22 ءساۋىر كۇنى COVID-19-عا قارسى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى بازاسىندا وندىرىلگەن QazVac (QazCovid-in) قازاقستاندىق ۆاكتسيناسىنىڭ العاشقى پارتياسى جونەلتىلدى.

QazVac ۆاكتسيناسىنىڭ العاشقى 50 مىڭ دوزاسى «سق-فارماتسيانىڭ» حابتارىنا تاراتىلىپ، ودان ءارى ەلىمىزدىڭ بارلىق وڭىرلەرىندەگى دەنساۋلىق ساقتاۋ باسقارمالارىنىڭ قويمالارىنا جەتكىزىلەتىن بولادى.

اعىمداعى جىلعى 26 ساۋىردە حالىقتى QazVac ۆاكتسيناسىمەن ۆاكتسيناتسيالاۋ باستالادى. مامىر ايىندا 50 مىڭ دوزا كولەمىندەگى ۆاكتسينانىڭ كەزەكتى پارتياسىن شىعارۋ جوسپارلانۋدا. بۇدان ءارى ۆاكتسينا ءوندىرىسى كەزەڭ-كەزەڭمەن ايىنا 500-600 مىڭ دوزاعا دەيىن ۇلعايتىلاتىن بولادى.

ال، بۇگىن پرەزيدەنت توقاەۆ ۆاكتسينانىڭ ەلىمىزدىڭ باسقا ايماقتارىنا جەتكىزىلە باستاعانىن مالىمدەدى.

- QazVac ۆاكتسيناسى ەلىمىزدىڭ وڭىرلەرىنە جەتكىزىلە باستادى. بارلىق ازاماتتارعا قولجەتىمدى بولۋ ءۇشىن وتاندىق ەكپە ءوندىرىسىن ۇلعايتامىز. قازاقستان الەم بويىنشا ءوز ۆاكتسيناسىن شىعارعان بىرنەشە ەلدىڭ قاتارىندا. ەكپەنى ازىرلەگەن عالىمدار مەن مامانداردىڭ بارىنە العىس ايتامىن!،- دەپ جازدى ول تۆيتتەر پاراقشاسىندا.

ايتا كەتەيىك، وتاندىق ۆاكتسينا دۇنيەجۇزىلىك دەنساۋلىق ساقتاۋ ۇيىمىنىڭ تىزىلىمىنە ەنگىزىلگەن. ونىڭ تولىق قاۋىپسىزدىگى دالەلدەندى، ۆاكتسينا كوروناۆيرۋس ينفەكتسياىسنا قارسى تۇراقتى يممۋنيتەتتى قالىپتاستىرادى. بەلسەندىلىگى جويىلعان ۆاكتسينانىڭ ارتىقشىلىعى، ول ۆاكتسينامەن بايلانىستى اۋرۋلاردى تۋدىرمايدى.

بۇدان باسقا، QazVac ۆاكتسيناسىن جەتكىزۋ ادىستەرى كۇردەلى توڭازىتقىش قوندىرعىلارىن تالاپ ەتپەيدى، ولار توڭازىتقىشتا پليۋس 2-8 گرادۋس تەمپەراتۋرادا تاسىمالدانادى.

Abai.kz