مىرزاقاماقتاعى ەكس-مينيستر ەلجان ءبىرتانوۆ تاڭەرتەڭگى سەگىزدەن كەشكى جەتىگە دەيىن (ساعات: 08-19 ارالىعىندا) كوشەگە شىعىپ، تۇرمىس جايىنا قاتىستى قارەكەت جاساۋعا رۇقسات الدى.

اقپارات كوزدەرى حابارلاعانداي، نۇر-سۇلتان قالاسىندا 21 ساۋىردە اۋدانارالىق مامانداندىرىلعان تەرگەۋ سوتىنىڭ وتىرىسى ءوتىپ، وتىرىس بارىسىندا جوعارىداعىداي شەشىم قابىلداندى. سوت وتىرىسىندا بۇرىنعى دەنساۋلىق ساقتاۋ ءمينيسترى ەلجان ءبىرتانوۆ التى ايدان بەرى سىرتقا اتتاپ شىعا الماي، قاتاڭ باقىلاۋدا وتىرعانىن، وتباسىن اسىراۋ ءۇشىن ۇيقاماقتىڭ ءتارتىبىن جەڭىلدەتۋدى سۇراعان ەدى. بۇعان دەيىن ەكس-ءمينيستردىڭ ادۆوكاتى دميتري كۋرياچەنكو قورعاۋىنداعى ەلجان ءبىرتانوۆتىڭ دەنساۋلىعى ناشارلاپ كەتكەنىنىن مالىمدەپ، مەملەكەت باسشىسىنا حات جازعان-دى. ادۆوكاتتىڭ پرەزيدەنت توقاەۆقا جازعان ءوتىنىش حاتىندا ءبىرتانوۆتى زاڭسىز تەرگەپ-تەكسەرۋگە تيىم سالۋ قاجەتتىگى ايتىلعان. تەگىندە زاڭ مىرزاقاماقتاعى ادامنىڭ تۋعان تۋىستارىمەن، ادۆوكاتىمەن جۇزدەسۋىنە، دەنساۋلىعىنا بايلانىستى دارىگەرلىك كومەك جاردەم الۋىنا شەك قويمايدى. سونداي مۇمكىندىگى بولسا دا، بارىنەن شەكتەلگەن ەكس-مينيستر كۇنى بۇگىنگە دەيىن ءبىر دە ءبىر رەت ءتارتىپ بۇزباعان كورىنەدى.

ەلجان ءبىرتانوۆتىڭ شاڭىراعىندا بەس بالاسى، قارت اناسى بار.

ەستەرىڭىزگە سالا كەتەيىك، ەلجان امانتايۇلى ءبىرتانوۆ 2017 – 2020 جىلدار ارالىعىندا دەنساۋلىق ساقتاۋ ءمينيسترى بولدى. مەديتسينا عىلىمىنىڭ دوكتورى، 50-دەن استام عىلىمي ەڭبەكتەردىڭ اۆتورى. 2020 جىلى 31 قازاندا ول «اسا ءىرى كولەمدە بيۋدجەت قارجىسىن تالان تاراجىعا سالدى» دەگەن كۇدىكپەن ۇستالىپ، سول جىلى 7 قاراشادا قوعامدىق ورتادان شەتتەتىلىپ، ۇيدە وتىراتىن قاماۋعا الىندى.

ءبىرتانوۆتىڭ قارجى مينيسترلىگىنىڭ قارجىمونيتورينگ كوميتەتىنىڭ تاراپىنان ايىپتالىپ، كۇدىككە ءىلىنۋى قوعامدىق پىكىرلەر مەن قوعامدىق كوڭىل كۇيگە بايلانىستى كەزىندە بىرجاقتى باعالانعانىمەن، قازىر ەكس-ءمينسيتردىڭ دەنساۋلىق ساقتاۋ سالاسىنا قاتىستى جاساعان يگىلىكتى ىستەرى بارىنشا ءمان بەرىپ، ەسكەرۋدى قاجەت ەتەتىن سياقتى.

مىسالى:

1. 2016 جىلى ءبىرتانوۆتىڭ باستاما كوتەرۋىمەن الەۋمەتتىك دامۋ سالاسىنا دەنساۋلىق ساقتاۋ مينيسترلىگىنىڭ ىقپالى مەن قىزمەتىن قايتارۋ جونىندەگە ماسەلە كۇن تارتىبىنە قويىلىپ، تالقىلاندى.

