29 جاستاعى شىمكەنت قالاسى ءماسليحاتىنىڭ دەپۋتاتى، «وتاۋ-ستروي» جشس ديرەكتورى اسلان الىمبەك بيۋدجەتتەن 2,162 ميلليارد تەڭگە تەندەر الادى.

دەپۋتات بۇل قارجىعا ءتورت جولاقتى اۆتوموبيل جولىنىڭ 3,994 شاقىرىمىن سالماق.

«شىمكەنت قالاسىنىڭ شىعىس اينالما جولىنىڭ قۇرىلىسى.I كەزەڭ (№1 جولدان ءال-فارابي كوشەسىنە دەيىن)». جەڭىپ الدى - «وتاۋ-ستروي» جشس.  تاپسىرىس بەرۋشى - جولاۋشىلار كولىگى جانە اۆتوموبيل جولدارى ءبولىمى»,- دەلىنگەن لوت سيپاتتاماسىندا.

جوبانىڭ تەحنيكالىق سيپاتتاماسىندا شىمكەنت قالاسىنىڭ شىعىس اينالما جولىنىڭ سالىنۋى قالاداعى ترافيكتىڭ قىسقارۋىنا جانە ترانزيتتىك كولىكتەردىڭ قالانى اينالىپ ءوتىپ، كەدەرگىسىز، اپاتسىز وتۋىنە كەپىلدىك بەرەدى دەپ كورسەتىلگەن. جۇمىس جوباسى ءتورت ايالدامانى ورناتۋدى كوزدەيدى.

قۇرىلىس مەرزىمى - 22 اي. تاپسىرىس بەرۋشىنىڭ 2020 جىلعى 5 ماۋسىمداعى حاتىنا سايكەس قۇرىلىستىڭ باستالۋى 2021 جىلدىڭ II توقسانىنا جوسپارلانعان. تەندەر جەڭىمپازىمەن كەلىسىمشارت 22 ماۋسىمدا جاسالعان.

ايتا كەتەيىك، كاسىپكەر اسلان الىمبەك 2021 جىلى 10 قاڭتاردا وتكەن ءماسليحات دەپۋتاتتارىن سايلاۋ كەزىندە «نۇروتان» پرايمەريزىنە قاتىسىپ، دەپۋتات بولعان.

Abai.kz