حالقىمىزدىڭ ەجەلدەن كەلە جاتقان ۇلىق مەرەكەلەرىنىڭ ءبىرى، باستاۋىن سوناۋ ەستە جوق ەسكى زامانداردان الاتىن ءداستۇرلى مەيرامى – ءاز-ناۋرىز مەرەكەسى. جىل جاڭارىپ، تابيعات وياناتىن مەرزىمدى تەكتەن تەككە جاڭا جىل دەپ ساناماسا كەرەك. شىنىمەن دە ءاز-ناۋرىز بارشا جاڭالىقتىڭ باستاۋى عوي.

قازاقستان رەسپۋبليكاسى مادەنيەت جانە سپورت مينيسترلىگى وسىناۋ ۇلى مەرەكەنى ۇلىقتاۋ ماقساتىندا تالاي تاماشا باستامالاردى قولعا الىپ كەلەدى. مادەنيەت جانە سپورت مينيسترلىگىنىڭ باستاماسىن قولداۋ ماقساتىندا ءارى، ۇلىستىڭ ۇلى كۇنىن ارداقتاۋ ماقساتىندا «ەسىك» قورىق-مۋزەيى دە ناۋرىز ايىنىڭ 18-ءشى جۇلدىزىندا ارنايى  ءىس-شارا ۇيىمداستىردى. ءىس-شارانىڭ  باسى قورىق-مۋزەي اۋلاسىنا 6 ءتۇپ تيان-شان شىرشاسىن ورناتۋدان باستالدى. شىرشا كوشەتتەرىن دەمەۋشىلىك رەتىندە الماتى وبلىسى ەڭبەكشىقازاق اۋدانى ەسىك قالاسىنداعى كاسىپكەر – ەرنار سەرىكۇلى راحمەتوۆ قورىق-مۋزەيگە سىيلادى.

يگى تىلەكپەن اۋلا شىرشا كوشەتتەرىن وتىرعىزعاننان كەيىن ۇلتىمىزدىڭ قانىنا ءسىڭىپ، جان-دۇنيەسىن باۋراپ العان ايتىس ونەرىنە كەزەك بەرىلدى. ەڭبەكشىقازاق اۋدانىنىڭ وزىندە كەزىندە رەسپۋبليكالىق تالاي الاماندا توپ جارعان د.ابدىساەۆ، ە.وڭاشحان، ق.ىنتىقبەكوۆ، ن. قوجان، ب. مەيىربەكۇلى سىندى اۋىزدىعىمەن الىسقان تۇلپارداي ءدۇلدۇل اقىندار بار. سول اقىنداردىڭ باسىن قوسىپ، ەلدەگى پاندەميا تالاپتارىن ساقتاي وتىرىپ اقىندار ايتىسى ۇيىمداستىرىلدى. ايتىس شىمىلدىعىن اۋدان اقىندارىنىڭ اقساقالى، ورازالى دوسبوسىنوۆتىڭ اقىن بولىپ قالىپتاسۋىنا ەڭبەگى سىڭگەن اعالارىنىڭ ءبىرى – داۋباي ابدىساەۆ پەن ادۋىندى اقىن ەرقۋات وڭاشقان اشتى. تاۋەلسىزدىكتىڭ 30 جىلدىعى، ءاز-ناۋرىز بەن التىن ادام تۋرالى تولعاعان اقىنداردىڭ شابىتى شارىقتاپ التى قىردان اسقانداي بولدى. ودان كەيىنگى ءسوز سايىسى سىرلى ساز، سۇلۋ سوزىمەن تىڭداۋشى جۇرەگىنەن ورىن العان جەرگىلىكتى اقىن – قۋاتجان ىنتىقبەكوۆ پەن جاس تا بولسا جۇيرىكتىگىن تانىتقان، بايتەرەك اۋىلدىق مادەنيەت ءۇيىنىڭ قىزمەتكەرى – نۇرگەلدى قوجان ايتىسى دا ءوزىنىڭ كوركەمدىگى مەن تەرەڭدىگى ارقىلى ءتانتى ەتتى. ارقاسى قوزعان اقىندار وسى جۇپتان كەيىن ايتىس اياقتالدى دەگەنگە قاراماستان ءبىر-ءبىرىن جەكپە-جەككە شاقىرعان ە. وڭاشحان مەن ن. قوجان اراسىندا  ءسوز سايىسى ۋىتتى شۋماقتارىمەن توگىلىپ جاتتى. ءسوز بايگەسىنىڭ قورىتىندىسىندا جەرگىلىكتى ونەرپاز، جىراۋ، اقىن-كومپوزيتور ا.س. ۇسەنوۆ ءوزىنىڭ تۋىندىسى «التىن ادام» انىمەن اننەن شاشۋ شاشىپ، جاڭا جىلداعى ايتىستىڭ باستاۋىنا قۇتتى بولسىن ايتىپ، جىردان شاشۋ شاشتى.

وسىلايشا تابيعاتتى ساقتاۋعا ۇلەس قوسىپ، ۇلتتىق رۋحتى  اسقاقتاتقان ناۋرىز تويى ءوز سانىمەن ءوتتى. اقىندار مەن جىراۋلار قاسيەتتى تاۋەلسىزدىكتىڭ 30 جىلدىعى، ءاز-ناۋرىزدىڭ قاسيەتىنە، التىن ادامنىڭ تابىلعانىنا 50 جىل، «ەسىك» قورىق-مۋزەيىنىڭ اشىلعانىنا – 10 جىل تولۋ قۇرمەتىنە جىردان شاشۋ شاشىپ، ۇلىستىڭ ۇلى كۇنىندە ەلدىڭ بولاشاعىنا باق تىلەپ تارقاستى.

Abai.kz