جاڭاوزەندە «بۇرعىلاۋ» مۇناي سەرۆيس كومپانياسىنا مەردىگەر «فيركروفت»  جشس-ءىنىڭ جۇزگە تارتا جۇمىسشىسى جالاقى ءوسىرۋدى تالاپ ەتىپ، ەرەۋىلگە شىقتى. بۇل تۋرالى جەرگىلىكتى اقپارات اگەنتتىكتەرى حابارلادى.

جۇمىسشىلاردىڭ سوزىنە سۇيەنگەن Vlast سايتىنىڭ جازۋىنشا، 19 ساۋىردە ەڭبەك ينسپەكتسياسى، قالا اكىمىنىڭ ورىنباسارى مەن كەڭەسشىسىمەن كەزدەسۋدەن ناتيجە شىقپاعان.

ينتەرنەتتە تاراعان ۆيدەولاردىڭ بىرىندە پرەزيدەنت قاسىم-جومارت توقاەۆ پەن قالا اكىمى سەرىكباي تۇرىموۆقا ۇندەۋ جولداعان جۇمىسشىلار 19 ساۋىردەن باستاپ جۇمىسىن توقتاتقانىن حابارلايدى.

- «سەبەبى وسى كۇنگە دەيىن جاڭاوزەن قالاسىنىڭ اكىمدىگى جانە بۇرعىلاۋ مەكەمەسىنىڭ باسشىلارى ءبىزدىڭ ماسەلەلەرىمىزدى شەشە المادى. سەبەبى، كوپتەگەن زاڭسىزدىقتار ورىن الىپ جاتىر. وسى زاڭسىزدىقتار ءۇش كۇن ىشىندە شەشىلمەسە، جاڭاوزەن قالاسىنىڭ مۇناي سالاسى مەكەمەلەرىنەن ىنتىماقتاستىق ءبىلدىرۋىن سۇرايمىز. اتاپ ايتقاندا، «وزەنمۇنايگاز», «بۇرعىلاۋ» جانە وزگە مۇناي كومپانيالارى» دەپ جۇمىسشىلاردىڭ ءبىرى ۇندەۋدى وقىپ بەرگەن.

«باسە» ارناسى تاراتقان ۆيدەودا «بۇرعىلاۋ» كومپانياسىنىڭ باس ديرەكتورى مۇستاقيم بەركاليەۆتىڭ ەرەۋىلشىلەرمەن كەلىسسوز جۇرگىزىپ جاتقانى كورىنەدى. جۇمىسشىلار تالاپتارىنىڭ بىرنەشە جىلدان بەرى ورىندالماي كەلە جاتقانىنا شاعىمدانادى. ولاردىڭ كەيبىرى تالاپتارىن ورىنداتۋ ءۇشىن استاناعا دەيىن باراتىنىن ايتىپ ەسكەرتەدى.

جۇمىسشىلاردىڭ ءبىرى Vlast سايتىنا كەلىسسوزدەن ناتيجە شىقپاعانىن حابارلاعان.

بىلتىر پرەزيدەنت قاسىم-جومارت توقاەۆ ەڭبەك كودەكسىنە ەنەتىن تۇزەتۋلەردى ماقۇلداپ، سوعان سايكەس اۋتسورسينگ كومپانيا قىزمەتكەرلەرى وزدەرىن جالدايتىن كاسىپورىن قىزمەتكەرلەرىمەن تەڭ جالاقى الۋى ءتيىس بولعان. بىراق سوعان قاراماستان 2018 جىلى «فيركروفت»  جشس-ىمەن كەلىسىمگە قول قويعان «بۇرعىلاۋ» كومپانياسى مەردىگەر كومپانيا جۇمىسشىلارىنىڭ جالاقىلارىن وسىرمەي، كودەكس ەرەجەلەرىن ورىنداماي وتىر دەيدى جۇمىسشىلار.

قازاقستاندا سوڭعى كەزدە جالاقى ءوسىرۋدى تالاپ ەتكەن مۇنايشىلار ەرەۋىلى جيىلەدى. وتكەن اپتادا قىزىلوردا وبلىسىندا «قۋات املون مۇناي» كومپانياسىنىڭ 300-دەن استام جۇمىسشىسى جالاقى ءوسىرۋدى تالاپ ەتكەن. ونىڭ الدىندا اقتوبەدە مۇنايشىلار جۇمىس بەرۋشى كومپانياعا سونداي تالاپ قويعان.

Abai.kz