سۋديا رامازانوۆا اپەللياتسيالىق شەشىمنىڭ بىردەن كۇشىنە ەنەتىنىن جانە بوقاەۆتىڭ بۇل شەشىم بويىنشا جوعارعى سوت القاسىنا شاعىمدانۋعا قۇقى بار ەكەنىن ايتتى.

اتىراۋلىق بەلسەندى ماكس بوقاەۆتىڭ ايتۋىنشا، ءماجىلىس پەن سەنات ماقۇلداپ، پرەزيدەنت توقاەۆ قول قويعان قازاقستانداعى سايلاۋ تۋرالى زاڭعا ەنگىزىلگەن 2018 جىلعى وزگەرىستەر مەن تولىقتىرۋلار ءوزىنىڭ جانە باسقا ازاماتتاردىڭ جەرگىلىكتى ۋاكىلدىك ورگان – ماسليحاتقا سايلانۋ قۇقىن بۇزادى.

- 1995 جىلعى "سايلاۋ تۋرالى" زاڭعا سايكەس ماسليحاتقا سايلاۋعا تۇسۋگە مۇمكىندىك بار ەدى. مەن وتپەسەم دە، 2016 جىلى ءوز كانديداتۋرامدى ۇسىندىم. ەندى بۇل مۇمكىندىكتەن ايىرىلدىق. ءماسليحات سايلاۋىنا قاتىسۋ ءۇشىن [رەسمي تىركەلگەن] التى ساياسي پارتيانىڭ ءبىرىنىڭ مۇشەسى بولۋىڭ كەرەك. ماسەلەن، ماعان ول پارتيانىڭ ءبىرى دە ۇنامايدى. ءبىر سوزبەن ايتقاندا ءبىزدىڭ ەشقانداي سايلاۋعا قاتىسۋعا قۇقىعىمىز جوق، - دەيدى بوقاەۆ.

سۋديا رامازانوۆانىڭ ايتۋىنشا، بوقاەۆتىڭ شاعىمىندا ناقتى دالەل كەلتىرىلمەگەن:

- پرەزيدەنت، سەنات پەن ءماجىلىس توراعالارى ءاربىر زاڭ اكتىسىن وزدىگىنەن قابىلداعان جوق، زاڭ ۇجىمدىق جولمەن ماقۇلدانعان. بۇعان قوسا ول قابىلداعان اكتى ارىزدانۋشىنىڭ جەكە قۇقىعىن نەمەسە زاڭدىق مۇددەسىن بۇزعان جوق, - دەدى ول.

مۇنىڭ الدىندا، 26 ساۋىردە العاشقى ينستانتسيا – ەسىل اۋداندىق سوتىنىڭ سۋدياسى ايگۇل اياپبەرگەنوۆا دا بەلسەندىنىڭ ءۋاجىن ورىنسىز دەپ تاپقان. سۋديانىڭ تۇجىرىمى بويىنشا، پرەزيدەنتتىڭ ميسسياسى – "مەملەكەتتىڭ ىشكى جانە سىرتقى ساياساتىنىڭ نەگىزگى باعىتتارىن ايقىنداۋ، ەل ىشىندە جانە حالىقارالىق قاتىناستا قازاقستان اتىنان وكىلدىك ەتۋ". سۋديانىڭ ايتۋىنشا، سەنات پەن ءماجىلىس توراعالارىنىڭ ارەكەتىنە قارسى بولۋ مۇمكىن ەمەس، "سەبەبى زاڭدار داۋىس بەرۋ ارقىلى، ۇجىمدىق جولمەن قابىلدانادى". سوندىقتان، پرەزيدەنتتىڭ، پارلامەنت سەناتى مەن ءماجىلىسى توراعالارىنىڭ ارەكەتتەرى "سوتتا قاراستىرۋعا جاتپايدى".

- سۋديا اياپبەرگەنوۆا قاۋلىنىڭ سوڭىنا اپەللياتسيالىق سوت القاسىنا شاعىمدانۋىما قۇقىم بار ەكەنىن جازعان. مەن سونى پايدالانىپ ارىزداندىم, - دەيدى بوقاەۆ.

سايلاۋ زاڭناماسىنا ەنگىزىلگەن وزگەرىستەرگە قارسى ارىزدى بوقاەۆ بيىل العاش رەت ناۋرىزدىڭ سوڭىندا اتىراۋ سوتىنا بەرگەن. 1 ساۋىردە اتىراۋ سوتى بىرنەشە سەبەپپەن، سونىڭ ىشىندە جاۋاپكەرلەر توقاەۆ، اشىمباەۆ، نىعماتۋليننىڭ نۇر-سۇلتاندا ەكەنىن ايتىپ، تالاپ-ارىزدى كەرى قايتارعان سوڭ بەلسەندىلەر استانا سوتىنا قايتا ارىزدانعان.

ماكس بوقاەۆ 2016 جىلعى "جەر ميتينگىلەرى"كەزىندە رەسپۋبليكاعا تانىلعان. ول جەردى شەتەلدىكتەرگە جالعا بەرۋگە جانە ساتۋعا رۇقسات بەرەتىن ەرەجەلەرگە قارسى توپتى باستاپ، نارازىلىق ۇيىمداستىرعان.

Abai.kz