2. 2017 جىلى پرەزيدەنت دەنساۋلىق ساقتاۋ مينيسترلىگىنىڭ جەكە ۆەدموستۆو رەتىندەگى قۇرىلىمىنا پارمەن بەرىپ، ونىڭ قىزمەتىن قولدادى جانە وسى رەتتە قوعامدىق دەنساۋلىق ساقتاۋ كوميتەتى (سانيتارلىق قىزمەت) قۇرىلدى. اتالعان قىزمەت ءتۇرىنىڭ كەشەندى جۇمىسى كۇشەيتىلدى. 2018 جىلى ەل ءىشىن مەنينگيت مەڭدەگەن كەزدە، 2019 جىلى قىزىلشا قاپتاعان تۇستا ەكى اۋرۋدىڭ دا بەتىن قايتارعان ۇلتتىق سانيتارلىق ساراپتاما ورتالىعىنىڭ سانيتارلىق زەرتحانا ورتالىعى بار ۇلتتىق قوعامدىق دەنساۋلىق ساقتاۋ ورتالىعى قۇرىلدى.

3. 2019 جىلدىڭ سوڭىندا ءبىرتانوۆتىڭ باستاماسىمەن ۇلتتىق قوعامدىق دەنساۋلىق ساقتاۋ ورتالىعىندا وسى قىزمەت ءتۇرىن جەتىلدىرە تۇسۋگە ارنالعان سانيتارلىق قىزمەت سالاسىنىڭ جەتەكشى ماماندارىمەن ءماجىلىس-كەڭەس بولدى.

4. 2020 جىلى ناۋرىز ايىندا مينيستر ءبىرتانوۆتىڭ تاپسىرماسىمەن مەديتسينالىق جوعارى وقۋ ورىندارىندا دارىگەر سانيتارلاردى ارنايى مامان رەتىندە دايىندايتىن شەشىم قابىلداندى. سونداي-اق، مەديتسينالىق جوعارى وقۋ ورىندارىنا 2020 جىلدىڭ جاز مەزگىلىنە دەيىن  ەپيدەميولوگتار مەن دارىگەر سانيتارلاردىڭ بىلىكتىلىگىن ارتتىرىپ، قايتا دايارلاۋ مىندەتى جۇكتەلدى.

بۇل – ءبىرتانوۆتىڭ دەنساۋلىق ساقتاۋ ءمينيسترى لاۋازىمىندا بولعان كەزدەگى سانيتارلىق قىزمەت سالاسىنا قاتىستى اتقارعان جۇمىستارى مەن قولعا العان باستامالارىنىڭ ءبىر پاراسى.

اۋا ارقىلى تاراپ، ادامنان ادامعا جۇعاتىن كوشپەلى دەرتتىڭ بەتىن الدىمەن تازالىق ارقىلى تيا الامىز. بىراق «تاجالعا» تاپ-تۇيناقتاي تازالىق قانا جاۋاپ بەرە المايدى، جۇقپالى اۋرۋلارمەن كۇرەستىڭ ناتيجەسى سانيتارلىق قىزمەتتىڭ ساقاداي سايلىلىعىنا، كاسىبيلىگىنە، كەشەندى جۇمىس اتقارۋىنا كەپ تىرەلەدى. ەكس-مينيستر ەلجان ءبىرتانوۆ وسى ماسەلەنى تەرەڭ ءتۇسىنىپ ىسكە كىرىسكەن ەدى. امال كەم، قولعا العان ءىسى اقىرىنا جەتپەي ازاماتتىڭ باسى داۋعا قالدى.

مينيستر ەلجان ءبىرتانوۆتىڭ تۇسىندا تۇڭعىش رەت دارىگەرلىك كومەكتىڭ ساپاسىن جۇيەلى تۇردە ارتتىرۋعا كوپ كوڭىل ءبولىندى.  

