اتىراۋ وبلىسى قۇرمانعازى اۋدانىنىڭ رەسەيمەن شەكارالاس جاتقان كوپتوعاي اۋىلى ماڭىنا ورناتىلعان قورشاۋلار حالىق نارازىلىعىنان كەيىن الىندى. قۇرمانعازى اۋدانىنىڭ اكىمى مارات مۇرزيەۆ جەرگىلىكتى اقپارات قۇرالدارىنا بەرگەن سۇحباتىندا قورشاۋلاردىڭ بۇزىلعانىن حابارلاعان.

– 13-16 ساۋىردە جەرگىلىكتى تۇرعىندارمەن ءتۇسىندىرۋ جۇمىستارى جۇرگىزىلدى. قازىر مالدى جانە ەگىندى سۋعارۋ ءۇشىن وزەنگە جول اشۋ مۇمكىندىگى قاراستىرىلىپ جاتىر. وعان ەشقانداي كەدەرگى جوق، – دەدى قۇرمانعازى اۋدانىنىڭ اكىمى مارات مۇرزيەۆ اقپارات قۇرالدارىنا.

وتكەن اپتادا قازاقستان-رەسەي شەكاراسىنداعى قورشاۋ ورناتۋ جۇمىستارى جەرگىلىكتى حالىقتىڭ نارازىلىعىن تۋعىزعان. تۇرعىندار ونىڭ زاڭعا قايشى جۇرگىزىلىپ جاتقانىن العا تارتقان. اۋىل تۇرعىندارى اتاپ ايتقاندا، سونىڭ سالدارىنان اۋىلعا جاقىن وزەنگە باراتىن جول جابىلىپ، مالدارىن سۋعارا الماي قينالعانىن ايتقان.

بيلىكتىڭ ايتۋىنشا، بۇل جۇمىستار 2005 جىلى 18 قاڭتاردا قازاقستان مەن رەسەي اراسىندا قول قويىلعان كەلىسىمگە سايكەس جۇرگىزىلىپ وتىر. قازاقستان ۇلتتىق قاۋىپسىزدىك كوميتەتى شەكارا قىزمەتى وكىلىنىڭ سوزىنە قاراعاندا، 2020 جىلى "كوپتوعاي ەلدى مەكەنى اۋماعىنداعى ينجەنەرلىك جۇمىس جولاقتارىن ايقىنداۋ كەزىندە № 23 جانە 24 شەكارالىق بەلگىلەر اراسىندا بۇرىن ورناتىلعان ۇزىندىعى 1500 مەتر بولاتىن قورشاۋدىڭ رەسەي اۋماعىنا 70 مەترگە دەيىن كىرىپ كەتكەنى انىقتالعان".

- «جۇمىس توبىنىڭ ءوزارا كەلىسىمىنە سايكەس، قازىر قازاقستان اۋماعىندا جوعارىدا اتالعان قورشاۋدى بۇزۋ جانە قايتا ورناتۋ جۇمىستارى جۇرگىزىلىپ جاتىر»،- دەدى قازاقستان ۇلتتىق قاۋىپسىزدىك كوميتەتىنىڭ شەكارا قىزمەتىنىڭ تاربيە جانە كادر جۇمىستارى ءبولىمىنىڭ باسشىسى ارداق امىرعاليەۆ جەكسەنبى كۇنى جەرگىلىكتى باق-قا.

شەكارا قىزمەتىنىڭ حابارلاۋىنشا، كوپتوعايلىقتار ەگىن جانە مال سۋعاراتىن قيعاش وزەنىنىڭ نەگىزگى بولىگى قازاقستان اۋماعىندا قالماق.

قورشاۋ ورناتۋ جۇمىستارى الەۋمەتتىك جەلىدە سىنعا ۇشىرادى. كەيبىر بەلسەندىلەر ازاماتتاردى ميتينگىگە شىعۋعا شاقىردى.

دەمالىس كۇندەرى كەشكە ينتەرنەتتە كوپتوعاي اۋىلى ماڭىنداعى «قورشاۋدى بۇزىپ جاتقانى تۋرالى» ۆيدەو پايدا بولدى. كادردا اسكەري فورما كيگەن ادامداردىڭ باعاندار مەن سىمداردى الىپ تاستاپ، جۇك كولىگىنە سالىپ جاتقانى كورىنەدى. كادر سىرتىنداعى داۋىس اتالعان ۆيدەونىڭ 18 ساۋىردە تۇسىرىلگەنىن ايتادى.

گانيۋشكينو اۋىلىنىڭ باتىسىنا قاراي 50 شاقىرىم جەردە ورنالاسقان كوپتوعاي اۋىلىندا شامامەن مىڭ ادام تۇرادى.

Abai.kz