«ەسكى پروبلەمالاردىڭ جاڭا شەشىمىن ۇسىنعان پرەزيدەنت». اسىلبەك ابدۋلوۆ «پرەزيدەنت توقاەۆتىڭ جاڭا باعدارى» اتتى فيلمىندە مەملەكەت باسشىسىنىڭ جەكى جىلدىق جۇمىسىنا وسىنداي باعا بەرەدى.

«تاۋەلسىز قازاقستاننىڭ ەكىنشى پرەزيدەنتى قاسىم-جومارت توقاەۆ ەلدى قىسىلتاياڭ جاعدايدا باسقارا وتىرىپ، ەكى جىل ىشىندە قاتال سىناقتان ءوتتى. مۇنداي وقيعالار مەن دراماعا تولى ەكى جىل قالىپتى ءتورت جىلعا تەڭ ەدى»، - دەيدى جۋرناليست.

ءفيلمنىڭ باسىم بولىگى ەلدە بيلىك ءترانزيتى بولىپ جاتقان كەزدە تىركەلگەن توسىن وقيعالاردى سيپاتتاۋعا ارنالعان.

«قازاقستاننىڭ جاڭا پرەزيدەنتى سايلاۋداعى سەنىمدى جەڭىستىڭ قۋانىشىن سەزىنىپ ۇلگەرمەي جاتىپ، الەۋمەتتىك-ساياسي سىن-تەگەۋرىندەرگە تاپ بولدى. «2019 جىلدىڭ ماۋسىم ايىنىڭ سوڭىندا بولعان تەڭىز» مۇناي كەن ورنىنداعى ەڭبەك قاقتىعىسى بىرلەسكەن كاسىپورىنداعى شەتەلدىك جانە جەرگىلىكتى مامانداردىڭ ءارتۇرلى ەڭبەك جاعدايىندا جۇمىس ىستەگەنىنەن، ادىلەتسىز ەڭبەك تولەمىنەن تۋىندادى. قاسىم-جومارت توقاەۆ ەسكى پروبلەمالاردى شەشۋدىڭ جاڭا جولدارىن ۇسىندى»، - دەپ ەسكە الادى فيلم اۆتورى.

راسىمەن، سول وقيعادان كەيىن شەتەلدىك ەڭبەك ميگرانتتارىنا بەرىلەتىن كۆوتا سانى 40 پايىزعا ازايتىلعان بولاتىن.

فيلمدە مەملەكەت باسشىسىنىڭ ارىس قالاسىنا بارىپ، جەرگىلىكتى تۇرعىندارمەن اڭگىمەلەسكەن ساتتەرى دە بەرىلگەن.

«قازاقستاننىڭ جاڭا پرەزيدەنتى ءۇشىن 2019 جىلعى ماۋسىمدا ارىس قالاسىنداعى اسكەري قويمالارداعى وق-دارىلەردىڭ جارىلىسى جالىندى سىناق بولدى. بۇل ون جىلداعى ءتورتىنشى جاعداي ەدى»، - دەلىنگەن فيلمدە.

جامبىل وبلىسىنىڭ قورداي اۋدانىنداعى شيەلەنىستى وقيعالار دا اۆتوردىڭ نازارىنان تىس قالماعان.

«سايلاۋدان كەيىن قاسىم-جومارت توقاەۆ ءوزىنىڭ پرەزيدەنتتىك كۇن تارتىبىنە بىردەن ەنىپ كەتە المادى. سىناقتار بىرىنەن سوڭ ءبىرى شىعىپ جاتتى. ءسويتىپ ءجۇرىپ كۇن تارتىبىنە كوروناۆيرۋس پاندەمياسى شىقتى. كوپتەگەن جوبالار ارتتا قالدى. پرەزيدەنت توقاەۆتىڭ الدىندا قازاقستاندىقتاردى COVID-19-دان، ال مەملەكەتتى ەكونوميكالىق داعدارىستان قۇتقارۋ جانە ساقتاۋ مىندەتى تۇردى»، - دەيدى اسىلبەك ابدۋلوۆ.

سونداي-اق، ول قاسىم-جومارت توقاەۆتىڭ ديماش قۇدايبەرگەن، يمانبەك زەيكەنوۆ، ايسۇلتان سەيىتوۆ، نۇرلان سابۋروۆ سياقتى جانە دارىندى جاس قازاقستاندىقتارعا سىرتتاي دەمەۋ بولىپ جۇرگەنىن اتايدى.

«كوروناۆيرۋس پاندەمياسى قازاقستانعا بيلىك اۋىسىپ بولىپ، ساياسي رەفورمالار كۇن تارتىبىنە شىققان كەزدە كەلدى. بىراق پاندەميا مۇنداي ماڭىزدى ىسكە كەدەرگى بولعان جوق. پرەزيدەنت توقاەۆ ايتقانداي، اۋقىمدى ساياسي رەفورمالار جالعاسىپ جاتىر. قاسىم-جومارت توقاەۆ ءتيىمدى داعدارىس مەنەدجەرى مەن رەفورماتوردىڭ قاسيەتتەرىن ءساتتى ۇيلەستىرىپ كەلەدى»، - دەپ تۇيىندەدى اسىلبەك ابدۋلوۆ.

Abai.kz