ددسۇ-نىڭ باسشىسى تەدروس ادانوم گەبرەيەسۋس الەمدىك قاۋىمداستىقتى COVID-19 پاندەمياسىنان ساباق الىپ، جاڭا پاندەميالارعا دايىندالۋعا شاقىردى.  

ونىڭ ايتۋىنشا جاڭا ۆيرۋستار مەن پاندەميالار ەندى كۇندەلىكتى ءومىردىڭ ءبىر كورىنىسىنە اينالۋى مۇمكىن. ونى جەڭۋدىڭ جولى مەديتسينانى دامىتۋ جانە دەر كەزىندە رەاكتسيا جاساۋ.

گەبرەيەسۋس قازىرگى تاڭدا الەمدە ۆاكتسينا الۋ جاعىنان تەڭسىزدىك بارىن اتاپ ءوتتى. ول ارتتا قالعان ەلدەر ۆاكتسيناعا قول جەتكىزە الماي جاتقانىن، ال ۆاكتسينا العان حالىقتىڭ 77 پايىزى 10 ەلدە تۇراتىنىن تىلگە تيەك ەتكەن. ددسۇ COVAX مەحانيزمىنە ۇلكەن ءمان بەرۋگە شاقىردى. اتالمىش مەحانيزم بويىنشا دامىعان ەلدەر ارتتا قالعان ەلدەرگە ۆاكتسينا الۋعا جاردەمدەسەدى. باعدارلاما اياسىندا 2021 جىلى 2 ملرد دوزا ۆاكتسينا ارتتا قالعان ەلدەرگە كومەك رەتىندە جەتكىزىلەدى دەپ جوسپارلانۋدا.

Abai.kz