بەلارۋس ەلىنىڭ پرەمەر-ءمينيسترى رومان گولوۆچەنكو مەن قازاقستاننىڭ پرەمەرى اسقار ءمامين قازاقستاندىق مۇنايدى بەلارۋسقا جەتكىزۋ بويىنشا كەلىسىمگە قول قويدى. 

"بۇگىن نۇر-سۇلتان قالاسىندا ەكى ەل پرەمەرلەرى مۇناي جانە مۇناي ونىمدەرىن جەتكىزۋ بويىنشا ۇكىمەتارالىق كەلىسىم جاساستى", — دەپ حابارلادى بەلارۋس ۇكىمەتىنىڭ رەسمي سايتى.

مۇناي كولەمى مەن جەتكىزىلۋ ۋاقىتى بويىنشا ناقتى شەشىمدەر الداعى كەلىسسوزدەردە انىقتالماق. مينسك مۇنايدى رەسەيدەن ەمەس، باسقا ەلدەن تاسۋدىڭ جولىن ىزدەگەنىنە بىرنەشە جىل بولدى. قازاقستانمەن كەلىسسوزدەر بىرنەشە جىل ءجۇرىپ كەلەدى، الايدا ءالى جۇيەلى ناتيجە جوق.

لۋكاشەنكو رەجيمى ماسكەۋمەن قىرعي-قاباق ساياساتىن ۇستانعان كەزەڭدە مينسككە ۆاشينگتون مۇناي جەتكىزۋ بويىنشا ۇسىنىس جاساپ، ءبىر مارتە مۇناي بەرگەن ەدى. الايدا ءوزىنىڭ ەسسىز ارەكەتتەرىمەن باتىستىڭ سانكتسياسىنا ىلىككەن لۋكاشەنكونىڭ قازاقستان مەن تاياۋ شىعىس ەلدەرىنەن باسقا مۇناي الاتىن مەملەكەتتەرى قالمادى.

Abai.kz