەمىس تىلىنەن ورىسشاعا اۋداردى.

قازاقستان جازۋشىلار وداعىنىڭ ب.مايلين اتىنداعى سىيلىقتىڭ، پرەزيدەنتتىڭ بەيبىتشىلىك پەن رۋحاني تاتۋلىق سىيلىعىنىڭ، سونداي-اق قازاقستان پەن-كلۋب سىيلىعىنىڭ يەگەرى. «دوستىق» وردەنىمەن ماراپاتتالعان.

جازۋشى 2015 جىلدىڭ اقپان ايىدا 81 جاسقا قاراعان شىعىندا ومىردەن وزدى.

Abai.kz