ناۋرىز مەيرامى قارساڭىندا شقو دا ءۇش مەشىتتىڭ تۇساۋى كەسىلىپ، ورازا ايىنىڭ الدىندا حالىقتىڭ يىگىلىگىنە تابىستالدى.  قازاقستان باس ءمۇفتيى ناۋرىزباي قاجى تاعانۇلى باستان اياق قاتىستى.

سەمەي قالاسىندا اشىلعان اباي قۇنانبايۇلىنىڭ ەسىمىن يەمدەنگەن مەشىتتىڭ قۇرلىسى ءبىراز جىلدار بۇرىن باستالىپ، قارجىنىڭ جەتكىلىكسىزدىگىنەن 2018 جىلعا دەيىن تەك ىرگە تاسپەن تۇرعان. 2018 جىلى مەتسانت، شقو دان شىققان، تۋعان جەرىنە قاشاندا قامقورلىعىن اياماي كەلە جاتقان دۋلات تاستاكەەۆتىڭ دەمەۋشىلىگىمەن  ASULTAS قوعامدىق قورىنىڭ ناتيجەلى جۇمىسى ارقاسىندا ەكى جىلدىڭ ىشىندە ءزاۋلىم مەشىت بوي كوتەردى. سىيىمدىلىعى 3 مىڭ ادامعا شاقتالعان. اشىلۋ سالتاناتى شاراسىنا زيالى قاۋىم وكىلدەرىنەن ا. ءاشىموۆ، ا. قورازباەۆ، م. شاحانوۆ، ۇ. ەسداۋلەت تب شقو دان شىققان اقىن-جازۋشىلار بولدى. قالا جۇرتشىلىعىنىڭ دا قاراسى مول بولدى، دەگەنىمەن كارانتيندىك تارتىپپەن مەشىتكە  كەلۋشىلەر كەزەكپەن كىرىپ شىعىپ جاتتى.

«بۇل جەر، قالاداعى ەڭ ۇلكەن مەشىت قانا ەمەس، ادەمى دە كورىكتى جەرلەردىڭ بىرىنە اينالاتىنى ءسوزسىز» دەيدى قالا تۇرعىنى، ءوزىن دامير دەپ تانىستىرعان ازامات.

ەكىنشى مەشىت اباي اۋدانى ورتالعى قاراۋىل ەلدىمەكەنىندە اشىلىپ قۇنانباي قاجىنىڭ ەسىمى بەرىلسە، ءۇشىنشى مەشىت اباي اۋدانىنا قاراستى

قۇندىزدى اۋىلىنداعى بايتولەك قاجى اتىنداعى مەشىت.

قۇندىزدى اۋىلى بالۋان ايبەك نۇعىماروۆتىڭ اۋىلى، «مەشىت اينالاسى ءبىر ايدىڭ ىشىندە كۇردەلى جوندەۋدەن ءوتىپ، سالىندى، بۇنداي قىسقا ۋاقىتتا مەشىت سالىپ ءبىتىرۋ  تاريحتا بولماعان» دەدى ماقتانىشپەن بالۋان اعامىز...

قاسيەتتى رامازان ايى دا جاقىنداپ كەلەدى، مەشىتتەردىڭ حالىق يگىلىگىنە جاراتىلىپ، يماندىلىق پەن تاقۋالىقتىڭ ورداسى بولار كۇندەر جاقىنداپ كەلەدى.

ايدا قوجمامبەتوۆا

Abai.kz