«جۇيە ءتيىمسىز بولسا، نوبەل الساڭ دا، بيۋروكراتقا اينالاسىڭ»
قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ «اشىق ديالوگ» الاڭىندا مەملەكەت باسشىسى قاسىم-جومارت توقاەۆتىڭ جەمقورلىقپەن كۇرەس تۋرالى سوڭعى مالىمدەمەسىنە قاتىستى پىكىر ءبىلدىردى، دەپ حابارلايدى قازاقپارات.
اپتا ىشىندەگى باستى ساياسي اقپاراتتارعا تالداۋ جاسالعان باعدارلامادا داۋرەن اباەۆ ارام ويى بولماي جەمقورلىق قاتەلىككە بوي الدىرعان مەملەكەتتىك قىزمەتشىگە قىلمىستىق جازا قولدانباۋ تۋرالى قر پرەزيدەنتىنىڭ پىكىرىنە تۇسىنىك بەردى.
«بۇل ماسەلەدەگى مەملەكەت ساياساتىن تۇنىق ءتۇسىندىرۋ ءۇشىن ماعان كوزگە كورىنەۋ جايتتاردى ايتۋ كەرەك سياقتى. قازىر بيلىك مەملەكەتتىك باسقارۋدىڭ ساپاسى شىنىمەن تومەندەپ كەتكەنىن كورىپ، ءبىلىپ وتىر. ءبىز ورتالىق دەڭگەيدە دە، جەرگىلىكتى اۋقىمدا دا باسقارۋ ىسىندە جۇيەلىك سيپاتتاعى قاتەلىكتەر كوبەيگەنىن ءتۇسىنىپ وتىرمىز»، - دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
داۋرەن اباەۆتىڭ سوزىنشە، جەمقورلىق تۋرالى ءسوز بولعاندا قازىر ءبارى جەڭ ۇشىنان جالعاسقان تامىر-تانىستىق، نەپوتيزم، بيۋروكراتيا سياقتى مەملەكەتتىك اپپاراتتىڭ ءتۇرلى اقاۋلارىن ايتاتىن بولعان.
«ال وسى پروبلەمانى قالاي شەشۋ كەرەك دەگەندە ادال ەمەس، اقىلسىز، ءبىلىمى جوق ادامداردىڭ ورنىنا قىزمەتكە لايىق، ادال، اقىلدى، ءبىلىمى بار ادامداردى قويۋ كەرەك دەگەندى ءجيى ايتادى. ارينە، بۇل ادەمى ەستىلەدى. بىراق پروبلەما باسقادا. كەز كەلگەن شەنەۋنىك قالىپتاسقان نۇكتەلەردىڭ بەلگىلەنگەن جۇيەسىندە جۇمىس ىستەيدى. ونى كاسىبي ەكوجۇيە دەۋگە بولادى. بۇل ەكوجۇيە ءىش پىستىراتىن دۇنيەلەردەن قۇرالعان. ول – رەگلامەنتتەر، لاۋازىمدىق نۇسقاۋلىقتار، قىزمەتتىك يەرارحيانىڭ ەرەكشەلىكتەرى جانە تاعى باسقالار. كوبىنەسە بۇل پارامەترلەر بىلاي قۇرىلعان. سەن ءتىپتى، نوبەل سىيلىعىنىڭ ءۇش مارتە لاۋراەاتى نەمەسە مەگاكرەاتيۆتى ينتەللەكتۋال بولساڭ دا، ەرتە مە، كەش پە، ءبارى ءبىر قاعاز بەن ەسەپتەرگە كومىلىپ وتىراتىن كلاسسيكالىق شەنەۋنىككە، بيۋروكراتقا اينالاسىڭ»، - دەدى سپيكەر.
پرەزيدەنت اكىمشىلىگى باسشىسىنىڭ ورىنباسارى قاسىم-جومارت توقاەۆتىڭ ەل اۋزىندا جۇرگەن اتالمىش تاپسىرماسى مەملەكەتتىك باسقارۋ جۇيەسىنىڭ پارامەترلەرىن وزگەرتۋ جولىنداعى العاشقى قادامداردىڭ ءبىرى دەگەن وي ايتتى.
«مەملەكەتتىك قىزمەتشىلەردىڭ ينەرتتىلىگى، باستامادان جۇردايلىعى، تيتىمدەي قاتەلىكتى تاۋداي كورىپ قورقۋى مەملەكەتكە جەمقورلىقتىڭ وزىنەن دە ۇلكەن شىعىن اكەلىپ جاتقان شىعار. مەن مۇنى ادەمى سويلەۋ ءۇشىن ايتىپ وتىرعانىم جوق. قاراپايىم عانا مىسال، بۇرىن دا ايتقانمىن. بىلتىر جازدا پاندەميا ءورشىپ، جىلدام قيمىلداپ، جاۋاپكەرشىلىكتى مويىنعا الۋ ارقىلى مەديتسينالىق ماسكالار مەن وكپە اپپاراتتارىن، ءدارى-دارمەكتەردى دەر شاعىندا ساتىپ الۋ كەرەك بولعان كەزدە ادامدار جوعارىدان نۇسقاۋ كۇتىپ وتىرىپ الدى. ال مىنا جاقتا ادامدار اۋا جەتپەي، تۇنشىعىپ جاتقان ەدى. وتتەگى ماسكالارى، ءبارى-ءبارى كەشىگىپ جەتتى. ويتكەنى اكتىلەرگە قولدار مەن بۇرىشتامالار قويىلماعان ەدى. تەك پرەزيدەنت ارالاسقاننان كەيىن عانا پروتسەسس قارقىن الدى»، - دەپ ەسكە الدى داۋرەن اباەۆ.
سونداي-اق، ول پرەزيدەنتتىڭ ەل اراسىندا قىزۋ تالقىلانعان ءسوزىنىڭ استارىندا جەمقورلىقپەن كۇرەس جۇمسارتىلادى دەگەن يشارا جاتپاعانىن ەسكەرتتى.
«سەنىڭىز، جەمقورلىقپەن كۇرەستى ەشكىم توقتاتايىن دەپ جاتقان جوق. كەرىسىنشە بۇعان دەيىن بيۋروكراتيالىق شيەلەنىستەردى تارقاتۋعا باعىتتالعان كۇشتىڭ ءبارى شىن جەمقورلىقپەن كۇرەسكە تاستالادى. مەملەكەتتىك قىزمەتشىنىڭ الەۋەتىن تولىق اشۋعا جاعداي جاسالىپ، تيىمدىلىگىن ارتتىرۋ كەرەك. بۇل باعىتتاعى باستى جۇمىس وسى بولماق» - دەدى ول.
Abai.kz
