اتىراۋلىق بەلسەندىلەر ماكس بوقاەۆ پەن تالعات ايان سايلاۋ تۋرالى زاڭناماعا ەنگەن تءۇزەتۋلەردى الىپ تاستاۋدى تالاپ ەتىپ, پرەزيدەنت قاسىم-جومارت توقاەۆ, پارلامەنتتىڭ قوس پالاتاسىنىڭ تءوراعالارى ءۇستىنەن سوتقا شاعىم تءۇءسىردى.

بەلسەندىلەردىڭ پىكىرىنشە، بۇل تۇزەتۋلەر "پارتياعا كىرمەگەن ازاماتتاردىڭ ماسليحاتقا سايلانۋ قۇقىعىن شەكتەيدى".

بوقاەۆ پەن ايان ازاماتتاردىڭ ءماسليحات دەپۋتاتتارىنا ءوزىن ۇسىنۋىنا تىيىم سالاتىن 2018 جىلى زاڭناماعا ەنگەن وزگەرىستەر كونستيتۋتسياعا قايشى دەپ ەسەپتەيدى. ولاردىڭ ايتۋىنشا، اتا زاڭدا قازاقستاندىقتاردىڭ مەملەكەتتى باسقارۋ ىسىنە قاتىسۋ قۇقىعىنا كەپىلدىك بەرىلگەن جانە اتالعان وزگەرىس ازاماتتاردىڭ جەرگىلىكتى وكىلدىكتەرىنە سايلانۋ قۇقىعىن بۇزادى. بۇل تۋرالى تالعات ايان Facebook-تاعى پاراقشاسىندا جازدى.

بۇل وزگەرىستەر قابىلدانعاننان كەيىن وتكەن العاشقى ءماسليحات سايلاۋىندا (2021 جىلدىڭ 10 قاڭتارى) سايلاۋشىلار كانديداتتارعا ەمەس، ساياسي پارتيالار ءۇشىن داۋىس بەردى. بيۋللەتەندە بەس پارتيا كورسەتىلدى، اراسىندا بىردە-ءبىر وپپوزيتسيالىق پارتيا بولمادى. ماسليحاتتاعى ورىنداردىڭ باسىم بولىگىن بۇرىنعى پرەزيدەنت نۇرسۇلتان نازارباەۆتىڭ "نۇر وتان" پارتياسى يەلەندى. قازاقستان بيلىگى سايلاۋدىڭ ء"ادىل" وتكەنىن ايتتى. ال باتىس باقىلاۋشىلارى سايلاۋ "باسەكەگە ساي وتپەدى" دەپ مالىمدەدى.

بەلسەندىلەر ءماسليحاتتار "كوشەنى جارىقتاندىرۋ، اۋانىڭ لاستانۋى، جول سالۋ ماسەلەسى سياقتى ايماقتاعى ماسەلەلەردى شەشۋى ءتيىس", ال پارتيالىق تىزىممەن سايلانعانداردىڭ "كوپشىلىكتىڭ مۇددەسىنە باس قاتىرۋى ەكىتالاي" دەپ سانايدى.

تالعات ايان مەن ماكس بوقاەۆ 2016 جىلى ءساۋىر ايىندا اتىراۋداعى جەر ميتينگىلەرىنە قاتىسقان. نارازىلار شەتەلدىكتەرگە جەردى جالعا بەرۋگە جانە ساتۋعا رۇقسات بەرەتىن جەر كودەكسىندەگى تۇزەتۋلەرگە قارسى شىققان. اتىراۋداعى ميتينگىدەن كەيىن وسىعان ۇقساس اكتسيالار وزگە قالاداردا دا ءوتتى. وسىدان سوڭ بيلىك رەزونانس تۋدىرعان زاڭ باپتارىنا موراتوري جاريالاۋعا ءماجبۇر بولدى. بوقاەۆ پەن ايان قاماۋعا الىنىپ، 2016 جىلى قاراشا ايىندا ەكى بەلسەندى "الەۋمەتتىك ارازدىق تۋدىردى", "جالعان اقپارات تاراتتى" جانە "ميتينگ وتكىزۋ زاڭدارىن بۇزدى" دەگەن ايىپپەن بەس جىلعا سوتتالعان. بەلسەندىلەر تاعىلعان ايىپتارمەن كەلىسپەي، ءىستىڭ ساياسيلانعانىن ايتتى.

2018 جىلى سوت تالعات اياننىڭ تۇرمەدەن ۋاقىتىنان بۇرىن بوساتۋ تۋرالى ءوتىنىشىن قاناعاتتاندىرىپ، ونى بوستاندىققا شىعارعان. ال ماكس بوقاەۆ "قاماۋدان ۋاقىتىنان بۇرىن شىعۋعا سۇرانبايتىنىن" ايتىپ، وزىنە بەرىلگەن مەرزىممەن تۇتاس وتىرىپ شىقتى. بيىل اقپان ايىنىڭ باسىندا تۇرمەدەن شىقتى. بىراق وعان قازىر كوپتەگەن شەكتەۋلەر قويىلعان.

دەرەككوز: Centralasian

Abai.kz