قازاقستان دەنساۋلىق ساقتاۋ مينيسترلىگى قىتاي ەكپەسى "سامۇرىق-قازىنا" قورىنىڭ جۇمىسشىلارىنا الىنعانىن حابارلادى. ال قور "ەكپەدەن قالسا، حالىق اراسىندا قىتاي ەكپەسىن العىسى كەلەتىندەرگە بەرىلەتىنىن" ايتتى.

"سامۇرىق-قازىنا" قورىنىڭ سايتىنداعى اقپاراتقا ساي، الىنعان ەكپە "500 مىڭ ادامعا سالۋعا جەتەدى". قور "جۇمىسشىلارى مەن ولاردىڭ وتباسىنا تولىق ەكپە سالۋدى كوزدەيدى". "سامۇرىق-قازىنا" ءباسپاسوز قىزمەتى "ەكپە شىعارۋشىنى تاڭداماعانىن" ايتتى.

"سك-فارماتسيانىڭ" مالىمەتى بويىنشا، "سامۇرىق-قازىنا" العان ەكپە Hayat-Vax دەپ اتالادى جانە ول ءباا ەلىندەگى Gulf Pharmaceutical Industries Julphar كومپانياسىندا شىعارىلعان. پرەپاراتتى پەكيندەگى Sinopharm كومپانياسىنىڭ بيولوگيالىق ونىمدەر ينستيتۋتى جاساعان.

ەكپە ولتىرىلگەن ۆيرۋستان جاسالعان جانە +2+8 گرادۋستا ساقتالادى. ءساۋىر سوڭىنا دەيىن 400 مىڭ دوزا، ال مامىردا 600 مىڭ دوزا جەتكىزۋ كوزدەلگەن.

"سك-فارماتسيا" ازاتتىققا ءبىر دوزا 31,1 دوللارعا الىنعانىن (جالپى قۇنى – 31,1 ملن دوللار) حابارلادى. ال دەنساۋلىق ساقتاۋ مينيسترلىگى ەكپەنىڭ قازاقستاندا "ۋاقىتشا تىركەۋ كۋالىگى" بارىن مالىمدەدى.

قازىر قىتايدىڭ CanSino, Sinopharm جانە Sinovac Biotech كومپانيالارى كوروناۆيرۋسقا قارسى ەكپە شىعارعان. رەسمي پەكين بۇل ەكپەلەر الەمنىڭ ونداعان ەلىندە ەگۋگە رۇقسات الدى دەيدى.

بيىل ساۋىردە قىتاي ءوزى شىعارعان ەكپەنىڭ تيىمدىلىگى تومەن ەكەنىن مويىنداعان. بۇل قىتاي شەنەۋنىكتەرىنىڭ ەكپەنىڭ قورعاۋ مۇمكىندىگى تومەن ەكەنىن العاش مويىنداۋى ەدى. برازيليادا جۇرگىزىلگەن زەرتتەۋ كەزىندە Sinovac ەكپەسىنىڭ تيىمدىلىگى 50,4 پايىزدى كورسەتكەن.

"سامۇرىق-قازىنا" ءال-اۋقات قورى 2006 جىلى كۆازيمەملەكەتتىك سەكتورداعى ونداعان كومپانيانىڭ بىرىگۋىنەن كەيىن قۇرىلعان. قوردىڭ اكتيۆى 63 ملرد دوللاردى قۇرايدى. قور سايتىندا حولدينگتىڭ ميسسياسى "قازاقستاننىڭ ءال-اۋقاتىن كوتەرۋ جانە بولاشاققا جاعداي جاساۋ" دەپ كورسەتىلگەن.

قازىر قازاقستان حالىققا نەگىزىنەن رەسەيلىك "سپۋتنيك V" ەكپەسى سالىنىپ جاتىر. 26 ساۋىردەن باستاپ قازاقستان عالىمدارى جاساعان QazCovid-in ەكپەسى دە سالىنا باستادى.

 Abai.kz