اراعا ايلار سالىپ ارمەنياعا ەل نازارى تاعى اۋدى. بۇل جولى سوعىس ەمەس، سايلاۋ ەلدى وزىنە ەلەڭ ەتكىزدى. ارمەنيا سوعىستان جەڭىلىپ، ساياسي جانە ەكونوميكالىق داعدارىستى باستان وتكەرىپ جاتىر.

پارلامەنت سايلاۋى بۇل جولى وتكىر پىكىرتالاس پەن قوعامدىق ءبولىنىس نەگىزىندە جۇرۋدە. پارتيالار "قاراباقتى قايتا ارمەنيا قۇرامىنا قوسامىز", دەپ ورىندالماس ۋادەنى ءۇيىپ-توگۋدە. پاشينيانعا باس قارسىلاس - بۇرىنعى پرەزيدەنت كوچاريان بولىپ تۇر.

كەشە ارمەنيادا سايلاۋ ءوتتى. سايلاۋعا جيىنتىعى 26 پارتيا مەن بلوك قاتىسقان. نيكول پاشينيان "ازاماتتىق كەلىسىم" پارتياسىنىڭ اتىنان پرەمەر مينيسترلىككە ۇمىتكەر بولسا، وعان باستى قارسىلاس "اياستان" پارتياسىنان بۇرىنعى پرەزيدەنت روبەرت كوچاريان بولۋدا. وزگە پارتيالار دا جەڭىستەن ءۇمىتتى. پارلامەنتتەن ورىن الۋ ءۇشىن پارتيالار 5%-دىق، ال ساياسي بلوكتار 7%-دىق مەجەدەن اسۋى ءتيىس. سايلاۋدىڭ ءوتۋ بارىسىن باقىلاۋعا 483 حالىقارالىق ۇيىم قاتىسقان. ولار سايلاۋدىڭ جوعارى دارەجەدە وتكەنىن ايتۋدا.

"قالالىق ايماقتاردا داۋىس بەرۋشىلەر سانى كوپ، ال اۋىلدىق جەردە سايلاۋعا قاتىسۋشىلار سانى از", دەپ باعالادى ساراپشىلار. بۇل كەز كەلگەن مەملەكەتتەگى سىندى قۇبىلىس، ساياسي جانە ەكونوميكالىق وزگەرىستەر قالادا جۇرەتىنى انىق، سوندىقتان قالا حالقىنىڭ كوپ قاتىسۋى دا زاڭدىلىق.

جالپى داۋىس بەرۋشىلەردىڭ تىزىمىنە 2,5 ملن ادام ەنگىزىلگەن. ونىڭ ىشىندە سوڭعى مالىمەتتەر بويىنشا ناقتى سايلاۋعا قاتىسقاندار سانى 1 281 000 ادام. بۇل جوعارى كورسەتكىش بولىپ سانالادى. سەبەبى 2018 جىلى ارمەنيادا مەرزىمىنەن بۇرىن وتكەن سايلاۋعا 1 ملن 260 مىڭ ادام 11 پارتياعا داۋىس بەرگەن ەدى. بيىل قاتىسۋشىلار سانى دا، پارتيالار سانى دا ارتقانىن كورىپ وتىرمىز. ساراپشىلار سوعىستان كەيىن حالىقتىڭ بەلسەندىلىگى باسەڭدەپ، ساياسي پروتسەسسكە قىزىعۋشىلىعى ازايادى دەپ بولجاعان ەدى. ولاي بولمادى.

سايلاۋالدى ۇگىت-ناسيحات قاتاڭ تالاپتا ءوتتى. پاشينيان ازەربايجان تۇتقىنىنداعى ارميانداردى قايتارۋ ءۇشىن ءتىپتى، ۇلىن الماستىرۋعا دايىن ەكەنىن مالىمدەسە، كوچاريان "قاراباقتى قايتا قوسامىن", دەپ اتوي سالدى. وزگە پارتيالار دا قالىسپادى. كوپشىلىگى پاشينياندى تۇرىك كەيپىندە بەينەلەپ، ءتۇرلى ۇگىت ماتەريالدارىن تاراتىپ جاتتى. ويتكەنى بارلىعى دا بۇل سايلاۋداعى باستى قارسىلاسى پاشينياننىڭ "ازاماتتىق كەلىسىم" پارتياسى ەكەنىن جاقسى ءتۇسىندى.

قازىردىڭ وزىندە سايلاۋدىڭ ناتيجەسى بەلگىلى. پاشينيان جەڭىسكە جەتتى. 2008 سايلاۋ ۋچاسكەسىنەن كەلىپ تۇسكەن بيۋللەتەندەر سانالىپ، ورتالىق سايلاۋ كوميتەتى سايلاۋ ناتيجەلەرىن جاريالاپ جاتىر. پاشينياننىڭ "ازاماتتىق كەلىسىم" پارتياسى 53,92% داۋىس العان. ال وعان باستى قارسىلاس بولعان روبەرت كوچاريان قۇرعان "اياستان" (ارمەنيا) بلوگى 21,04% داۋىستى قانجىعاسىنا ەنشىلەدى. بۇرىنعى پرەزيدەنت سەرج سارگسياننىڭ "نامىسىم بار" ساياسي بلوگى 5,23% پايىز داۋىس الدى. ساياسي بلوك كەمى 7% داۋىس جيناۋ كەرەك ەكەنىن ەسكەرسەك، پارلامەنتتە بۇل بلوكتى كورمەيمىز. قالعان داۋىستار وزگە پارتيالار اراسىندا بولىنگەن جانە 5%-عا جەتپەيدى. قازىردىڭ وزىندە كوچاريان سايلاۋ ناتيجەسىن مويىندامايتىنىن مالىمدەپ، ۇزاق مەرزىمدى قارسىلىق اكتسيالارىنا شاقىرۋدا.

جاڭا ۇكىمەت قۇرامىن پاشينيانعا جاساقتاۋ قيىنعا سوعادى. "سوعىستان جەڭىلىس تاپقان باسشىنىڭ جاڭا باستامالارىنا سەنەتىندەر از", دەيدى ساراپشىلار. كۇزدەن باستاپ ءتىپتى پاشينيان پارتياسىنىڭ قۇرامىندا بولعان بەلدى شەنەۋنىكتەر دە وعان قارسى شىعىپ، پارتيادان كەتۋدى ءجون ساناعان. ارمەنياداعى ساياسي داعدارىس اسقىنعان كۇيدە تۇر. قازان ايىنا دەيىن تۇتقىنداردى قايتارا الماسا، سوعىستىڭ بىتۋىنە ءبىر جىل بولعان ساتتە ارمەنياداعى ساياسي داعدارىس ءتىپتى اسقىنىپ، ۇلكەن قاقتىعىستارعا ۇلاسۋى مۇمكىن.

Abai.kz