«Qazaqstan» تەلەارناسىنان نۇرسۇلتان نازارباەۆتىڭ ارنايى سۇحباتىنا نەگىزدەلگەن «Nur-Sultan. قولتاڭبا» دەرەكتى ءفيلمى شىعادى.  ەلباسى سۇحباتىندا ەلوردانىڭ وتكەنى مەن بولاشاعى تۋرالى ساۋالدارعا جاۋاپ بەردى.

«ەل استاناسىن ورتالىققا كوشىرۋ تۋرالى شەشىمدى قابىلداۋ وڭاي بولعان جوق. كوپشىلىك قارسى بولدى. رەسپۋبليكا استاناسى رەتىندە قاراستىرعان قالالار تىزىمىندە الماتى، اقتوبە، ءوزىم جيىرما جىل قىزمەت ەتكەن قاراعاندى بار ەدى. بىراق قازىرگى شەشىمىمە وكىنبەيمىن. استانا ەلدىڭ باسىن بىرىكتىرگەن ۇلكەن شاھارعا اينالدى. جوسپار بويىنشا 500-600 مىڭ تۇرعىنى بار اكىمشىلىك قالا بولۋى ءتيىس ەدى، بىراق قالانىڭ ءومىرىن توقتاتۋعا بولمايتىنىن تۇسىندىك»، - دەدى ەلباسى جۋرناليست ءلاززات تانىسبايعا بەرگەن سۇحباتىندا.

سۇحباتتا ن.نازارباەۆ ساياسي تاۋەكەلدەرگە بارۋ سەبەپتەرىن، سونىمەن بىرگە ەلوردا حالقىنىڭ بولاشاقتاعى شەكتى سانى، كەلەشەكتە قالا تۇرعىندارىنا جاسالاتىن يگىلىكتەر مەن قالا قۇرىلىسىنا قاتىستى جاڭا جوسپارلار تۋرالى باياندايدى.

جوبادا قازاقستاندىق ساۋلەتشىلەر، قالاداعى ەرەكشە نىسانداردى سالۋعا اتسالىسقان امانجول چيكاناەۆ، سەرىك رۋستامبەكوۆ، بايعۇتتى تورتاەۆ، بريتانيالىق ارحيتەكتور نورمان فوستەردىڭ سۇحباتتارى بار. 

دەرەكتى فيلم «Qazaqstan» ارناسىنان 5 شىلدە 20:00-دە ەفيرگە شىعادى.

Abai.kz