العاشقى دارىگەرلىك كومەك – كومەكتىڭ ۇلكەنى. ەكىنشى دۇنيەجۇزىلىك سوعىسقا قاتىسىپ، وق پەن وتتىڭ ورتاسىنان امان ورالعان قارت جاۋىنگەلەر ءالى كۇنگە دەيىن مايدان دالاسىنداعى دارىگەرلەردىڭ بىلىكتىلىگىنە تاڭداي قاعىپ، باس شايقاپ وتىرادى. كەزىندە قالا تۇرماق، الىس قىستاقتاردىڭ وزىندە كۇردەلى اۋرۋلاردىڭ ەمىن تابا بىلەتىن دارىگەرلەر بولدى. ولار اۋىل اۋىلدىڭ اراسىندا جۇگىرىپ ءجۇرىپ-اق، تالاي جاندى اجالدان اراشالاپ قالعان ەدى. وكىنىشكە قاراي، ءوز كاسىبىن جوعارى دەڭگەيدە مەڭگەرگەن دارىگەرلەردىڭ قاتارى كەيىنگى شيرەك عاسىردىڭ شەگىندە سيرەپ كەتتى. ەل ىشىندە دارىگەرلەردىڭ بىلىكسىزدىگىنەن بولعان ءولىم-ءجىتىم كوبەيدى. اۋرۋحانلار اشىقتان اشىق پارا الاتىن كوررۋپتسيالىق مەكەمەلەرگە اينالدى. دەنساۋلىق ساقتاۋ سالاسىنداعى مۇنداي كەلەڭسىزدىكتىڭ بەتىن قايتارۋ ءۇشىن كەشەندى، جۇيەلى وزگەرىس كەرەك-ءتى. بۇل جايتتى جاپ-جاس مينيستر ەلجان ءبىرتانوۆ جاقسى ءتۇسىندى. ءسويتتى دە تومەندەگى جاعداياتاردى جولعا قويدى.

1. دەنساۋلىق ساقتاۋ مينيسترلىگى جانىنداعى مەديتسينالىق قىزمەت تۇرلەرىنىڭ ساپاسى جونىندەگى بىرلەسكەن كوميسسيا دياگنوستيكالىق جانە ەمدەۋ حاتتامالارىن قاراۋدىڭ ينستيتۋتسيونالدىق نەگىزىنە اينالدى. سونىڭ ناتيجەسىندە 1300-دەن استام كلينيكالىق حاتتاما دايىندالدى. بۇل حاتتامالار زاماناۋي دالەلدەرگە نەگىزدەلىپ، كاسىبي ورتادا جاسالعان ادەبيەتتەر مەن دەنساۋلىق ساقتاۋ تەحنولوگياسىن باعالاۋ ناتيجەلەرى بويىنشا ماقۇلداندى.

2. مەديتسينالىق ۇيىمداردىڭ ساپالىق ستاندارتتارىن پاتسيەنتتەردىڭ ومىرىنە قاۋىپسىزدىك تۋدىرمايتىن جاعدايعا سايكەس اككرەديتتەۋ مەن مەديتسينا قىزمەتكەرلەرىنىڭ ءبىلىمى مەن داعدىلارىن باعالاۋ (تەكسەرۋ) فۋنكتسياسى مەديتسينالىق قىزمەتكەردى كلينيكالىق پراكتيكاعا جىبەرۋدىڭ العى شارتى رەتىندە تاۋەلسىز ورتاعا بەرىلدى

3. مەديتسينالىق قىزمەتتەردىڭ ساپاسىن جاقسارتۋ ۇدەرىستەرىن جۇزەگە اسىرۋ ماقساتىندا مەديتسينالىق ۇيىمداردىڭ حالىقارالىق ساپا جانە حالىقارالىق ورگان (ISQua) سەرتيفيكاتتاعان ستاندارتتارى بويىنشا ەرىكتى اككرەديتتەۋ جۇرگىزىلدى. 2020 جىلدىڭ باسىندا امسق-مەن كەلىسىمشارت ارقىلى مەملەكەتتىك تاپسىرىستىڭ شەگىندە مەديتسينالىق قىزمەت كورسەتكەندەردىڭ 30% -ى اككرەديتتەلدى. بۇل كورسەتكىشتى 2025 جىلعا قاراي 70 پايىزعا جەتكىزۋ جوسپارلانعان بولاتىن.

مىنە، وسىنداي يگىلىكتى ىستەرگە باستاماشى بولعان ازامات، ءوز كاسىبىن جەتە مەڭگەرگەن كاسىبي مامان، بۇرىنعى مينيستر جاداپ-جۇدەپ ءۇي قاماقتا وتىر. ادۆوكات دميتري كۋرياچەنكونىڭ سوزىنە قاراعاندا، ول وزىنە تاعىلعان ايىپتىڭ ءبىر دە ءبىرىن مويىندامايدى. نەگە؟ ويتكەنى ول – وزىنە، ءوز ءىسىنىڭ اقتىعىنا سەنىمدى ادام. ال سەنىم بارىنەن دە كۇشتى.

Abai.kz