«اق جول» پارتياسىنىڭ دەپۋتاتى اندرەي ليننيك پرەمەر-ءمينيستردىڭ ءبىرىنشى ورىنباسارى ءاليحان سمايىلوۆتى مەملەكەت اقشاسىن تۇگەندەۋگە شاقىردى. 

«ەلوردادا مەملەكەتتىك-جەكە سەرىكتەستىك اياسىندا جاڭا مەكتەپ سالۋعا جوبا دايىندالىپ جاتىر. مەردىگەر كومپانيا ءبىر مەكتەپتىڭ قۇنىن 7,5 ميلليارد تەڭگەگە باعالاعان. نەگىزى قاراپايىم مەكتەپ سالۋ مەملەكەتكە 1,5-2 ميلليارد تەڭگەگە شىعادى. جالپى العاندا، وسىنداي 20 مەكتەپ 30-40 ميللياردتىڭ ورنىنا 150 ميللياردقا جوسپارلانعان.

بۇل جەردە سالىق تولەۋشىلەردىڭ قالتاسىنان 110-120 ميلليارد تەڭگەنى ارتىق تولەيتىنىن كورۋگە بولادى. بۇل جالعان «ينۆەستيتسيا» ما؟ ەلورداعا باسقا بىرەۋدىڭ نەسيەسىن بىرنەشە جىلعا 4 ەسە قىمبات تولەگەننەن گورى وسى مەكتەپتەردى 30-40 ميللياردقا سالۋ ءتيىمدى ەمەس پە؟ ال ۇنەمدەلگەن 110-120 ميلليارد تەڭگەنى اقىلمەن پايدالانۋعا بولادى»،- دەدى دەپۋتات اندرەي ليننيك.

جالپى قازاقستاندا عيماراتتاردىڭ قۇنى ەسەلەپ باعالاناتىنى جاسىرىن ەمەس. مىسالى "جەمقورلىقتىڭ نىشانىنا" اينالعان لرت-نىڭ قۇنى وزبەكستانداعى، چەحياداعى، ۇلىبريتانياداعى لرت-نىڭ قۇنىنان بىرنەشە ەسە قىمبات، الايدا ۇزىندى مەن حالىق تاسىمالداۋ مۇمكىندىگى جاعىنان باسەكەگە قابىلەتسىز ەكەنى تالاي ايتىلعان بولاتىن.

Abai.kz