قىرعىزستاننىڭ ۇلتتىق قاۋىپسىزدىك بويىنشا مەملەكەتتىك كوميتەتى بۇرىنعى دەپۋتات ومىربەك بابانوۆقا قاتىستى ءىستىڭ توقتاتىلعانىن مالىمدەدى. بابانوۆ مەملەكەتتىك بيۋدجەتكە ءوز ەركىمەن 100 ملن سوم قارجى اۋدارعان.

"ومىربەك بابانوۆ پەن وعان تيەسىلى بولعان قارجىلىق قۇرىلىمدارعا اشىلعان ءىس زاڭ اياسىندا قاراستىرىلىپ، مەملەكەتكە، زاڭدىق تۇلعالار مەن ازاماتتارعا كەلتىرگەن زيانى جوقتىعى دالەلدەنىپ، ءىس توقتاتىلدى", - دەلىنگەن رەسمي حابارلامادا.

بابانوۆتىڭ مەملەكەتتىك بيۋدجەتكە اۋدارعان قارجىسى تاركىلەۋ ەمەس، ءوز ەركىمەن بەرگەن قاراجات. ول بۇل قادامعا مەملەكەتتى قولداۋ ءۇشىن بارعان. ساياساتكەر ءوز ەركىمەن 100 ملن سوم، تەڭگەگە شاققاندا 498 ملن اۋدارعان. بابانوۆقا بۇعان دەيىن مەملەكەتتىك بيلىكتى كۇشپەن باسىپ الماق بولدى دەگەن ايىپ تاعىلعان ەدى.

Abai.kz