پارلامەنت پالاتالارىنىڭ بىرلەسكەن وتىرىسىندا ءماجىلىس توراعاسى نۇرلان نىعماتۋلين اتاپ وتكەندەي، وسى سەسسيادا پارلامەنتتىڭ ەكى پالاتاسىنىڭ جۇمىسىندا ءماجىلىس پەن سەنات دەپۋتاتتارى وزدەرى باستاماشى بولعان 24 زاڭ جوباسى بولدى. ونىڭ 15-ءى وسى ۋاقىتقا دەيىن قاراستىرىلىپ، قابىلداندى. زاڭ جوبالارى قوعام ءومىرىنىڭ وزەكتى ماسەلەلەرىن شەشۋگە باعىتتالدى.

اتاپ ايتقاندا، سوت جۇيەسى مەن سۋديالارىنىڭ مارتەبەسى تۋرالى  كونستيتۋتسيالىق زاڭ، اكىمشىلىك قۇقىق بۇزۋشىلىق تۋرالى كودەكسكە وزگەرىستەر ەنگىزۋگا قاتىستى زاڭ جوبالارى. جۇرگىزىلگەن رەفورمالار سوت جۇيەسىنە جاڭا بىلىكتى مامانداردى جۇمىلدىرىپ، ءادىل سوت تورەلىگىن قامتاماسىز ەتۋدى كوزدەيدى. بۇنداي شارالار، ەڭ الدىمەن، حالىقتىڭ سوتتارعا دەگەن سەنىمىن نىعايتۋ ءۇشىن قابىلدانۋدا.

سونىمەن قاتار، دەپۋتاتتار باستاماسىمەن «الەۋمەتتىك كاسىپكەرلىك جانە مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا»، «قاشىقتىقتان جۇمىس ىستەۋدى قۇقىقتىق رەتتەۋدى جەتىلدىرۋ ماسەلەلەرى بويىنشا» جانە «ينكليۋزيۆتى ءبىلىم بەرۋ ماسەلەلەرى بويىنشا» جانە تاعى باسقا دا بىقاتار ماڭىزدى زاڭ جوبالارىن ازىرلەدى.

ءبىرىنشى سەسسيا جۇمىسى بارىسىندا ءماجىلىس دەپۋتاتتارى 233, سەنات دەپۋتاتتارى 45 دەپۋتاتتىق ساۋالدار جولدادى. ولار يندۋستريالىق-يننوۆاتسيالىق دامۋ، قارجى، بانك جۇيەسى، ءبىلىم بەرۋ، دەنساۋلىق ساقتاۋ، الەۋمەتتىك قورعاۋ جانە وڭىرلىك دامۋ، تۇرعىن-ءۇي كوممۋنالدىق شارۋاشىلىعى، قورعانىس، قۇقىق ءتارتىبى، اقپاراتتىق قاۋىپسىزدىك جانە باسقا دا ماڭىزدى ماسەلەلەرگە ارنالدى.

نۇرلان نىعماتۋلين ماجىلىسكە وتكەن بارلىق فراكتسيانىڭ، سونىمەن بىرگە، قازاقستان حالقى اسسامبلەياسىنىڭ دەپۋتاتتارى ءبىرىنشى كۇننەن باستاپ،  بىرلەسە ەڭبەك ەتىپ كەلە جاتقانىن العا تارتىپ:

- بارلىق كۇش-جىگەر، ءبىلىم-تاجىريبە جانە ساياسي جاۋاپكەرشىلىك – ەلباسىمىزدىڭ ستراتەگيالىق باستامالارىن، سونىمەن بىرگە، پرەزيدەنتىمىزدىڭ سەسسيانىڭ اشىلۋىندا العا قويعان مىندەتتەرىن جۇزەگە اسىرۋعا ارنالدى. ونىڭ بارلىعى، ەلىمىزدىڭ تۇراقتى دامۋىن قامتاماسىز ەتۋگە، حالقىمىزدىڭ  ءومىر ساپاسىن    ارتتىرۋعا  جول  اشتى، - دەدى.

Abai.kz