15 ماۋسىمدا ازەربايجان رەسپۋبليكاسىنىڭ پرەزيدەنتى يلحام اليەۆ پەن تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان وتكەن جىلى ازات ەتىلگەن شۋشا قالاسىندا رەسمي كەزدەسۋ وتكىزدى.

كەزدەسۋ بارىسىندا «ازەربايجان رەسپۋبليكاسى مەن تۇركيا رەسپۋبليكاسى اراسىنداعى وداقتاستىق قاتىناستار تۋرالى شۋشا دەكلاراتسياسىنا» قول قويىلدى. بۇل تۋرالى «AZƏRTAC» اقپارات اگەنتىگى حابارلادى.

اتالعان دەكلاراتسيا ارقىلى تاراپتار اۋماقتىق تۇتاستىققا قاۋىپ تونگەن جاعدايدا ءبىر-بىرىنە اسكەري جانە باسقا دا قاجەتتى كومەكتەردى كورسەتۋ، «زانگەزۋر ءدالىزىن»  ىسكە قوسۋ ماسەلەسى، شۋشادا تۇركيا رەسپۋبليكاسىنىڭ كونسۋلدىعىن اشۋ جانە حالىقارالىق دەڭگەيدەگى ىنتىماقتاستىقتى كەڭەيتۋ، ساياسي جانە ساۋدا-ەكونوميكالىق بايلانىستاردى نىعايتۋ، مادەنيەت، ءبىلىم، سپورت، جاستار ساياساتى باعىتىندا بىرلەسكەن ءىس-شارالار اتقارۋ بويىنشا ۋاعدالاستىققا قول جەتكىزدى.

Abai.kz