2020 جىلى ەۋرازيالىق ەكونوميكالىق وداققا (ەاەو) مۇشە مەملەكەتتەردىڭ 2,3 مىڭعا جۋىق ازاماتى قازاقستاننىڭ مەملەكەتتىك الەۋمەتتىك ساقتاندىرۋ قورىنان (ماسق) جالپى سوماسى 588,3 ملن تەڭگەگە الەۋمەتتىك تولەمدەر العان. بۇل تۋرالى Dalainform سايتى حابارلادى.

قر ەڭبەك جانە حالىقتى الەۋمەتتى كورعاۋ مينيسترلىگىنەن تۇسىندىرگەندەي، 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارت شەڭبەرىندە ەاەو-عا مۇشە مەملەكەتتەردىڭ ەڭبەكشىلەرى مەن ولاردىڭ وتباسى مۇشەلەرىن الەۋمەتتىك قامسىزداندىرۋ (الەۋمەتتىك ساقتاندىرۋ) جۇمىسقا ورنالاستىرۋشى مەملەكەتتىڭ ازاماتتارىمەن بىردەي شارتتاردا جانە تارتىپپەن جۇزەگە اسىرىلادى.

بۇل ەاەو-عا مۇشە مەملەكەتتەردىڭ ەڭبەكشىلەرى ۋاقىتشا ەڭبەككە جارامسىزدىق جاعدايىنا جانە انا بولۋىنا بايلانىستى الەۋمەتتىك ساقتاندىرۋعا، وندىرىستەگى جازاتايىم وقيعالاردان جانە كاسىپتىك اۋرۋلاردان مىندەتتى ساقتاندىرۋعا، سونداي-اق مىندەتتى مەديتسينالىق ساقتاندىرۋعا جاتاتىنىن بىلدىرەدى. تيىسىنشە، جۇمىس بەرۋشىلەر جۇمىسقا ورنالاستىرۋشى مەملەكەتتىڭ زاڭناماسىنا سايكەس، ولار ءۇشىن ساقتاندىرۋ جارنالارىن تولەۋگە مىندەتتى.

«وسىلايشا، جۇمىس بەرۋشىلەر ەاەو-عا مۇشە مەملەكەتتەردىڭ بەيرەزيدەنت جەكە تۇلعالارىمەن جاسالعان ەڭبەك شارتتارىنىڭ نەگىزىندە وسى جۇمىسكەرلەردىڭ ەڭبەكاقىسىن تولەۋ قورىنىڭ 3,5% مولشەرىندە الەۋمەتتىك اۋدارىمداردى تولەۋگە ءتيىس»، – دەيدى مينيسترلىك وكىلدەرى.

ەاەو-عا مۇشە مەملەكەتتەردىڭ ەڭبەكشىلەرى، قازاقستان رەسپۋبليكاسىندا تۇرۋعا ىقتيارحاتىنىڭ جانە (نەمەسە) تۇراقتى تۇرۋىنىڭ بولۋىنا قاراماستان، ماسق-تان جۇكتىلىگىنە جانە بوسانۋىنا، جاڭا تۋعان بالانى (بالالاردى) اسىراپ الۋىنا بايلانىستى تولەمدەر الۋعا ءوتىنىش جاساۋعا قۇقىلى.

Abai.kz