ءتورت تۋر بويى قارسىلاس شاق كەلتىرمەگەن «تاراز» بەسىنشى تۋردا ءسۇرىندى. تالدىقورعانعا قوناققا بارعان ليۋبكو پەتروۆيچ شاكىرتتەرى الاڭ قوجايىندارىنان جەڭىلىپ قالدى. ەندى پرەمەر-ليگادا جەڭىلىستىڭ كەرمەك ءدامىن تاتىپ كورمەگەن ەكى-اق كوماندا قالدى. دەگەنمەن «تاراز» - ءبارىبىر كوش باسىندا.

تالدىقورعانداعى ويىندا الاڭ قو­جايىن­دارى جەڭىسكە جەتتى دەمەسەڭىز، جال­پى 5-تۋر قوناقتاردىڭ ۇستەمدىگىمەن ەرەكشەلەندى. ماسەلەن، الماتىدا «سۇڭ­قار» ءوز الاڭىندا «قايراتتان» جەڭىلدى. «وقجەتپەس» كوكشەتاۋدا «توبىلدان» ۇتىلدى. قىزىلوردادا «قايسار» «اق­جايىق­تىڭ» الدىندا تىزە بۇكتى. سونداي-اق اقتوبە، اتىراۋ، استانادا وتكەن ويىن­داردا دا قوناقتار جەڭىسكە جاقىن بولدى. جالپى، 5-تۋردا الاڭ يەلەرىنىڭ ەنشىسىنە 6 ۇپاي جازىلىپ، قوناقتار 12 ۇپاي يەلەنگەن ەكەن. دەگەنمەن بۇگىنگى تاقىرىبىمىزدا تاعى دا پرەمەر-ليگادا گول سوعاتىن قانداستارىمىزدىڭ ازدىعى جايلى جازۋدى ءجون كورىپ وتىرمىز.

بەس تۋر ءوتتى. 34 ويىن وينالدى. بارلىعى 92 گول سوعىلدى. سونىڭ قانشاسى قانداس­تارىمىزدىڭ ەنشىسىنە ءتيدى دەيسىزدەر عوي؟ قازاق جىگىتتەرى بار بولعانى 11 -اق گول سوعا الىپتى. اتاپ ايتساق، ازات نۇرعاليەۆ پەن تاڭات نوسەرباەۆ ەكى گولدان سوققان. ءىلياس امىرسەيىتوۆ، داۋرەنبەك تاجىمبەتوۆ، دۋمان نارزىلداەۆ، سەرىكجان مۇجىقوۆ، ماقسات بايجانوۆ جانە باۋىرجان يسلام­حان سىندى قانداستارىمىز ءبىر-ءبىر گولدىڭ اۆتورى اتانسا، قايرات نۇرداۋلەتوۆ ءوز گولىن پەنالتيدەن سوعىپتى. مىنە، 5-تۋردا گول سوققان قازاق جىگىتتەرى - وسىلار عانا. ال قالعان 81 گولدىڭ 53-ءى لەگيونەر­لەردىڭ ەن­شىسىنە جازىلسا، پرەمەر-ليگاداعى قا­زاقستان ازاماتتىعى بار وزگە ۇلت وكىلدەرى 34 ويىندا 27 گول سوققان. ءبىر گول اۆتوگول ەسە­بىندە تىركەلگەن.

بىراق بۇل جەردە مىنا نارسەنى دە ەسكەرگەن ءجون. ەل بىرىنشىلىگىندە ءالى دە بولسا قازاقتاردىڭ سانى از. ماسەلەن، «اتىراۋ» ساپىندا بەس تۋر بويى ءبىر عانا قانداسىمىز ويناعان. ونىڭ ءوزى - جارتىلاي قورعاۋشى سانات شالەكەنوۆ. ال «ەرتىس» قۇرامىندا قازاق فۋتبولشىسى تيمۋر بايجانوۆ الاڭعا 5-تۋردىڭ 71-مينۋتىندا عانا شىق­تى. «اقجايىقتىڭ» ساپىندا بەس ويىندا ەكى قازاق ويناعان. الايدا ەكەۋى دە - قورعاۋ­شى. راس، ءبىر مەزەتتە الاڭعا بىردەن ءتورت-بەس قازاق ويىنشىسىن ءبىر-اق شىعاراتىن «تاراز»، «ورداباسى»، «سۇڭقار» سەكىلدى كلۋبتار دا بار. دەگەنمەن ولاردىڭ وزىندە بارلىق قانداسىمىز الاڭدا 90 مينۋت بويى ويناپ جۇرگەن جوق. جالپى، بيىلعى بىرىنشىلىكتە ماۋسىم باسىنان بەرى الاڭعا 61 قازاق فۋتبولشىسى شىعىپ ۇلگەرىپتى. قالاي اقتاساق تا، 61 ويىنشىنىڭ جابىلىپ ءجۇرىپ، نەبارى 11-اق گول سوعۋى كوڭىل كون­شىتپەيدى.

البەتتە، ءبىز بۇل جەردە قازاق جىگىتتەرىن تۇقىرتۋدى ماقسات كورىپ وتىرعان جوقپىز. كەرىسىنشە، جىگىتتەرىمىزدى «قامشىلايىق»، جەلپىندىرەيىك دەگەن ماقساتتى ۇستاندىق. ەندەشە، الداعى تۋرلاردا تاجىمبەتوۆ، بولەشەۆ، قونىسباەۆ باستاعان ساڭلاق­تارىمىز گول سوعۋ جونىنەن لەگيونەرلەردى ارتقا تاستايدى دەپ ۇمىتتەنەمىز.

5-تۋر قورىتىندىسى:

«سۇڭقار» (قاسكەلەڭ) - «قايرات» (الماتى) - 0:2

گولدار: ستايۋرت دافف، 28. كنەجەۆيچ، 84.

«استانا» - «ەرتىس» (كەرەكۋ) - 2:2

گولدار: نوسەرباەۆ، 79. روجكوۆ، 89 - يۋرين، 12. يۋرين، 74.

«اقتوبە» - «ورداباسى» (شىمكەنت) - 0:0

«قايسار» (قىزىلوردا) - «اقجايىق» (ورال) - 1:2

گولدار: سىتنيك، 1:0 - سەملەر، 71. سەملەر، 87.

«وقجەتپەس» (كوكشەتاۋ) - «شاحتەر» (قاراعاندى) - 0:2

گولدار: ارسەندجەۆيچ، 65. فينونچەنكو، 90.

«جەتىسۋ» (تالدىقورعان) - «تاراز» - 2:0

گولدار: يۋنۋزوۆيچ، 46. يۋنۋزوۆيچ، 65.

«اتىراۋ» - «توبىل» (قوستاناي) - 1:1

گولدار: دجوناتاس، 34 - جولشيەۆ، 89.

ءازيز ءجۇمادىل

«الاش ايناسى» گازەتى