تۇركىستاندا «تۇركىستان - تۇركى الەمىنىڭ بەسىگى» اتتى تۇركى ەلدەرىنىڭ جاستار كوشباسشىلارى مەن بەلسەندىلەرىنىڭ حالىقارالىق ءسامميتىنىڭ پلەنارلىق وتىرىسى ءوتتى.

قر اقپارات جانە قوعامدىق دامۋ مينيسترلىگى ۇيىمداستىرعان باسقوسۋدا «تۇركىستان – تۇركى الەمىنىڭ رۋحاني استاناسى» يدەياسىن ىلگەرىلەتۋ مەن مادەني تۋريزم، بىرلەسكەن جاستار لاگەرلەرىن ۇيىمداستىرۋ مەن جاستار ۇيىمدارىنىڭ ىنتىماقتاستىعى جانە ت. ب. باعىتتار بويىنشا ىنتىماقتاستىق ماسەلەلەرى تاقىلاندى.

قازاقستان رەسپۋبليكاسى تاۋەلسىزدىگىنىڭ 30 جىلدىعىنا ورايلاستىرىلعان ءسامميتى ونلاين جانە وفلاين فورماتتا ءوتىپ، وعان 300-دەن استام ادام قاتىستى. جيىندا تۇركىستىلدەس حالىقتارىنىڭ وكىلدەرى ءسوز سويلەپ، القالى شارانىڭ ماڭىزدىلىعىن اتاپ ءوتتى. فورۋمعا قازاقستان رەسپۋبليكاسى پارلامەنتى سەناتىنىڭ توراعاسى ماۋلەن اشىمباەۆ ۆيدەو-بايلانىس رەجيمى ارقىلى قاتىسىپ، قۇتتىقتاۋ ءسوز سويلەدى.

ءوز سوزىندە ماۋلەن اشىمباەۆ تۇركىستاننىڭ تۇركى الەمىنىڭ تاريحىندا ءرولى ەرەكشە ەكەنىنە نازار اۋداردى. ول كونە شاھاردىڭ قايتا تۇلەۋى تۇتاس تۇركى الەمى ءۇشىن ماڭىزدى ەكەنىن تىلگە تيەك ەتىپ، مۇنداي قادام ورتاق تاريحىمىزدى ساقتاۋعا جانە تۇركىتىلدەس حالىقتاردىڭ قارىم-قاتىناسىن ودان ءارى نىعايتۋعا ىقپال ەتەتىن ايتتى. سەنات توراعاسى ەلباسىنىڭ تاريحي شەشىمى مەن مەملەكەت باسشىسىنىڭ قالانىڭ دامۋىنا ەرەكشە كوڭىل ءبولۋىنىڭ ارقاسىندا تۇركىستان سوڭعى جىلدارى زاماناۋي، كورىكتى قالاعا اينالعانىن اتاپ ءوتتى.

«قازىرگى تاڭدا كونە تۇركىستاننىڭ جاڭا بەينەسى قالىپتاسۋدا. شاھاردىڭ وسىنداي جەتىستىگى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ جاسامپاز شەشىمىنىڭ ناتيجەسى. وسىدان ءۇش جىل بۇرىن ەلباسى تۇركىستان وبلىسىن قۇرۋ تۋرالى تاريحي جارلىققا قول قويعان ەدى. سودان باستاپ قالانىڭ ەكىنشى تىنىسى اشىلدى. تۇركىستاندى دامىتۋ ىسىنە قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ باسا ءمان بەرىپ كەلەدى. كوكتەمدە وتكەن تۇركىتىلدەس مەملەكەتتەر باسشىلارىنىڭ سامميتىندە تۇركىستاننىڭ «تۇركى الەمىنىڭ رۋحاني استاناسى» بولىپ جاريالانۋى سونىڭ جارقىن كورىنىسى»، – دەدى ماۋلەن اشىمباەۆ.

جيىندا اقپارات جانە قوعامدىق دامۋ ءمينيسترى ايدا بالاەۆا ءسوز سويلەپ، بۇگىندە تۇركىتىلدەس ەلدەر اراسىنداعى قارىم-قاتىناس بەلسەندى دامىپ كەلە جاتقانىن اتاپ ءوتتى. وسىنداي اۋقىمدى جۇمىستاردىڭ اياسىندا تۇركى مەملەكەتتەرىنىڭ جاستارى اراسىنداعى ىنتىماقتاستىقتى نىعايتۋ ماسەلەسى دە باستى نازاردا ەكەنىن جەتكىزدى.

"بۇگىنگى جاستارىمىزدىڭ ءوزارا ىنتىماقتاستىعى مەن دوستىعى، بىرىككەن باستامالارى مەن جوبالارى – ءبىزدىڭ مەملەكەتتەر اراسىنداعى بايلانىستى ودان ارى نىعايتۋدىڭ بىردەن-ءبىر كەپىلى. جاستار ساياساتىنداعى ىنتىماقتاستىقتى تەرەڭ دامىتۋ قاشاندا باستى نازاردا. بۇل ماقساتتا ءبىز جاقىندا تۇركيا مەملەكەتىمەن جاستار ساياساتى ستراتەگيالىق سەسسياسىن وتكىزگەن بولاتىنبىز. ناتيجەسى مول جيىندا ەكى ەلگە ورتاق وزەكتى ماسەلەلەر قارالىپ، جاستاردىڭ رەسۋرستىق ورتالىعى ۆولونتەرلىك قوزعالىس، الەۋمەتتىك قولداۋ سالالارىندا ءوزارا تاجىريبە الماسۋ جونىندە كەلىسىمگە كەلدىك. وسىنداي ستراتەگيالىق سەسسيالاردى قىزىعۋشىلىق تانىتقان بارلىق تۇركى مەملەكەتتەرىمەن بىرلەسىپ وتكىزۋ الداعى جوسپاردا بار. سونىمەن قاتار، باۋىرلاس ەلدەردىڭ جاستارىنا ارنالعان ياساۋي اتىنداعى 50 گرانتتىڭ ءبولىنۋى – ءبىلىم بەرۋ سالاسىنداعى ارىپتەستىكتى جاڭا دەڭگەيگە كوتەرىپ، مادەني-اعارتۋشىلىق كەڭىستىكتى كەڭەيتۋگە تىڭ سەرپىن بەرەدى دەپ سەنەمىن. بۇل ورايدا، ءبىز تۇركى ەلدەرىنىڭ جاس عالىمدارىن وسى جانە باسقا دا عىلىمي جوبالار اياسىندا ىنتىماقتاستىق ورناتىپ، بىرلەسە جۇمىس اتقارۋعا شاقىرامىز. بۇنداي قادامدار – جاس عالىمدار ارقىلى عىلىمي بايلانىستى جاڭا دەڭگەيگە كوتەرىپ، ورتاق تاريحىمىزدىڭ ءوز ەلدەرىمىزدە كەڭىنەن ناسياتتاۋعا جول اشاپ ەدى،- دەدى ايدا بالاەۆا.

جيىندا سونىمەن قاتار تۇركپا باس حاتشىسى التىنبەك مامايۋسۋپوۆ پەن حالىقارالىق تۇركى اكادەمياسىنىڭ پرەزيدەنتى دارحان قىدىرالى جانە تۇركىتىلدەس ەلدەردىڭ بىرقاتار بەلسەندى جاستارى ءسوز سويلەدى.

Abai.kz