Capital Bank Kazakhstan اق-تى ليتسەنزياسىنان ايىرىلدى. بۇل تۋرالى قر قارجى نارىعىن رەتتەۋ جانە دامىتۋ اگەنتتىگى مالىمدەدى. 

«قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى (بۇدان ءارى – اگەنتتىك) باسقارماسىنىڭ 2021 جىلعى 24 ماۋسىمداعى № 74 قاۋلىسىنا سايكەس بانكتى اگەنتتىك بانك جانە وزگە دە وپەراتسيالاردى جانە باعالى قاعازدار نارىعىندا قىزمەتتى جۇرگىزۋگە بەرگەن ليتسەنزيادان ايىرۋ تۋرالى شەشىم قابىلداندى»،- دەلىنگەن اگەنتتىك مالىمەتىندە.

بانكتىڭ ليتسەنزياسىنان ايىرىلۋىنا:

– پرۋدەنتسيالىق نورماتيۆتەردى جانە (نەمەسە) باسقا دا ساقتالۋى مىندەتتى وزگە دە نورمالار مەن ليميتتەردى جۇيەلى تۇردە (قاتارىنان كۇنتىزبەلىك ون ەكى ايدىڭ ىشىندە ءۇش جانە ودان كوپ رەت) بۇزۋ;

– قاداعالاپ دەن قويۋ شارالارىن جۇيەلى تۇردە (قاتارىنان كۇنتىزبەلىك ون ەكى ايدىڭ ىشىندە ءۇش جانە ودان كوپ رەت) ورىنداماۋ;

– ۋاكىلەتتى ورگاننىڭ قوسىمشا كاپيتالداندىرۋ جونىندەگى تالاپتارىن بانكتىڭ ءىرى قاتىسۋشىسىنىڭ ورىنداماۋى;

– بانكتى تولەمگە قابىلەتسىز بانك ساناتىنا جاتقىزۋ سەبەپ بولعان.

ليتسەنزيادان ايىرۋ كۇنگى جاعداي بويىنشا بانك اكتيۆتەرىنىڭ مولشەرى 38,5 ملرد تەڭگەنى، نەسيە پورتفەلى – 33,9 ملرد تەڭگەنى قۇرادى، ونىڭ ىشىندە 30,4 ملرد تەڭگە نەمەسە بانكتىڭ نەسيە پورتفەلىنىڭ 89,8%-ى – 90 كۇننەن استام مەرزىمى وتكەن جۇمىس ىستەمەيتىن كرەديتتەر. بانكتىڭ ءوتىمدى اكتيۆتەرىنىڭ مولشەرى 149 ملن تەڭگەنى قۇرايدى، بۇل رەتتە ورىندالماعان كليەنتتىك تولەمدەردىڭ كولەمى 15,0 ملرد تەڭگەدەن اسادى.

پرۋدەنتسيالىق نورماتيۆتەردى ورىنداماۋىنا بايلانىستى اگەنتتىك بانككە قاتىستى 29 قاداعالاپ دەن قويۋ شاراسىن قابىلداپ، 67 اكىمشىلىك قۇقىق بۇزۋشىلىق تۋرالى حاتتاما جاسادى.

2020 جىلى بانك اكتسيونەرى بانكتىڭ قارجىلىق جاعدايىن جاقسارتۋ جونىندەگى ءىس-شارالار جوسپارىن ۇسىندى. كورسەتىلگەن جوسپاردى ورىنداۋ شەڭبەرىندە اگەنتتىكتىڭ قاتاڭ باقىلاۋىمەن بانك 2020 جانە 2021 جىلدارى بانكتىڭ دەپوزيتورلار الدىنداعى 31 ملرد تەڭگە سوماسىنداعى مىندەتتەمەلەرىن تومەندەتتى.

جوسپاردى ىسكە اسىرۋ شەڭبەرىندە الەۋمەتتىك تۇرعىدان ماڭىزدى مەكەمەلەر (مەكتەپتەر مەن اۋرۋحانالار) الدىنداعى مىندەتتەمەلەر تولىعىمەن جانە كۆازيمەملەكەتتىك سەكتور الدىنداعى مىندەتتەمەلەردىڭ ايتارلىقتاي بولىگى دە وتەلدى.

الايدا، بانك جانە ونىڭ اكتسيونەرى قابىلداعان شارالار بانكتىڭ قارجىلىق جاعدايىن تۇراقتاندىرۋعا اكەلگەن جوق. بانك پرۋدەنتسيالىق نورماتيۆتەردى بۇزۋدى جالعاستىرۋدا جانە بانك كليەنتتەرى الدىنداعى تولەمدەر مەن اۋدارىمدار بويىنشا مىندەتتەمەلەرىن ورىندامايدى.

بانك سالىمشىلارىنىڭ، جەكە تۇلعالاردىڭ 99%-نىڭ دەپوزيتتەرى «قازاقستاننىڭ دەپوزيتتەرگە كەپىلدىك بەرۋ قورى» اق-تىڭ كەپىلدىگىمەن تولىق كولەمدە وتەلەدى.

اگەنتتىك توراعاسىنىڭ 2021 جىلعى 24 ماۋسىمداعى №206 بۇيرىعىمەن ۋاقىتشا اكىمشىلىك تاعايىندالدى، وعان بانكتىڭ بارلىق باسقارۋ ورگاندارىنىڭ وكىلەتتىكتەرى اۋىستى. ۋاقىتشا اكىمشىلىك بانكتىڭ تاراتۋ كوميسسياسى تاعايىندالعانعا دەيىن ارەكەت ەتەتىن بولادى. ۋاقىتشا اكىمشىلىكتىڭ باسشىسى بولىپ اگەنتتىكتىڭ قىزمەتكەرى شولپان تايشىققىزى توقسەيىتوۆا تاعايىندالدى.

2021 جىلعى 25 ماۋسىمنان باستاپ قر زاڭناماسىندا كوزدەلگەن جاعدايلاردى قوسپاعاندا، كليەنتتەردىڭ جانە بانكتىڭ ءوزىنىڭ بانك شوتتارى بويىنشا بارلىق وپەراتسيالار توقتاتىلدى. اگەنتتىك زاڭنامادا بەلگىلەنگەن تارتىپپەن سوتقا بانكتىڭ قىزمەتىن ماجبۇرلەپ توقتاتۋ (تاراتۋ) تۋرالى وتىنىشپەن جۇگىنەدى.

سوت بانكتى ماجبۇرلەپ تاراتۋ تۋرالى ءىس قوزعاعان كۇننەن باستاپ بانكتى ۇستاۋعا ارنالعان اعىمداعى شىعىستارمەن بايلانىستى تالاپتاردى جانە قازاقستان رەسپۋبليكاسىنىڭ زاڭناماسىندا بەلگىلەنگەن وزگە دە جاعدايلاردى قوسپاعاندا، كرەديتورلاردىڭ بانككە تالاپتارى تاراتۋ وندىرىسىندە عانا قويىلا الادى.

بارلىق قىزىعۋشىلىق تانىتقان سۇراقتار بويىنشا «Capital Bank Kazakhstan» اق-تىڭ ۋاقىتشا اكىمشىلىگىنە +7 (727) 331 66 77 تەلەفونى ارقىلى حابارلاسۋعا بولادى.

Abai.kz