قازىرگى تاڭدا عىلىم توڭىرەگىندە ورىن الىپ جاتقان كەلەڭسىز جايتتار از ەمەس. ونى كوزبەن كورىپ، قۇلاقپەن ەستىپ جۇرگەنىمىز دە شىندىق.

وكىنىشكە قاراي، ءتۇرلى ولقىلىقتارعا تولى، قيسىنعا سىيمايتىن ەڭبەكتەر عىلىمي كەڭىستىكتى جايلاپ، ساپانىڭ ورنىن سان باسىپ بارا جاتقانداي اسەر قالدىرادى. جۋىردا كىتاپحانا سورەسىنەن ورىن العان سونداي ەڭبەكتەردىڭ بىرىنە كوزىم ءتۇستى. اتاۋىنىڭ ءوزى ايبارلى – «ابايتانۋ وقۋ قۇرالى مەن حرەستوماتياسى». ارينە، مۇنداي اتاۋ كەز كەلگەن وقىرماننىڭ قىزىعۋشىلىعىن وياتادى. سالماعىنا قاراپ، عىلىمعا قوسىلعان سۇبەلى ۇلەس شىعار دەگەن ۇمىتپەن مازمۇنىن پاراقتاي باستاعانىم سول ەدى، كوكەيىمدە بىرىنەن سوڭ ءبىرى سۇراقتار تىزبەكتەلە بەردى.

بۇل نە ەڭبەك؟ مۇنى كىمدەر ازىرلەگەن؟ قانداي ماقسات كوزدەلگەن؟ اۆتورلار وسى قۇرال ارقىلى كىمدى سەندىرگىسى، الدە الداعىسى كەلەدى؟ ەڭ الاڭداتارلىعى – بۇل ەڭبەك اباي اكادەمياسى باسىلىمى عىلىم مينيسترلىگىنىڭ تاپسىرىسىمەن جارىق كورگەن ەكەن. بالكىم مەنىڭ تۇسىنىگىم جەتپەگەن شىعار. نە قابىلداۋىمدا ءبىر كەمشىلىك بار بولار... دەگەنمەن، وقىرمان رەتىندە تۋىنداعان كۇمان مەن ساۋالدارعا بەيجاي قاراۋ قيىن. بۇل نە ابايتانۋ حرەستوماتياسى ما الدە ماقالالار جيناعى ما؟؟؟

كىتاپتا وسى سالاداعى تاۋەلسىزدىك جىلدارى جارىق كورگەن سونى زەرتتەۋلەر نەگىزگە الىندى دەپتى اۆتورلار. مازمۇنىندا ون بەس ماقالا كورسەتىلگەن. ونىڭ ەكەۋى ەكس جانە قازىرگى پرەزيدەنتكە تيەسىلى. نەگىزگى سۇراق بۇل حرەستوماتيا ءۇشىن جاسالعان زەرتتەۋلەر ەمەس كەزىندە جاريالانعان ماقالالار قالاي ەنگەن. جانە وسى ون بەس ماقالانى جيناپ شىعارۋ ءۇشىن ءۇش بىردەي اۆتوردىڭ ا. قاليەۆا، ا. سماعۇلوۆا، ج.اۋباكىر، جالپى عىلىم مينيستىرلىگىنىڭ وعان تاپسىرىس بەرۋىنە نە قاجەتتىلىگى بار؟؟؟ ءار اۆتور بەس ماقالادان جازسا سۇراق تۋىنداماس ەدى، وزدەرى تىپتەن جوق. ەلدىڭ ماقالاسىن ءتىزىپ بەرە سالعان. بۇل ناعىز ماسقارا قاسكويدىڭ ءىسى دەپ بىلەمىن.

مۇنداي جاساندىلىق  كوزبوياۋشىلىقتى دوعارۋ كەرەك. مۇنى باسقارىپ وتىرعان ازاماتتار اباي سالاسىنىڭ توڭىرەگىندە جۇرگەن ادامدار ەكەن. الەۋمەتتىك جەلىدەن ىزدەستىرە باستاسام ءتىپتى جوبا رەتىندە جاساپ ءجۇر ەكەن. اباي ينستيتۋتى جارنامالاپ شىعارعان. وسى تەكتەس قانشاما جاساندىلىق جاساپ عىلىمعا قيانات جاساپ جۇرگەندەرى بەلگىسىز. قىزىقتىسى ءۇش عالىم جينالىپ ونبەس ماقالانى كىتاپ قىلعانى ءۇشىن مەملەكەت قانشا قاراجات ءبولدى ەكەن؟ جاستاردى ابايدىڭ ار ءىلىمىن بويىنا سىڭىرۋگە جەتەلەۋگە جاساندىلىقتىڭ ەش كەرەگى دە پايداسى دا جوق. بالكىم ۇلى ابايدىڭ اتىن جامالىپ الىپ ءدۇبارا ءجۇردىم باردىم ىستەردى جۇزەگە اسىرۋدى توقتاتۋ كەرەك شىعار. كوتەرە المايتىن قىلىشتى بەلىڭە بايلاما دەگەن اتام قازاق.

عىلىمعا قيانات ەمەس، عىلىمعا ۇلەس قاجەت اعايىن!

گۇلسىم وتەپوۆا، ۇستاز

Abai.kz