تءاجىكستان پرەزيدەنتى ەمومالي راحمون تءاجىك-اۋعان شەكاراسىن نىعايتۋ ءۇءشىن رەزەرۆتەگى 20 مىڭ جاۋىنگەردى جۇمىلدىرۋدى تاپسىردى. مۇنداي تاپسىرمانى راحمون 5 شىلدەدە ءوتكەن قاۋىپسىزدىك كەڭەسىنىڭ وتىرىسىندا قورعانىس مينيسترىنە بەردى.

5 شىلدەدە تاجىكستاننىڭ شەكارا قىزمەتى تاليبان سودىرلارى باداحشان ەلدى-مەكەنىنىڭ حوحون، شيكاي، نۋساي، موحيماي، شۋگنون جانە سۋلتان يشكاشيم اۋداندارىن تولىعىمەن باسىپ العانىن جاريالادى. باداحشان ايماعىنداعى تاجىكستان مەن اۋعانستان شەكاراسىنىڭ قاشىقتىعى - 910 شاقىرىم.

رەسمي ەسەپ بويىنشا، قازىر 1500-دەن استام اۋعان اسكەرى تاجىك اۋماعىنا قاشقان.

20 جىلدان بەرى اۋعانستاندا تەرروريستەرگە قارسى كۇرەسىپ كەلگەن اقش باستاعان كواليتسيالىق كۇشتەر مامىر ايىنان باستاپ اسكەرلەرىن شىعارىپ جاتىر. قۇراما شتاتتار بيلىگى 11 قىركۇيەككە دەيىن اسكەرىن اۋعانستاننان تولىق شىعاراتىنىن جاريالاعان.

وسىنداي جاعدايدا تاليبان اۋعانستاننىڭ سولتۇستىگىندەگى تاجىكستان جانە وزبەكستانمەن شەكتەسەتىن بىرنەشە اۋداندى باسىپ الدى. سودىرلار سوڭعى ايدا 143 اۋداندى باسىپ العانىن جاريالاسا، اۋعانستاننىڭ ىشكى ىستەر مينيسترلىگى بۇل مالىمەتتى تەرىسكە شىعارىپ وتىر.

تاجىك بيلىگى اۋعانستاننان بوسقىندار كوبەيۋى مۇمكىن ەكەنىن بولجاسا، وزبەكستان وتكەن اپتادان باستاپ اسكەري جاتتىعۋدى باستاپ كەتتى.

Abai.kz