بۇگىن ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا دەپۋتاتتار مەملەكەت باسشىسىنىڭ تاپسىرماسىمەن ازىرلەنگەن جەر قاتىناستارىن دامىتۋ تۋرالى زاڭ جوباسىن ماقۇلدادى.

جەردى پايدالانۋ مەن قورعاۋدى باقىلاۋ زاڭ دەڭگەيىندە كۇشەيەتىنىن  العا تارتقان نۇرلان نىعماتۋلين:

- بۇل قۇجات مەملەكەت باسشىسى قاسىم-جومارت كەمەلۇلى توقاەۆتىڭ تىكەلەي تاپسىرماسىمەن ازىرلەندى. وسى زاڭ جوباسى بويىنشا، ەڭ الدىمەن، حالقىمىزدىڭ نازارىندا جۇرگەن وتە ماڭىزدى جەر ماسەلەسى بويىنشا ناقتى شەشىم قابىلداندى. ەڭ باستىسى، اۋىل شارۋاشىلىق ماقساتىنداعى جەرلەردى جالعا بەرۋ زاڭمەن بەكىتىلدى. وسى ماسەلەگە قاتىستى قوعامدا ءارتۇرلى پىكىرلەر، ءارتۇرلى ويلار ايتىلدى، - دەدى.

جالپى، زاڭ جوباسىندا جەردى جەكە مەنشىككە بەرۋ 5 جىلعا توقتاتىلادى.

ءماجىلىس توراعاسى اتاپ وتكەندەي، قازاقستاندىقتاردىڭ اۋىل شارۋاشىلىققا باعىتتالعان جەرلەرىن مەملەكەتتەن ساتىپ الماي، جالعا بەرۋ قۇقىعىن يەلىكتەن شىعارۋى مۇمكىندىگى قاراستىرىلعان.

وسى رەتتە، پالاتا سپيكەرى جالپى زاڭ جوباسى جەكە مال جايۋ ءۇشىن قاجەتتى جايىلىم تاپشىلىعىن شەشۋگە ىقپال ەتىپ، سونداي-اق، جەر ۋچاسكەلەرى بويىنشا اقپاراتتىڭ قولجەتىمدىلىگى مەن اشىقتىعى دا كۇشەيەتىنىن اتاپ ءوتتى.

Abai.kz