قىتايدىڭ قازاقستاننان بارعان جۇكتى قابىلداماۋىنا بايلانىستى اۆتوكولىك يەلەرى مەن ەكسپورتتاۋشىلار ۇلكەن شىعىنعا باتتى. بۇل تۋرالى LS مالىمدەدى. 

«قتج-جۇك تاسىمالى» باس ديرەكتورى ۆلاديمير پەتروۆ 11 ماۋسىمنان 20 ماۋسىمعا دەيىن دوستىق ستانتسياسى (قىتاي) باعىتىندا كونتەينەرلەردەگى جۇكتەردەن باسقا بارلىق جۇكتەردى تاسىمالداۋعا تىيىم سالىنعانىن ايتتى.

ونىڭ ايتۋىنشا، قاتاڭ انتيكوۆيدتىك شارالارعا بايلانىستى قحر جۇكتەلگەن ۆاگونداردى ۋاقىتىندا قابىلدامايدى. قازىرگى ۋاقىتتا حالىقارالىق تۇيىندەردە 180-دەن استام جۇك پويىزدارىنىڭ قوزعالىسى توقتاتىلعان. بۇل قازاقستاننىڭ ماگيسترالدىق جەلىسىنىڭ وتكىزۋ قابىلەتىن تومەندەتەدى.

سونداي-اق، ول تىيىم سالۋ كەزىندە قتج قاراۋسىز قالعان پويىزداردى قىتاي جاعىنا بەرۋدى جوسپارلاپ وتىرعانىن قوستى.

سونىمەن بىرگە، كازاپو-نىڭ باس ديرەكتورى سالتانات ادامباەۆا شەكاراعا جاقىنداعان ۆاگونداردىڭ كەشىگۋى كولىك يەلەرىنىڭ قالتالارىنا تيەتىندىگىن اتاپ ءوتتى.

«ءبىز ۇلكەن شىعىنعا ۇشىرايمىز. ۆاگونداردىڭ مارشرۋت بويىنشا كەشىگۋىن بولدىرماۋ ءۇشىن شەكتەۋ شارالارىن ەنگىزۋ ماسەلەسىن شەشىپ، ايىپپۇلداردى قاراستىرۋىمىز كەرەك»، - دەدى ول.

ءوز كەزەگىندە، يندۋستريا جانە ينفراقۇرىلىمدى دامىتۋ مينيسترلىگى تاسىمالداۋشىعا مارشرۋت بويىندا پويىزداردىڭ كەشىگۋىن بولدىرماۋ ءۇشىن قاجەتتى شەكتەۋ شارالارىن قابىلداۋدى تاپسىردى. سونداي-اق، جۇك تيەلگەن ۆاگونداردى قابىلداۋ بويىنشا قىتايمەن جۇمىستى كۇشەيتۋ جانە بالامالى تاسىمالداۋ نۇسقالارىن، سونىڭ ىشىندە كونتەينەرلىك تاسىمالداۋعا كوشۋدى قاراستىرۋ قاجەتتىگى ايتىلدى.

Abai.kz