قازاقستان ەۋرازيالىق ەكونوميكالىق وداقتا تاعى 10 جىل بولسا، ودان كەيىنگى ۋاقىتتا قازاقستاننىڭ دەربەس ەكونوميكالىق دامۋى جايىندا ءسوز قوزعاۋدىڭ ءوزى ابسۋرد سياقتى. بۇل ەكونوميكالىق وداقتا قازاقستاننىڭ ىشكى نەمەسە سىرتقى نارىعى دا بايلاۋلى. وزدىگىنەن شيكىزاتتى تىكەلەي سىرتقى نارىققا شىعارا الماسا، ىشكى جانە سىرتقى نارىعىندا دا ءوزارا باسەكەلەستىككە ەركىن جول اشپاسا، وندا دامۋ جايىندا ءسوز قوزعاۋ بەكەرشىلىك.

قازاقستانعا سىرتتان كەلەتىن شەتەلدىك ماركالى كولىكتەر اسىپ-تاسىعان باعامەن كەلىپ جاتقان جوق، ونى بىزدە وسى وداقتىڭ پايداسىن كورىپ وتىرعان ديستريۋبيتورلار قىمباتتاتىپ وتىر. تەڭگە ءرۋبلدىڭ تاساسىندا تۇر. بۇلارعا حالىقتىڭ جاعدايىنىڭ قانداي بولعانى تۇككە كەرەگى جوق. مۇنىمەن قوسا قۇرىلىس زاتتارى دا تەگىس قىمباتتاپ كەتتى. قۇرىلىس زاتتارى قىمباتتاسا، باسپانا دا قىمباتتايدى.

بۇگىن اۆتوبازارلارداعى كولىكتەردىڭ باعاسىن كورىپ قايتتىم. ءبارى 25 پايىزعا دەيىن قىمباتتاعان. وداقتىڭ كەسىرىنەن رەسەيدىڭ ساقىرلاعان قاڭىلتىرلارى ەلگە قاپتاپ كەلىپ جاتىر. ءتىپتى ءبىز سوعىستان ويسىراپ جەڭىلگەن، ەكونوميكاسى قۇلدىراپ كەتكەن ارمەنيانىڭ دا كولىكتەرىنە تالاسىپ وتىرمىز.
ءبىزدىڭ كورشىمىز وزبەكستان كەرىسىنشە قىتاي نارىعىنا قاراي ويىسىپ، قىرعىزستان تەرريتورياسى ارقىلى تەمىر جولدىڭ ىسىنە كىرىسىپ كەتتى. ۇلكەن نارىققا جول اشپاق. ەرتەڭ وزبەك اعايىن ءوزىنىڭ بارلىق اۋىلشارۋاشىلىق ونىمدەرىن قىتايعا توقتاۋسىز ەكسپورتتايدى. وزبەك پىسىق، ۇتارى كوپ بولادى. ءبىز وتىرمىز وزىمىزبەن ءوزىمىز ۇرەيلەنىپ، قىتايقۇل، ورىسقۇل دەپ. مەنىڭشە وسىلاي وتىرا بەرۋ جالعاسىن تابا بەرسە، ءبىز ارتتا قالا بەرەمىز. وعان كەپىلدىك بەرۋدىڭ كەرەگى جوق. كوزگە كورىنىپ تۇرعان دۇنيە.

ەۋرازيالىق ەكونوميكالىق وداق رەسەيدىڭ ماڭايىنداعى ەلدەرگە جاساعان وككۋپاتسياسى. بۇل تەك رەسەيدىڭ مۇددەسى ءۇشىن عانا جۇمىس جاساپ تۇر. ورىستى وسى وداقتاعى ەلدەر تۋرا بۇرىنعى كسرو سياقتى اسىراپ وتىر. باتىستان تونگەن سانكتسيانى دا ورىسپەن بىرگە كوتەرەدى. ءتىپتى ورىس وداقتاعى باسقا ەلدەردىڭ ەكونوميكاسىن باتىسقا قارسى العا سالىپ قويادى. قازىرگى كولىكتەردىڭ، قۇرىلىس ماتەريالدارىنىڭ جاپپاي كوتەرىلىپ جاتقانى دا رەسەيگە قارسى اقش-پەن ەو-نىڭ تىكەلەي سانكتسياسىنان بولىپ وتىرعانىن ۇمىتپاڭىز. سەبەبى، وداقتامىز. قان تامىرىنداي ءبىر جۇيەدەمىز. ەكونوميكالىق ساياساتتى بىرگە جۇرگىزەمىز. ۇلتتىق ەكونوميكا ءمينيسترىنىڭ "رەسەيدەن ءبىزدىڭ نارىعىمىز تاۋەلسىز، سوندىقتان باتىستىڭ سانكتسياسى بىزگە سوقپايدى، رەسەي ەكونوميكاسىنا سوعادى" دەپ ايتتى. مينيستر ايتا بەرەدى.

بەكبولات قارجان

Abai.kz