الماتىدا ءۇش حالىقارالىق ۋنيۆەرسيتەت اشىلادى. بۇل تۋرالى قالا اكىمى باقىتجان ساعىنتاەۆ «الماتى» تەلەارناسىنىڭ تىكەلەي ەفيرىندە وتكەن «الماتىنى دامىتۋ 2021: جاھاندى ىسكەرلىك ورتالىق» اتتى جاڭا جوبالاردىڭ ونلاين تانىستىرىلىمىندا ءمالىم ەتتى.

الماتى اكىمىنىڭ ايتۋىنشا، بيىل 1 قىركۇيەكتەن ۇلىبريتانيانىڭ لەستەر قالاسىنداعى دە مونتفورت ۋنيۆەرسيتەتىنىڭ فيليالى ءوز جۇمىسىن باستايدى. قازىر ۇكىمەتتەن ليتسەنزيا الدى.

بيىلعى جوسپار – 300 ستۋدەنت قابىلداۋ. ەگەر ۇسىنىس كوپ بولسا، باكالاۆرياتقا 400 ستۋدەنت، جىل سوڭىنا دەيىن 90 ماگيسترانت قابىلداۋ جوسپاردا.

«بۇل ۋنيۆەرسيتەتتىڭ كامپۋسىن سالۋ ءۇشىن قۇلجا تراسسانىڭ وڭ جاعىنان جەر بولدىك. كەلەر جىلدىڭ باسىندا ۋنيۆەرسيتەتتىڭ قۇرىلىسى باستالادى»، – دەدى قالا اكىمى.

بريتاندىق ۋنيۆەرسيتەتتىڭ فيليالى قر ۇكىمەتىنىڭ قاۋلىسىمەن اشىلدى. قازاقستاندىق وقۋشىلاردىڭ انگلياعا بارماي-اق قولجەتىمدى باعامەن ساپالى ءبىلىم الۋىنا مۇمكىندىك تۋادى. ۋنيۆەرسيتەت ايماقتاعى تالانتتى جاستارعا شاكىرتاقى دا ۇسىنادى.

سونىمەن قاتار، قالا اكىمى تاعى ەكى ۋنيۆەرسيتپەن كەلىسسوزدەر جۇرگىزىلگەنىن ايتتى.

- «پاندەميا كەزىندە ءبىز تسيفرلاندىرۋعا كوپ كوڭىل بولدىك. دەنساۋلىق سالاسىنداعى كاسىپورىنداردى ءبىر جەرگە جيناقتاپ، فارمكلاستەر جاساساق جانە سونىڭ قاسىندا سول جەردە قىزمەت ەتەتىن جۇمىسشىلاردى وقىتاتىن ۋنيۆەرسيتەت اشساق دەگەن يدەيامەن ۇكىمەتكە شىقتىق. ۇكىمەت ءبىزدى قولدادى. تسيفرلىق دۇنيەنى دامىتۋعا كەلگەندە، نازارباەۆ ۋنيۆەرسيتەتى تاراپىنان ۇسىنىس بولدى. اتالعان جوعارى وقۋ ورنىنىڭ ىشىنەن اشىلاتىن «جاساندى ينتەللەكت» مەكتەبىن الماتىداعى ەركىن ايماققا ورنالاستىرساق دەگەن ۇسىنىس كەلدى. ويتكەنى الماتىدا وسىعان بايلانىستى بازا تولىق دايىن», – دەدى باقىتجان ساعىنتاەۆ.

تسيفرلىق سالادا قىزمەت ەتەتىن كومپانيالاردىڭ 70 پايىزى الماتىدا ورنالاسقان. بارلىق IT كومپانيا، نەگىزگى زەرتتەۋ ورتالىعى دا مەگاپوليستە.

- «ءبىز بۇل ۇسىنىستى قۋانا قابىلدادىق. سونىمەن قاتار، Alma ۋنيۆەرسيتەتى مەن اريزونا مەملەكەتتىك ۋنيۆەرسيتەنىنىڭ تاراپىنان الماتى قالاسىنان قوسىمشا ۋنيۆەرسيتەت اشۋعا بىرىككەن ۇسىنىس ءتۇستى. الەمدىك ۋنيۆەرسيتەتتەردىڭ كامپۋس جۇيەسىمەن سالىناتىن، ستۋدەنتەردىڭ سول جەردە تۇرىپ وقيتىن، مۇعالىمدەرى دە تۇراتىن وزىنشە ءبىر قالاشىق، كامپۋس بولماق», – دەدى الماتى اكىمى.

سونىمەن قاتار، قالا اكىمى عىلىمنىڭ دامۋىنا دا مۇمكىندىك تۋاتىنىن ايتتى.

«ەڭ الدىمەن وندىرىسكە پايدالى، قالانىڭ ەركىن ايماعىنداعى، يندۋستريالدى ايماعىنداعى كاسىپورىندارعا، جالپى ەلدەگى كاسىپورىندار ءوزىنىڭ بازاسىن كۇشەيتۋ، ەكونوميكالىق الەۋەتىن كوتەرۋ ءۇشىن جاڭا تەحنولوگيانى وسى جەردەگى زەرتحانالاردان الا الادى. بۇل قالا ەكونوميكاسىن باسقا دەڭگەيگە كوتەرەدى»،- دەپ تۇيىندەدى شاھار باسشىسى.

Abai.kz