وسىدان ەكى كۇن بۇرىن (5 مامىردا) «sputnik.kz» سايتىندا: «كازاحستان ي ۋزبەكيستان ۆۆوديات "ازياتسكي شەنگەن" - سوگلاسوۆان سپيسوك ستران», - اتتى اقپارات جاريا بولدى. وندا قازاقستان مەن وزبەكستان جىل سوڭىنا دەيىن «ازيالىق شەنگەن» – Silk Road ورتاق ۆيزاسىن ەنگىزۋدى جوسپارلاپ وتىرعانى جايلى جازىلعان.

اۋەلى، سول اقپاراتتى تارقاتىپ جازايىق...

قر مادەنيەت جانە سپورت مينيسترلىگى جوعارىدا اتالعان «ازيالىق شەنگەن» تۋرالى: «اتالعان رەجيمدى ەنگىزۋ جوسپارلانىپ وتىر جانە قازىر وزبەكستانمەن ەكى ارادا «Silk Road Visa» ۆيزاسىن بەرۋدىڭ بىرىڭعاي ەلەكتروندىق جۇيەسىن ەنگىزۋ تۋرالى كەلىسسوزدەر ءجۇرىپ جاتىر»، - دەلىنگەن. مينيسترلىكتىڭ مالىمەتىنشە، «Silk Road Visa» ۆيزاسى Silk Road» ايماعىنا قوسىتالىن ەلدەرگە كىرۋ جارە ءجۇرىپ-تۇرۋ ءۇشىن بەرىلەتىن ۆيزا ءتۇرى بولماق. رەسمي اقپاراتتا، سونداي-اق، «Silk Road Visa» كوپ رەتتىك ەلەكتروندى تۋريستىك ۆيزاسىنىڭ ەرەجەسى كەلىسىلگەنى، قازىرگى ۋاقىتتا نورماتيۆتىك-قۇقىقتىق سيپاتتامالارى تالقىلانىپ جاتقانى ايتىلعان.

«Silk Road Visa» دەگەنىمىز نە؟

مادەنيەت جانە سپورت مينيسترلىگىنىڭ مالىمەتىنشە، بۇل «جىبەك جولى ەلدەرىنە» ءتان شەنگەندىك ۆيزانىڭ انالوگى.

«بۇل مەحانيزم ءوز كەزەگىندە ترانسۇلتتىق تۋريستىك راسىمدەر كەزىندەگى ۆيزالىق، كەدەندىك كەدەرگىلەردى جويۋعا مۇمكىندىك بەرەدى»، - دەپ مالىمدەگەن ۆەدومستۆو قازىر قازاقستان مەن وزبەكستانعا بارۋ ءۇشىن كەي مەملەكەتتەردىڭ تۋريستەرى جەكە-جەكە ۆيزا الۋى كەرەك. بۇل مەحانيزم وسى پروتسەسستى جەڭىلدەتەتىنىن ايتقان. «Sputnik.kz» سايتى سولاي دەپ جازادى.

«ازيالىق شەنگەن» قاشان ىسكە قوسىلادى؟

وزبەكستان تاراپى «Silk Road Visa» ۆيزاسىن جۇزەگە اسىرۋ بويىنشا 2 كونسۋلدىق كەڭەس پەن 4 جۇمىس توبىنىڭ جيىنىن وتكىزىپتى.

2020 جىلدىڭ اقپانىندا «gazeta.uz» سايتىندا: «Silk Road Visa» ۆيزاسىن ەنگىزۋ جىل سوڭىنا دەيىن جۇزەگە اسىرىلادى»، - دەگەن اقپارات شىققان. وندا: «ءبارى دۇرىس. جىل سوڭىنا دەيىن ءبىز بۇل جوبانى ىسكە قوسامىز»، - دەگەن وزبەكستاننىڭ ءتۋريزمدى دامىتۋ كوميتەتىنىڭ باسشىسى ازيز ابدۋحاكيموۆتىڭ مالىمدەمەسى جاريالانعان.

ال قازاقستاننىڭ مادەنيەت جانە سپورت مينيسترلىگى اتالعان جوبانىڭ بيىلعى جىلدىڭ اياعىنا دەيىن ىسكە قوسىلاتىنىن ايتىپتى.

بۇل داريعا نازارباەۆانىڭ ۇسىنىسى

ال العاش رەت «ازيالىق شەنگەن» يدەياسىن سول كەزدەگى داريعا نازارباەۆا ايتقان. 2018 جىلدىڭ ماۋىسىمى. سەنات كوميتەتىنىڭ سول كەزدەگى توراعاسى داريعا نازارباەۆا جۋرناليستەرگە بەرگەن سۇحباتىندا: «اشىق ءارى ايقىن جانە دوستىق شەكاراسىن قالىپتاستىرۋ كەرەك، سوندا بارلىق سالالارداعى قارىم-قاتىناستار تەرەڭدەي تۇسەدى. ول ءۇشىن بارلىق كەدەندىك راسىمدەردى بىرىڭعايلاۋ كەرەك.

قازاقستان مەن وزبەكستاندا ءتۋريزمدى دامىتۋ عانا ەمەس، ورتالىق ازيانىڭ بارلىق كورنەكتى جەرلەرىن كورگىسى كەلەتىن شەتەل تۋريستەرىنىڭ ءبىزدىڭ ەلدەرگە كەلۋىن ىنتالاندىرۋ دا ماڭىزدى»، - دەگەن ەدى داريعا نازارباەۆا. دەدى دە، ازيالىق «Silk viza» شەنگەنىن قالىپتاستىرۋ تۋرالى ۇسىنىستى ايتتى.

تاقىرىپقا تۇزدىق:

داريعا حانىم حانزۋ حالقىن قازاقستانعا ۆيزاسىز كىرگىزبەك پە؟

قىتاي ازاماتتارى قازاقستانعا ۆيزاسىز رەجيممەن 72 ساعاتقا كىرە الادى

Abai.kz