رەسەي تۇرمەسىندە 31 ناۋرىزدان بەرى اشتىق ۇستاپ جاتقان وپپوزيتسيالىق ساياساتكەر الەكسەي ناۆالنىي تۇرمەدەن اۋرۋحاناعا اۋىستىرىلدى. بۇل تۋرالى رەسەي فەدەرالدىق قىلمىستى ورىنداۋ قىزمەتىنىڭ (فسين) ۆلاديمير وبلىسى بويىنشا باسقارماسى حابارلادى.

وپپوزيتسيونەر اۋىستىرىلادى دەلىنگەن اۋرۋحانا ۆلاديمير وبلىسىنداعى يك-3 كولونياسىندا ورنالاسقان. فسين ناۆالنىيدىڭ دەنساۋلىعىن ورتاشا دەپ باعالايدى. حابارلامادا وپپوزيتسيونەرگە ءوزىنىڭ كەلىسىمىمەن ۆيتاميندىك تەراپيا تاعايىندالعانى جازىلعان.

اقپارات قۇرالدارى يك-3 تۇرمەسىندە ازاپتاۋ بار ەكەنىن جازادى. تۇرمەنىڭ بۇرىنعى قىزمەتكەرلەرى ول جاققا تۇتقىنداردى «قايتا تاربيەلەپ»، قىلمىستى مويىنداتۋ ءۇشىن اۋىستىراتىنىن ايتقان. سوتتالۋشىلار اۋرۋحانادا وزدەرىنە پسيحتروپتى پرەپاراتتار ەگىپ، ازاپتاپ، زورلاعانىن مالىمدەگەن.

وسىعان دەيىن ناۆالنىيدى ەمدەگەن دارىگەرلەر ونىڭ قان ءاناليزىنىڭ قورىتىندىسىن جاريالاعان. ولار وپپوزيتسيونەردىڭ ءحالى وتە مۇشكىل ەكەنىن ايتقان. دارىگەر اناستاسيا ۆاسيلەۆا ناۆالنىيدىڭ جۇرەگى توقتاپ قالۋى مۇمكىن ەكەنىن دە ەسكەرتكەن.

- 2 اقپاندا ماسكەۋدىڭ سيمونوۆ سوتى الەكسەي ناۆالنىيدى 2014 جىلى «يۆ روشە ءىسى» بويىنشا شىققان شارتتى جازا ەرەجەلەرىن ورىندامادى دەپ ساياساتكەردى تۇرمەگە جىبەرگەن. ەۋروپانىڭ ادام قۇقىعى جونىندەگى سوتى ءىستىڭ ساياسيلانعانىن ايتقان. وپپوزيتسيونەر تۇرمەدە شامامەن 2,5 جىل بولادى. ​

- ناۋرىز ايىنىڭ ورتاسىندا ناۆالنىي بەلى مەن اياعىنىڭ اۋىراتىنىنا شاعىمدانعان. 31 ناۋرىزدا وزىنە قاجەتتى دارەجەدە مەديتسينالىق كومەك كورسەتىلمەي جاتقانىن مالىمدەپ، اشتىق جاريالاعان. كومپيۋتەر توموگرافياسى ونىڭ ومىرتقا ديسكىسىندە «گرىجا»  بارىن كورسەتكەن. وسىعان دەيىن ساياساتكەر  «رەسپيراتورلىق اۋرۋ بەلگىلەرىمەن» تۇرمەنىڭ مەديتسينالىق بولىمىنە جاتقىزىلعان. ول ادۆوكاتتارىنا وتريادتاعى 15 ادامنىڭ ۇشەۋىنەن تۇبىركۇلەز انىقتالىپ، اۋرۋحاناعا تۇسكەنىن حابارلاعان. ال تۇرمە دارىگەرلەرى ناۆالنىيدىڭ ءوزى دە قاتتى جوتەلىپ، دەنە قىزۋى جوعارى بولعانىن ايتقان.

- ناۋرىز ايىنىڭ سوڭىندا مىڭنان استام دارىگەر بيلىككە اشىق حات جازىپ، ساياساتكەرگە تاۋەلسىز دارىگەردى كىرگىزۋگە شاقىرعان.

- جەكسەنبى كۇنى ناۆالنىي شتابى 21 ساۋىردە ساياساتكەردىڭ بوستاندىعىن تالاپ ەتىپ، ميتينگ وتكىزەتىنىن حابارلادى.

Abai.kz